ވެރިކަން ގެއްލިދާނެތީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ކަންބޮޑުވެވަޑައި ނުގަންނަވާކަމަށާއި، ރައީސްގެ ފޯކަސް ހުންނެވީ ރައްޔިތުންނަށް އެތައް ޒަމާނެއް ވަންދެން ނުކޮށްދެވި ހުރި ކަންކަން ކޮށްދެއްވާ، ހެޔޮވެރިކަމެއް ކުރެއްވުމަށް ކަމުގައި އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެއެވެ.
މިހާތަނަށް ހޯދުނު ކާމިޔާބީއަކާއި، މާދަމާ ހޯދަން އޮތް ކާމިޔާބީއެއްގެ ސިއްރަކަށް ވާނީ ހެޔޮވެރިކަންކަމަށް ރައީސް ސާލިޙުގެ ރިޔާސީ ބަޔާނުގައި ވިދާޅުވުމާއި ގުޅޭގޮތުން ރާއްޖެއެމްވީން ސުވާލު ދެންނެވުމުން ފައްޔާޒް ވަނީ، މި ވެރިކަމުގައި އަނިޔާވެރިކަމާއެކު ޖަލަށްލާފައިވަނީ ކާކުތޯ އާއި، އަނިޔާ ލިބުނީ ކޮން ނޫސްވެރިއަކަށްތޯ ސުވާލު ކުރައްވާފައެވެ.
ވަކިން ޚާއްސަކޮށް އިންޑިއާ ކަނޑުގެ ސަރަޙައްދު ކިލަނބުކޮށް، ދިވެހިންގެ އިސްތިޤުލާލަށް ގެއްލުންވާނެ ފަދަ ކަންތައްތަކެއް ބަޔަކު ކުރަމުން ގެންދާއިރުވެސް، މި ސަރުކާރުން ބަޔަކު ހައްޔަރުކޮށް ޖަލަށްލައިގެން އަނިޔާވެރިކަމާއެކު ކަންކަން ކުރަމުން ނުދާކަމަށް ފައްޔާޒް ވިދާޅުވިއެވެ.
ކާކުތޯ ހައްޔަރުކުރީ އަޅުގަނޑުމެން؟ ކޮން ނޫސްވެރިއެއްތޯ އަޅުގަނޑުމެން ހައްޔަރުކުރީ؟ ކޮން ޓީވީ ޗެނަލެއްތޯ ޖޫރިމަނާކޮށް ބަންދުކުރީ؟ ކޮން ނޫހެއްތޯ އަޅުގަނޑުމެން އުވާލީ؟ އެކަމަކު ލައްކަ ވާހަކަ އަޅުގަނޑުމެންނޭ ކިޔައިގެން ދައްކާތާ، އިންސާނަކަށް ނުގޮވާ ވަރަށް ދޮގު މައުލޫމާތުތަކާއި އެއްޗެހި ނޫސްތަކުގައިވެސް ޖަހަމުން، އަދި ފަރުވާކުޑަވެގެން ނަމަވެސް އެތައް ކަމެއް ވެގެން އެބަދޭ، އިދިކޮޅު ފަރާތުން ނުކުމެ އަޅުގަނޑުމެންގެ އިންޑިއާގެ ކަނޑުގެ ސަރަޙައްދު ކިލަނބުކޮށްލާ، އަޅުގަނޑުމެންގެ އިސްތިޤުލާލަށް ގެއްލުންވާނެ ފަދަ ކަންތައްތަކެއް ކުރަމުންގެންދާއިރުވެސް އަޅުގަނޑުމެން ކާކުތޯ ހައްޔަރުކޮށް، ބަންދުކޮށް، ޓެރަރިޒަމޭ ކިޔައިގެން ޙުކުމް ކުރީ؟ އެއީ ހެޔޮ ވެރިކަމަކީ އިނގޭތޯ.އިކޮނޮމިކް މިނިސްޓަރ ފައްޔާޒް އިސްމާއިލް
