ތެޔޮ ގަތުމަށް، އިންޑިއާއިން ސްރީލަންކާއަށް 500 މިލިއަން ޑޮލަރުގެ ލޯނެއް ދީފި

ސްރީލަންކާއަށް ދިމާވެގެން އުޅޭ ކަރަންޓު ކެނޑުމުގެ މައްސަލައަށް ހައްލު ހޯދުމަށް ބޭނުންވާ ތެޔޮ ގަތުމަށް އިންޑިއާއިން 500 މިލިއަން ޑޮލަރުގެ ލޯނެއް ދީފިއެވެ.

ސްރީލަންކާގެ އިގުތިސާދު ވަރަށް ބޮޑަށް ދަށްވެފައިވާ މި ދަނޑިވަޅުގައި, ކަރަންޓު ފޯރުކޮށްދިނުމަށް އެގައުމަށް ވަނީ ދަތިވެފައެވެ. މިއާއެކު ބޭނުންވާ މިންވަރަށް ކަރަންޓު ފޯރުކޮށްނުދެވުމާއި، އެގައުމުގެ ދަތުރުފަތުރުގެ ނެޓްވޯކްތަކުގެ މަސައްކަތްތައްވެސް ވަނީ ހުއްޓިފައެވެ. އަދި ގޭގެއިން އަވަސް އަވަހަށް ކަރަންޓު ކަނޑައިގެން ދިއުމާއި، ކައްކަން ބޭނުންކުރާ ގޭސް ފަދަ ތަކެތި ފޯރުކޮށްދިނުމަށްވެސް އެގައުމަށް ވަނީ ދަތިވެފައެވެ.

މިގޮތުން ދެ ހަފުތާ ވަންދެން އިންޑިއާ ސަރުކާރާ ސްރީލަންކާ ސަރުކާރާ ދެމެދު ކުރެވުނު މަޝްވަރާތަކަށްފަހު ބުދަ ދުވަހު ވަނީ 500 މިލިއަން ޑޮލަރުގެ ލޯނުގެ އެއްބަސްވުމުގައި ސޮއިކޮށްފައެވެ. މިއީ ކަރަންޓު ކެނޑުމުގެ މައްސަލައަށް ހައްލު ހޯދުމަށް ބޭނުންވާ ތެޔޮ ގަތުމަށް ދޫކޮށްފައިވާ ލޯނެއް ކަމަށް އިންޑިއާ ސަރުކާރުގެ އޮފިޝަލަކު ވިދާޅުވެފައިވެއެވެ.

މީގެ އިތުރުން މި ދުވަސްވަރަކީ ކާނާއާއި އެހެނިހެން ޒަރޫރީ ތަކެތީގެ ދަތިކަންވެސް އެގައުމަށް ކުރިމަތިވެފައިވާ ދުވަސްވަރެކެވެ. އެހެންކަމުން އެގައުމަށް ބޭނުންވާ ކާނާއާއި ބޭސް ފޯރުކޮށްދިނުމަށް ފަންޑު ކުރުމަށްޓަކައި އިތުރު 1 ބިލިއަން ޑޮލަރުގެ ކްރެޑިޓް ލައިނަކާ ގުޅޭ މަޝްވަރާތައް ކުރިއަށްދާކަމަށް އިންޑިއާ ސަރުކާރުގެ އޮފިޝަލް ވިދާޅުވެފައިވެއެވެ.

ސްރީލަންކާއަށް އާމްދަނީ ވަންނަ މައި ސިނާއަތަކީ ފަތުރުވެރިކަމުގެ ސިނާއަތެވެ. އެހެންނަމަވެސް ކޮވިޑް-19ގެ ހާލަތާއެކު ފަތުރުވެރިކަމުގެ ސިނާއަތް ވަނީ ހުއްޓިފައެވެ.