1.5 ބިލިއަން ރުފިޔާގެ ޓީ ބިލް ވިއްކަން ހުޅުވާލައިފި
މީގެ ތެރޭގައި ޖުމްލަ 4 ޓީ ބިލެއް ހިމެނޭ
ފިނޭންސް މިނިސްޓަރ އިބްރާހިމް އަމީރު
ސަރުކާރުގެ ޚަރަދުތައް ހަމަޖެއްސުމަށް 1.5 ބިލިއަން ރުފިޔާގެ ޓީ ބިލް ވިއްކަން ހުޅުވާލައިފިއެވެ.
1.5 ބިލިއަން ރުފިޔާގެ ޓީ ބިލް ގަންނާނެ ފަރާތެއް ހޯދުމަށް ފިނޭންސް މިނިސްޓްރީން އިއުލާނުކޮށްފައިވާއިރު، މި އިއުލާނުގައި ވަނީ މިމަހުގެ 13 ވަނަ ދުވަހު ހަތަރު ޓީ ބިލެއް ވިއްކުމަށް ހަމަޖެހިފައިވާކަމަށެވެ.
މީގެ ތެރޭގައި ޖުމްލަ 4 ޓީ ބިލެއް ހިމެނެއެވެ. އެގޮތުން 674 މިލިއަން ރުފިޔާގެ ޓީ ބިލް ވިއްކުމަށް ހުޅުވާލާފައިވާއިރު، މި ޓީ ބިލްތައް ވިއްކަނީ 3.50 އިންސައްތައިގެ އިންޓްރެސްޓުގައެވެ. މި ފައިސާ 28 ދުވަހުގެ ތެރޭގައި ސަރުކާރުން އަނބުރާ ދައްކަންޖެހެއެވެ. 188 މިލިއަން ރުފިޔާގެ ޓީ ބިލް 3.87 އިންސައްތައިގެ އިންޓްރެސްޓުގައި ވިއްކަން ހުޅުވާލާފައިވާއިރު، މި ފައިސާ 98 ދުވަހުން ދައްކަންޖެހެއެވެ. އޭގެ އިތުރުން 205 މިލިއަން ރުފިޔާގެ ޓީ ބިލް 4.23 އިންސައްތައިގެ އިންޓްރެސްޓުގައި ވިއްކަން ހުޅުވާލާފައިވާއިރު، މި ފައިސާ 182 ދުވަހުގެ ތެރޭގައި ދައްކަންޖެހެއެވެ. އަދި 466.3 މިލިއަން ރުފިޔާގެ ޓީ ބިލް، 4.60 އިންސައްތައިގެ ރޭޓުގައި ވިއްކަން ހުޅުވާލާފައިވާއިރު، މި ފައިސާ 364 ދުވަހުގެ ތެރޭގައި ދައްކަންޖެހެއެވެ.
ޓީ ބިލް ގަންނަ ފަރާތްތަކުން އަންގާރަ ދުވަހުގެ ކުރިން އެ ފައިސާ ސަރުކާރަށް ދައްކަންޖެހެއެވެ.
މިދިޔަ ހަފްތާގެ ތެރޭގައި ފިނޭންސް މިނިސްޓްރީން 1.8 ބިލިއަން ރުފިޔާގެ ޓީ ބިލް ވިއްކާފައެވެ. ސަރުކާރުން ޓީ ބިލަށް ދައްކަންޖެހޭ ފައިސާގެ އަދަދު 47.6 ބިލިއަން ރުފިޔާއަށް އަރައެވެ. ޓީ ބިލަކީ ސަރުކާރުގެ ކޭޝްފްލޯ ހަމަޖެއްސުމަށް އިންޓަރެސްޓާއެކު އަނބުރާ ދައްކާ ގޮތަށް ސަރުކާރުން ވިއްކާ ފައިނޭންޝަލް ސެކިއުރިޓީއެކެވެ. ދިވެހި ސަރުކާރުން ޓީ ބިލް, ރުފިޔާއާއި ޑޮލަރުން ވެސް ވިއްކާ އިރު، މި ޓީ ބިލްތައް ވިއްކަނީ 28 ދުވަހާއި، 91 ދުވަހާއި، 182 ދުވަސް އަދި 364 ދުވަހުގެ ތެރޭގައި ފައިސާ އަނބުރާ ދައްކަންޖެހޭ ގޮތަށެވެ.
