އިންސާފުން ކަންކަން ނުކުރާނަމަ ވަކިކުރަން ޖެހުނު ކޮންމެ މީހަކު ވަކިކުރަން ތައްޔާރަށް ތިބި ކަމަށް އެމްޑީޕީގެ ޕާލިމަންޓްރީ ގްރޫޕްގެ ލީޑަރު އަދި މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ.
ފަނޑިޔާރުންގެ ގާނޫނަށް ހުށަހެޅިފައިވާ އިސްލާހަށް ހޯމަ ދުވަހުގެ ޖަލްސާގައި ވާހަކަދައްކަވަމުން އާޒިމް ވިދާޅުވީ، ރައްޔިިތުންނަށް ތާހިރު ދިރިއުޅުމެއް ހޯދައިދިނުމަށް ކުރަން ޖެހުނު ކޮންމެ ކަމެއް އެމްޑީޕީން ކުރާނެ ކަމަށެވެ. އެއީ މިނިވަން މުއައްސަސާގެ މެމްބަރުން ކަމުގައި ވިޔަސް، ރައްޔިތުންނަށް އިންސާފުން ކަންކަން ކޮށްނުދޭ ނަމަ މެމްބަރުން ވަކިކޮށްގެންވެސް އެތަނެއް އިސްލާހު ކުރައްވާނެ ކަމަށް އާޒިމް ވިދާޅުވިއެވެ.
މީގެއިތުރުން ރައްޔިތުންގެ އިތުބާރު އެމްޑީޕީއަށް އޮތްކަން ބައި އިލެކްޝަނުންވެސް ހާމަވެގެން ގޮސްފައިވާ ކަމަށް އާޒިމް ވިދާޅުވިއެވެ. އަދި ރައްޔިތުން އެމްޑީޕީއަށް ވޯޓު ދެނީ ތާހިރު ދިރިއުޅުމެއް ހޯދުމަށް ކަމަށާއި އެހެންކަމުން ދައުލަތާއި ރައްޔިތުންގެ ފައިސާއަށް ޚިޔާނާތްތެރިވާތަން ބަލަން ނުތިއްބަވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ދައުލަތުގެ ގިނަ އަދަދެއްގެ ފައިސާ ކުރީގެ ރައީސް ޔާމީންގެ އެކައުންޓުގައި ހުރިކަން ކަނޑައެޅިގެން އެނގޭއިރު، ސުޕްރީމް ކޯޓުން އެ މަނިކުފާނު މިނިވަން ކުރަން ކުރި ހުކުމަކީ ވަރަށް ‘އަޖައިބުވާ ކަހަލަ’ ހުކުމެއް ކަމަށެވެ.
އެ ތަނުން ފަނޑިޔާރުންގެ ބެންޗުން އެބަ އިއްތިފާގު އެބަވޭ އެއް ކަންތައް، ދައުލަތުގެ ގިނަ ފައިސާ ރައީސް ޔާމީންގެ އެކައުންޓުގަ ހުރިކަން. 100 މިލިއަނަށް ވުރެ ގިނަ ފައިސާ، ދިވެހި ރުފިޔާ ރައީސް ޔާމީންގެ އެކައުންޓުގަ ހުރިކަން. އެ އިއްތިފާގު އެބަވޭ ހުރިހާ ފަނޑިޔާރުން ވެސްމެދު ހެންވޭރު ދާއިރާގެ މެންބަރު ޢަލީ އާޒިމް
އަދި ޔާމީންގެ އެކައުންޓްގައި 100 މިލިއަނަށް ވުރެ ގިނަ ރުފިޔާ ހުރިކަން ފެންނަން އޮތް އިރު، ޔާމީން މިނިވަންކަމާއެކު އުޅުމުގެ ފުރުސަތު ދޭން ޖެހޭ ކަމާމެދު ސުވާލު އުފެދޭ ކަމަށްވެސް އޭނާ ވިދާޅުވިއެވެ.
ހަޤީޤަތުގައި ވެސް ދައުލަތުގެ ފައިސާ، އަޅުގަނޑުމެން އަޖައިބުވާ ވަރަށް، އިންތިހާއަށް އަޖައިބުވާ ވަރަށް އެކައުންޓަށް ލާފައި ހުރި މީހަކު ހަމަ ދޫކޮށްލަންވީތޯ، މާލެތެރެއަށް ދޫކޮށްލައިގެން ދޭދޭ ގައުމާ ދޭތެރޭ ޖައްސަމުން، އޭނާ ބޭނުން ރަށަކަށް އެރުމުގެ ފުރުސަތު ދެމުން ދާންވީތޯމެދު ހެންވޭރު ދާއިރާގެ މެންބަރު ޢަލީ އާޒިމް
ރައްޔިތުން ވެސް އެދެނީ އެކަން ހުއްޓުވުމަށް ކަމަށް ވިދާޅުވެ، އާޒިމް އިތުރަށް ވިދާޅުވީ ފަނޑިޔާރުން އެކަން ނުކޮށްފިނަމަ ވަކި ކުރަން ޖެހޭ ފަރާތްތަކުން ވަކިކޮށްގެން ވެސް އެކަން ކުރަން ޖެހޭ ކަމަށާއި އަދި އެކަމަށް ތައްޔާރަށް އޮތް ކަމަށެވެ.
އެގޮތުން ގެންނަން ޖެހުނު ބަދަލު ގެނެސްގެން ދައުލަތުގެ ފައިސާ އެކައުންޓަށް ލާފައި ތިބި މީހުން ޖަލުގެ ތޭރިތަކުގެ ތެރެއަށް ލާންޖެހޭ ކަމަށާއި އެކަން އެހެން ނުކުރާނަމަ ރައްޔިތުން އެމްޑީޕީއަށް އިތުބާރުކުރަން ޖެހޭ ސަބަބެއް ނެތް ކަމަށް އާޒިމް ވިދާޅުވިއެވެ. ގޯސްކޮށް ކަންކުރާ މީހުން ވަކި ނުކުރާނަމަ އެއީ ރައްޔިތުންނަށް ދެވޭ ނިކަމެތި ކަމެއް ކަމަށްވެސް އާޒިމް ވިދާޅުވިއެވެ.
އާޒިމް ވިދާޅުވީ، ރައީސް ޔާމީން ގައުމުގައި ދޫކޮށްލާފައި ބެހެއްޓުމަށް ރައްޔިތުން ބޭނުންވާ ކަމެއް ނޫން ކަމަށާއި، ފަނޑިޔާރުން ކަންކަން ކުރަނީ ރަނގަޅަށްތޯ ބަލައި ޖޭއެސްސީންވެސް ފިޔަވަޅު އަޅަންޖެހޭ ކަމަށެވެ.
