ތިލަދުންމަތީ އުތުރުބުރީ ދިއްދޫގެ ޤަބުރުސްޠާނުގައި ހުރި ދުވަސްވީ ހިރިގައު މަހާނަގައުތަކެއް ނަގާފައިވަނީ 2017 ވަނަ އަހަރުގެ ތެރޭގައި ޤަބުރުސްޠާނުގައި ކުރިން މީހުން ވަޅުލާފައިވާ ސަރަޙައްދު އަލުން ބޭނުންކުރުމަށްޓަކާއި އެތަން ސާފުކުރުމަށް ކަމަށް ސަޤާފީ ތަރިކަ ރައްކާތެރި ކުރާ ޤައުމީ މަރުކަޒުން ބުނެފިއެވެ.
އެ މަރުކަޒުން ބުނީ ދިއްދޫގެ ޤަބުރުސްޠާނުގައި ހުރި ދުވަސްވީ ހިރިގައު މަހާނަގައުތަކެއް ނަގައި، ގާފުންޏަކަށް ވާހެން އުކާލާފައިވާތަން ފެންނަ ފޮޓޯތަކެއް ސޯޝަލް މީޑިއާގައި ދައުރުވަމުންދާ ކަމަށާއި ބެލި ބެލުމުން އެނގުނު ގޮތުގައި ދިއްދޫ ޤަބުރުސްޠާނުގެ ޖާގަ ކުޑަވެގެން އެ ޤަބުރުސްޠާނުގައި ކުރިން މީހުން ވަޅުލާފައިވާ ސަރަޙައްދު އަލުން ބޭނުންކުރުމަށްޓަކާއި އެތަން ސާފުކުރުމަށް އެ ގައުތަށް ނަގާފައިވަނީ 2017 ވަނަ އަހަރުގެ ތެރޭގައި ކަމަށެވެ.
އިހުގެ މިފަދަ މަހާނާގައުތަކަކީ ހިރިގަލު ވަޑާމުގެ މަސައްކަތްތެރިކަން މަތީ ފެންވަރަކަށް ދައްކުވައިދޭ ތަކެއްޗަށް ވުމާއި، މަހާނާގަލުގައި ހުންނަ ލިޔުންތަކަކީ އެ ލިޔުންތައް ދިރާސާކޮށްގެން ދިވެހިރާއްޖޭގެ ތާރީޚަށް އައު މައުލޫމާތުތަކެއް ލިބިގެން ހިނގައިދާނެ ފަދަ ލިޔުންތަކެއް ކަމުން، ދިވެހިންގެ ތާރީޚާއި ސަގާފަތް ދެމެހެއްޓުމަށްޓަކައި މިފަދަ މަހާނަގައުތައް ރައްކާތެރިކަމާއެކު ބެލެހެއްޓުމަކީ ނުހަނު މުހިއްމު ކަމެއް ކަމަށް އެމަރުކަޒުން ދެކޭ ކަމަށްވެސް އެމަރުކަޒުގެ ފަރާތުން ބުނެއެވެ.
ދިވެހިރާއްޖޭގެ ސަގާފީ ތަރިކައިގެ ޤާނޫނުގެ 49 ވަނަ މާއްދާގެ (ހ) ގައިވާ ގޮތުގެ މަތިން މީހުން ދިރިއުޅޭ ރަށްރަށުގެ އިޚްތިޞާޞްގެ ތެރޭގައި ހިމެނޭ ސަގާފީ ތަރިކަ ރައްކާތެރިކޮށް ދެމެހެއްޓުމަކީ އެ ރަށެއްގެ ނުވަތަ ސިޓީއެއްގެ ކައުންސިލްގެ ޒިންމާގެ ތެރޭގައި ހިމެނިފައި އޮންނަ ކަމަކަށް ވާއިރު، މި މަރުކަޒުން ދެކޭ ގޮތުގައި ދިއްދޫ ޤަބުރުސްޠާނުން ނަގާފައި ހުރި ހިރިގައު މަހާނަގައުތައް ރައްކާތެރިކަމާއެކު ބެލެހެއްޓުމަށް ދިއްދޫ ކައުންސިލްގެ އެއްބާރުލުން ބޭނުންވާ ކަމަށާއި އެހެންކަމުން އެމަރުކަޒުން މިހާރު އެ މަހާނަގައުތައް ރައްކާތެރިކުރުމާއި ގުޅޭގޮތުން ދިއްދޫ ކައުންސިލާއި މަޝްވަރާ ކުރަމުންދާ ކަމަށް މަރުކަޒުން ބުންޏެވެ.
ދިވެހިރާއްޖޭގެ ހުރިހާ ސަރަޙައްދެއްގައިވެސް ހުރި މިފަދަ، ދިވެހިންގެ މަސައްކަތްތެރިކަމާއި، ތާރީޚު ފެންނަ ތަރިކަ ރައްކާތެރިކޮށް ބެލެހެއްޓުމަކީ އެމަރުކަޒާއި، ކައުންސިލްތަކާއި އަދި އާންމު ފަރުދުންގެވެސް ޤާނޫނީ ޒިންމާއަކަށްވާއިރު، މިފަދަ ތަކެތި ރައްކާތެރިކޮށް ބެލެހެއްޓުމަށް ޚާއްސަ އިސްކަމެއް ދީގެން، ތާރީޚީ ގޮތުންނާއި، އަދި ސަގާފީ ފަތުރުވެރިކަމުގެ ތެރެއިން އިޤުތިޞާދީ ގޮތުން މިތަކެތީގެ ބޭނުން ހިފޭނެ ވިސްނުންތައް އިސްކުރެއްވުމަށް އެމަރުކަޒުން ކައުންސިލްތަކާއި ފަރުދުންނަށް ވަނީ އިލްތިމާސްކޮށްފައެވެ.
