އިމްރާނާއި ސިޔާސީ ގޮތުން ޚިޔާލުތަފާތު، ނަމަވެސް އިމްރާން ރިޝްވަތު ނެންގެވިކަމަށް ޤަބޫލެއްނުކުރަން: ޑރ. އިޔާޒު
ކޮމަންޑޫ ދާއިރާއަށް އެމްޑީޕީން ނިކުތް ކެންޑިޑޭޓް މުހައްމަދު ރާޝިދަށް ތާއީދުކުރުމަށް އަދާލަތު ޕާޓީން ތާއީދުކޮށްފައިވަނީ އިމްރާން އިސްވެ ހުންނަވާ
ޑރ. މުޙައްމަދު އިޔާޒު ޢަބްދުލްލަތީފް
އަދާލަތު ޕާޓީގެ ރައީސް އަދި ހޯމް މިނިސްޓަރ އައްޝެއިޚް އިމްރާން އަބްދުﷲ އާއި ސިޔާސީ ގޮތުން ޚިޔާލުތަފާތު ކަމަށާއި ނަމަވެސް އިމްރާން ރިޝްވަތު ނަންގަވާނެކަމަށް ޤަބޫލުނުކުރައްވާކަމަށް އަދާލަތު ޕާޓީގެ އިލްމުވެރިންގެ މަޖިލީހުގެ ނައިބު ރައީސް އަދި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް ވިދާޅުވެއްޖެއެވެ.
ނިމިގެންދިޔަ ކޮމަންޑޫ ދާއިރާގެ ބައި އިލެކްޝަންގައި އެދާއިރާއަށް އެމްޑީޕީން ނިކުތް ކެންޑިޑޭޓް މުހައްމަދު ރާޝިދަށް ތާއީދުކުރުމަށް އަދާލަތު ޕާޓީން ތާއީދުކޮށްފައިވަނީ އިމްރާން އިސްވެ ހުންނަވާއެވެ. އިމްރާން އިސްވެ ހުންނަވާ ނިންމެވި ނިންމެވުމަށް އިޔާޒު އާއި އައްޝެއިހް އަލީ ޒައިދު ވަނީ ފާޑުވިދާޅުވެ ވާހަކަދައްކަވާފައެވެ. އަދި އެމްޑީޕީއަށް ވޯޓު ނުދިނުމަށް ޒައިދު ގޮވާލައްވާފައިވެސްވެއެވެ.
އެހުރިހާ ކަމަކާއެކުވެސް އިމްރާން ވަނީ ކެމްޕެއިންގެ ހަރަކާތްތަކުގައި ކޮމަންޑޫ ދާއިރާއަށް ވަޑައިގެން އަމަލީ ގޮތުން ކެމްޕެއިންގައި ބައިވެރިވެވަޑައިގަންނަވާފައެވެ. މިއާއެކު އިދިކޮޅުން ވަނީ އިމްރާނުގެ މައްޗަށް ބޮޑެތި ތުހުމަތުތަކެއްކޮށްފައެވެ. އެގޮތުން އިދިކޮޅު ކޯލިޝަނުން ބުނީ އިމްރާން ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕޭނަށް ނިކުންނެވީ އިމްރާންގެ އެކުވެރި ވިޔަފާރިވެރިޔަކަށް ރަށެއް ދޭން ސަރުކާރުން ނިންމުމުންކަމަށެވެ. އިދިކޮޅު ކޯލިޝަންގައި ހިމެނޭ ޕީއެންސީގެ ނައިބް ރައީސް އަދި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ވިދާޅުވީ އަދާލަތު ޕާޓީ ކުރިން އޮތީ އިންތިހާބުގެ ކެމްޕޭންގައި ބައިވެރި ނުވާ ގޮތަށް ކަމަށެވެ.
ކޮމަންޑޫ ދާއިރާގެ ބައި އިލެކްޝަނަށް ފަހު އިދިކޮޅުން ބޭއްވި ނޫސްވެރިންގެ ބައްދަލުވުމުގައި ޝުޖާއު ވިދާޅުވީ އަދާލަތު ޕާޓީގެ ނިންމުން ބަދަލުވީ މިނިސްޓަރު އިމްރާނާއި އަދާލަތު ޕާޓީ އަށް ނިސްބަތްވާ ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ ގާތް ރަހްމަތްތެރި އަރަބި ވިޔަފާރިވެރިޔަކަށް ރިސޯޓެއް ހެދުމަށް ރަށެއް ދިނުމަށް ރައީސް އޮފީހުން ނިންމުމުން ކަމަށެވެ.
މިތުހުމަތުތަކާއި ގުޅިގެން ޑރ. އިޔާޒު ކުރެއްވި ޓްވީޓެއްގައި ވިދާޅުވީ އިމްރާން އާއި ސިޔާސީ ގޮތުން ކިތަންމެ ޚިޔާލު ތަފާތުވީނަމަވެސް އަދި ނިމިދިޔަ ކޮމަންޑޫ ދާއިރާގައި އެމްޑީޕީގެ ކެންޑިޑޭޓަށް ތާއީދުކުރައްވާ ކެމްޕެއިނަށް ނިކުންނެވުމާ ދެކޮޅުނަމަވެސް އިމްރާން އެކަން ކުރެއްވީ ރިޝްވަތު ނަންގަވައިގެން ކަމަށް ގަބޫލު ނުކުރައްވާކަމަށެވެ.
އިދިކޮޅުން ކުރަމުންދާ ތުހުމަތުތަކަށް އަދާލަތުންވެސް އަދި އިމްރާންވެސް އަދި މިހާތަނަށް އެއްވެސް ރައްދެއް ދެއްވާފައެއް ނުވެއެވެ.
