މިލަދޫ ބަނދަރު މަޝްރޫއު ނިމުމަކާއި ގާތަށް

ށ.މިލަދޫ ބަނދަރު ތަރައްޤީ ކުރުމުގެ މަޝްރޫއުގެ ބޮޑުބައެއް ނިމިފައިވާކަމަށް އެމަސައްކަތުގެ ކޮންޓެކްޓަރު އެމްޓީސީސީން ބުނެފިއެވެ.

އެމްޓީސީސީން ބުނީ މިލަދޫ ބަނދަރު ތަރައްޤީ ކުރުމުގެ މަޝްރޫއުގެ 90 އިންސައްތަ މަސައްކަތް މިހާރު ނިމިފައިވާކަމަށެވެ. އަދި މިމަޝްރޫއުގެ މަސައްކަތަށް ބޭނުންވާ ބޮޑު ހިލައިގެ އެންމެ ފަހުގެ ޝިޕްމެންޓް މިމަހުގެ 1 ވަނަ ދުވަހު އެރަށަށްވަނީ ގެންގޮސްފައެވެ. އަދި ހާބަރ ޕޭވްމެންޓްގެ މަސައްކަތް ނިންމާ މިހާރު ކުރިއަށްދަނީ ރިވެޓްމެންޓް ޖެހުމުގެ މަސައްކަތް ކަމަށްވެސް އެކުންފުނިން ބުނެއެވެ.

45 މިލިއަނަށްވުރެ ގިނަ ރުފިޔާ ޚަރަދުކޮށްގެން ތަރައްޤީ ކުރާ މިބަނދަރުގެ މަޝްރޫޢުގެ ދަށުން 37 އަކަމީޓަރަށްވުރެ ބޮޑު ސަރަޙައްދެއް ފުންކޮށް 209 މީޓަރުގެ ސަރަޙައްދެއްގައި ބޭރުތޮށިލައި 152 މީޓަރުގެ ސަރަޙައްދެއްގައި ހިލައިން ރިވެޓްމަންޓް ޖެހުމާއި 286 މީޓަރުގެ ސަރަޙައްދެއްގައި އެއްގަމު ތޮށިލައި 1430 އަކަ މީޓަރުގެ ސަރަހައްދެއްގައި ދުވާރު ހެދުންވެސް މި މަސައްކަތުގެ ތެރޭގައި ހިމެނެއެވެ. މީގެއިތުރުން ނެރު ބައްތި ޖެހުމާއި މަގު ބައްތިޖެހުންވެސް މި މަސައްކަތުގެ ތެރެއިން ކުރުމަށް ވަނީ ހަމަޖެހިފައެވެ.

މިބަނދަރުގެ މަސައްކަތް 2019 ވަނަ އަހަރުގެ ސެޕްޓެމްބަރުމަހު އެމްޓީސީސީ އާއި ޙަވާލުކޮށްގެން ކުރިއަށްގެންދާއިރު މިމަސައްކަތް ތާވަލާއި އެއްގޮތަށް ނުނިމުނީ ކޯވިޑްގެ ބަލިމަޑުކަމާއި ގުޅިގެން ދިމާވި ދަތިތަކާއި ހެދިކަމަށް އެމްޓީސީސީއިން ބުނެއެވެ. އެގޮތުން މަސައްކަތަށް ބޭނުންވާ ސާމާނު ލިބުމުގައި ދަތިތަކެއް ކުރިމަތިވިކަމަށްވެސް އެމްޓިސީސީން ބުނެއެވެ.