އައްޑޫއަށް ގެނައި އަސްތައް ކިހާ މޯލްޑިވްސްއަށް ގެންދިޔައީ ފަތުރުވެރިކަމުގެ ބޭނުމަށް

އައްޑޫއަށް ގެނައި އަސްތައް ކިހާ މޯލްޑިވްސްއަށް ގެންދިޔަ ނަމަވެސް، އައްޑޫއަށްވެސް އިތުރު އަސްތަކެއް ގެނައުމުގެ މަސައްކަތް ކުރަމުންދާކަމަށް އެކަމުގައި އިސްކޮށް އުޅޭ ފަރާތްތަކުން ރާއްޖެއެމްވީއަށް މައުލޫމާތު ދީފިއެވެ.

އައްޑޫއަށް އަސްތަކެއް ގެނެސްފައިވަނީ 2021 ވަނަ އަހަރުގެ ކުރީކޮޅުއެވެ. ސަދަރން ސްޓެލިއަންސްގެ ނަމުގައި ކުންފުންޏެއް ރަޖިސްޓްރީކޮށްގެން ސަރުކާރުގެ އެކި އިދާރާތަކާއި މަޝްވަރާކޮށް މިކަމަށް ބޭނުންވާ ހުއްދަތައް ނަގައިގެން އޭރު 3 އަސް ގެނެސްފައިވެއެވެ. އެގޮތުން އެކަމުގެ މައިގަނޑު އަމާޒަކީ އާންމު ރައްޔިތުންނަށް އަސްތައް ދައްކާލައި، އާންމު ރައްޔިތުންނަށް ވެސް ހުޅުވާލައިގެން މިކަމާ ގުޅޭ ޙަރަކާތްތައް ކުރިއަށް ގެންދިއުން ކަމަށާއި، އައްޑޫގެ ލޯކަލް ޓޫރިޒަމަށްވެސް ބޭނުން ކުރުމަށް ކަމަށް ސަދަރން ސްޓެލިއަންސްއިން މައުލޫމާތު ދީފައިވެއެވެ.

އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަމުން ސަދަރން ސްޓެލިއަންސްއިން ބުނީ، ކޮވިޑް-19 ގެ ޙާލަތުގެ ސަބަބުންނާއި، އެކި ދަތިތަކުގެ ސަބަބުން އައްޑޫގެ ލޯކަލް ޓޫރިޒަމަށް އަސްތައް ބޭނުން ކުރުމުގައި އަދިވެސް ގިނަ ގޮންޖެހުންތަކެއް އެބަހުރި ކަމަށެވެ. ވުމާއެކު، ވިޔަފާރި އެއްބަސްވުމެއްގެ ދަށުން ކިހާ މޯލްޑިވްސްއަށް އަސްތައް ގެންގޮސްފައިވަނީ ފަތުރުވެރިންނަށް ދައްކާލުމާއި، ފަތުރުވެރިކަމުގެ ބޭނުންތަކަށް ބޭނުން ކުރުމަށެވެ. އަދި ކިހާ މޯލްޑިވްސްގައި އަސްތައް ބަހައްޓާފައިވަނީ ކުންފުނިން ދިން ކުރެހުމުގެ މައްޗަށް ބިނާކޮށް އެކަމަށް ޚާއްސަ ސަރަޙައްދެއްވެސް ތައްޔާރުކޮށްގެންނެވެ.

އެއީ އަސްތައް ބެލެހެއްޓުމަށް އެންމެ އެކަށީގެންވާ ސަރަޙައްދެއްކަމަށް ކުންފުނިން މައުލޫމާތު ދެއެވެ.

ސަދަރން ސްޓެލިއަންސްއިން މައުލޫމާތު ދޭ ގޮތުގައި މި އަހަރުގެ އޯގަސްޓު ހިސާބުގައި އައްޑޫއަށް އިތުރު އަސްތަކެއް ގެނައުމަށް ދަނީ މަސައްކަތް ކުރަމުންނެވެ.

އައްޑޫއަށް އަސްތައް ގެނަ އިރުވެސް އަސްތައް ބެއިތިއްބުމަށް ޚާއްސަ ސަރަޙައްދެއް ތައްޔާރުކޮށް އެތަން ބޭނުން ކުރިއެވެ. 14000 އަކަފޫޓުގެ މި ތަނުގައި އަސްތައް ދުއްވަން ފަރިތަކުރާނެ ހޯރްސް ރިންގ އަކާއި، އަސްތައް ނިދާނެ ކޮށްޓާއި (ސްޓޭބަލްސް) ގެ އިތުރުން، އެސޮރުމެން ބައިތިއްބަން ޚާއްސަ ޖާގަތަކެއް (ގްރޫމިންގ އޭރިއާއެއް) ހަދާފައިވެއެވެ.

އަދި ވިނަ ކެއުމާއި، އެކި ކަންކަމަށް އަސްތައް ދޫކޮށްލާފައި ބާއްވާނެ ޚާއްސަ ސަރަޙައްދެއްވެސް ކަނޑައަޅާފައި އޮތްއިރު، ގިނަ އަދަދެއްގެ ރައްޔިތުން އަސްތައް ބަލާލުމަށް ގޮސް އުޅުނެވެ.