ފަނޑިޔާރުންގެ ޤާނޫނަށް ގެންނަ އިސްލާހުން އެމްޑީޕީއަކީ ބަދަލު ހިފާ ބައެއް ނޫންކަން ދޭހެވާ ކަމުގައި ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލަށް ހޯމަދުވަހުގެ ޖަލްސާގައި ވާހަކަދައްކަވަމުން ސަލީމް ވިދާޅުވީ، ފަނޑިޔާރުންގެ ޤާނޫނަށް އިސްލާހު ގެނައުމުގެ ބިލަކީ އޯގާތެރި ސަރުކާރެއްގެ ތެރެއިން ފަހިވެގެންދާ ކަންކަން ކަމަށާއި، މި ބިލުން ދޭހަވަނީ އެމްޑީޕީއަކީ ބަދަލު ހިފާ ބައެއް ނޫންކަމަށެވެ.
މި ސަރުކާރުން ވައުދުވަނީ ނަމެއްގައެއް ނޫން ކަމަށާއި، އަމަލީ ގޮތުން ކަންކަން ކުރާ ކަން މިސަރުކަރުން ދައްކާ ކަމަށެވެ. ޤާނޫނުތަކަށް ބަދަލު ގެނައުމުގެ މަސައްކަތް 19 ވަނަ މަޖިލީހުން އަންނަނީ ކުރަމުން ކަަމަށާއި، މިއި އޯގާތެރި ސަރުކާރުން ކުރާ މަސައްކަތް ކަމަށްވެސް ސަލީމް ވިދާޅުވިއެވެ.
ނިމިގެންދިޔަ ސަރުކާރުން ފެނުނީ ކޯޓަށް ނުފޫޒު ފޯރުވިތަން ކަމަށާއިި، ސަރުކާރުން ހިތްހަމަ ނުޖެހޭ ގޮތަށް ހުކުމެއް ކޮށްފިނަމަ ފަނޑިޔާރުން ތިބެނީ ބިރުން ކަމުގައި ސަލީމް ވިދާޅުވިއެވެ. މިއަދު އެހެން ނުވާ ކަމުގައި ފާހަގަކުރައްވަމުން ސަލީމް ވިދާޅުވީ، މިއަދު ފަނޑިޔާރުންނަށް އިންސާފުން ހުކުމް ކުރުމުގެ މިނިވަންކަން އެބައޮތް ކަމަށެވެ. ޖޭއެސްސީ އަކީ މިއަދު ހަރަކާތްތެރި ތަނެއް ކަމުގައި ސަލީމް ފާހަގަކުރެއްވިއެވެ.
މިހާރު ކޯޓުތަކަށް ފަނޑިޔާރުން އައްޔަން ކުރަނީ ދެފުއް ފެންނަ ގޮތަށް ކަމަށާއި، އިސް ފަނޑިޔާރުން އައްޔަން ކުރުމުގެ އުސޫލެއް ޤާއިމްކުރެވި، ފަނޑިޔާރުންގެ ފެންވަރު ވަޒަން ކުރުމުގެ އިޖުރާއަތާއި ގަވާއިދު ހެދިފައި އެބައިތް ކަމަށް ސަލީމް ވިދާޅުވިއެވެ. އަދި ފަނޑިޔާރުންގެ މާލީ ބަޔާން އާންމު ކުރާނެ ގޮތްވެސް މިއަދު މިވަނީ ފަހިވެފައި ކަމަށް ސަލީމް ވިދާޅުވިއެވެ.
ދަށު ކޯޓުތަކުގެ މައްސަލަތައް ލަސްވަމުންދާ މައްސަލައަށް ހައްލު ހޯދުމަށް މިވަގުތައް އެޅޭނެ ފިޔަވަޅު އެޅުމަށް ޝަރުއީ ވަފުދުތައް ފޮނުވުމުގެ އުސޫލް ޤާއިމް ކުރެވިފައިވާކަމަށްވެސް ސަލީމް ވިދާޅުވިއެވެ.
މީގެއިތުރުން އެންމެން ގުޅިގެން މަސައްކަތް ކޮށްގެން ނޫނީ ފަނޑިޔާރުގެ އިސްލާހު ނުކުރެވޭނެ ކަމަށްވެސް ސަލީމްގެ ވާހަކަފުޅުގައި ވިދާޅުވިއެވެ.