ފައްޔާޒް ވިދާޅުވީ، ކުރީގެ ސަރުކާރުން ނަމަ އޭސީސީއަށް ނުވަތަ ކޯޓެއްގެ ޙުކުމަކަށް ނުބަލާ ކަމަށެވެ. އޭރު ކޯޓަކުން ޙުކުމެއް ކުރުމުން އެ ކޯޓެއްގެ "ފުރާޅު ނަގައިގެން" ގާޒީން ހައްޔަރުކުރި މަންޒަރާއި، ސަރުކާރު ބޭނުންވާ ގޮތަށް ކޯޓުތައް ހިންގި މަންޒަރު ފެނިފައިވާކަމަށްވެސް ފައްޔާޒް ވިދާޅުވިއެވެ. ނަމަވެސް މިސަރުކާރުން ކޯޓުގެ ނިންމުންތަކަށް އިޚްތިރާމު ކުރާކަމަށް ފައްޔާޒް ވިދާޅުވިއެވެ. އަދި ރައީސް އެވިދާޅުވާ ހެޔޮވެރިކަމަކީ މިއީ ކަމަށާއި މި ޤައުމުގެ މުސްތަޤުބަލެއްވެސް އޮތީ ވެރިކަން ކުރާ ބާރާއި، އަދުލު އިންސާފު ޤާއިމުކުރާ ބާރު ވަކިވެގެންކަން މިހާރުގެ ސަރުކާރުން ޤަބޫލުކުރާކަމުގައި ފައްޔާޒް ވިދާޅުވިއެވެ.
ފައްޔާޒް ވިދާޅުވީ، އެ ހުރިހާ ގޮންޖެހުމަކާއެކު ކުރިއަށް ނުދެވޭނަމަ އެއްވެސް ބަޔަކު ވެރިކަމަށް އައުމުގެ ބޭނުމެއް ނެތް ކަމަށެވެ. މީހުން ހައްޔަރުކުރުމާއި، ތަޙުޤީޤު ހިންގުމާއި، ދައުވާކޮށް، ހެއްކާއި ޤަރީނާ ހުށައަޅައިގެން ކުށް ސާބިތު ކުރުމަކީ، މިއީ ވަކި ނިޒާމެއްގެ ދަށުން އޮންނަން ޖެހޭ ކަންކަން ކަމުގައިވެސް ފައްޔާޒް ވިދާޅުވިއެވެ.
ފައްޔާޒް ވަނީ އިދިކޮޅުން ކުރިއަށް ގެންދާ އިންޑިއާ އައުޓް ކެމްޕޭނަކީ ހެޔޮ ވެރިކަމެއް މިސަރުކާރުން ކުރާތީ ރައްޔިތުންގެ ލޮލުގައި އަނދުން އެޅުވުމަށް ކުރަމުންދާ ކަމެއްކަމަށް ވިދާޅުވެފައެވެ. އެޙަރަކާތަށް މާބޮޑު ތަރުހީބެއްވެސް ނުލިބޭކަމަށާއި ނަމަަވެސް، އެޙަރަކާތުގެ ސަބަބުން ދިވެހިންގެ މިނިވަންކަމާއި އިސްތިޤުލާލަށް ބޮޑެތި އަސަރު ކުރާކަމަށް ފައްޔާޒް ވިދާޅުވިއެވެ.
މީގެއިތުރުން، ވެރިކަން ގެއްލިދާނެތީ ރައީސް ސާލިޙު ކަންބޮޑުވެވަޑައިނުގަންނަވާކަން ފާހަގަކުރައްވައި ފައްޔާޒް އިތުރަށް ވިދާޅުވީ، ރައީސްގެ ފޯކަސް ހުންނެވީ ރައްޔިތުންނަށް އެތައް ޒަމާނެއް ވަންދެން ނުކޮށްދެވި ހުރި ކަންކަން ކޮށްދެއްވުމަށް ކަމަށެވެ. ހެޔޮ ވެރިކަމަކީ މިއީކަންވެސް ފައްޔާޒް ފާހަގަކުރެއްވިއެވެ.
މިހާތަނަށް ހޯދުނު ކާމިޔާބީއަކާއި އަދި މާދަމާ ހޯދަންއޮތް ކާމިޔާބީއެއްގެ ސިއްރަކަށް ވާނީ ހެޔޮވެރިކަންކަމަށް ރައީސް ވިދާޅުވީ ރިޔާސީ ބަޔާން އިއްވަވަމުންނެވެ. ރައީސް ވިދާޅުވި ގޮތުގައި ހެޔޮވެރިކަމަކީ، އެވެރިކަމުގެ ހިޔާވަހިކަން އިންސާފުވެރިކަމާއި ހަމަހަމަ ކަމާއެކު، ހުރިހާ ރައްޔިތުންނަށް ފޯރުކޮށްދިނުމެވެ.
ރައީސް އަބްދުﷲ ޔާމީނުގެ ވެރިކަމުގައި ސިޔާސީ އިދިކޮޅު ހުރިހާ ލީޑަރުން ތިއްބެވީ ޖަލުގައެވެ. ޕާޓީތަކުގެ ލީޑަރުން ޖަލުގައި ތިއްބަވަން ޖެހެނީ ކުށެއް ކުރައްވައިގެން ނޫން ކަމަށާއި އެބޭފުޅުން ޖަލުގައި ތިއްބަވަން ޖެހެނީ ރައީސް އަބްދުﷲ ޔާމީނަން ބިރަކަށް ވުމުން ކަމަށް އޭރުވެސް އިދިކޮޅު ސިޔާސީ ފަރާތްތަކުން ގެންދިޔައީ ބުނަމުންނެވެ.
އޭރު އިދިކޮޅު ސިޔާސީ ލީޑަރުން ހައްޔަރު ކުރުމާއި، އިދިކޮޅު ސިޔާސީ ފަރާތްތަކަށް ބިރު ދެއްކުން ހުއްޓާލުމަށް ޔޫރަޕިއަން ޔޫނިއަނުން ދިވެހި ސަރުކާރަށްވެސް ގޮވާލާފައިވެއެވެ. ޔޫރަޕިއަން ޔޫނިއަނާއި، ކެނެޑާ, ނޯވޭ، ސްވިޒަލޭންޑްގެ އިތުރުން އެމެރިކާ ގުޅިގެން ނެރުނު ބަޔާނެއްގައި ވަނީ، އެއްވެ އުޅުމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމަށް އިހުތިރާމް ކުރުމުގެ މިނިވަންކަން އޮންނަންޖެހޭކަން ފާހަގަކޮށް، ޖަލަށްލުމުގެ ބިރެއް ނެތި އިދިކޮޅު ސިޔާސި ފަރާތްތަކުން ރާވާ ހަރަކާތްތައް ހިންގުމުގެ ފުރުސަތު ދޭންޖެހޭކަމަށް ބަޔާންކޮށްފައެވެ.
ރައީސް ޔާމީނުގެ ވެރިކަމުގައި ޖޭޕީގެ ރައީސް ގާސިމް އިބްރާހިމާއި، ގާސިމްގެ ދަރިކަލުންނާއި، އެމްޑީޕީގެ ރައީސް މުހައްމަދު ނަޝީދާއި، އަދާލާތު ޕާޓީގެ ރައީސް ޝެއިޚް އިމްރާން އަބްދުﷲ ވަނީ ޖަލަށް ލާފައެވެ. އެބޭފުޅުންގެ އިތުރުން ކުރީގެ ޑިފެންސް މިނިސްޓަރު މުހައްމަދު ނާޒިމާއި، ގެލޮޅު ދެކުނު ދާއިރާގެ މެންބަރު އަހުމަދު މަހުލޫފާއި، ކުރީގެ ނާއިބު ރައީސް އަހުމަދު އަދީބުވެސް ޖަލަށް ލާފައިވެއެވެ.
