މޮނިޓަރިންގެ ހާލަތަށް ގެނެވޭ ރަށްތައް އިތުރުވެ، ޖުމްލަ 34ށް

ކޮވިޑް-19ގެ ހާލަތާ ގުޅިގެން މިވަގުތު 34 ރަށެއް މޮނިޓަރިންގައި އޮތްކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.

އެޗްޕީއޭއިން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު އާދިއްތަ ދުވަހު މޮނިޓަރިންގެ ހާލަތަށް ގެނައީ ބ. ތުޅާދޫއެވެ. އެންމެ ގިނަ ދުވަސްވަންދެން މޮނިޓަރިންގައި އޮތް ދެ ރަށަކީ ކ. މާފުއްޓާއި ހއ. އިހަވަންދޫއެވެ. މީގެތެރެއިން މާފުށި މޮނިޓަރިންއަށް ލާފައިވަނީ މިދިޔަ އަހަރުގެ ޑިސެމްބަރ މަހުގެ 30 ވަނަ ދުވަހުއެވެ. އަދި ހއ. އިހަވަންދޫ މޮނިޓަރިންއަށް ލާފައިވަނީ ޑިސެމްބަރ މަހުގެ 31 ވަނަ ދުވަހުއެވެ. ބާކީ ހުރި ރަށްތައް މޮނިޓަރިންއަށް ލާފައިވަނީ ހިނގަމުންދާ ޖެނުއަރީ މަހުގެ ތެރޭގައެވެ.

އެގޮތުން މިހާރު މޮނިޓަރިންގައި ހުރި ރަށްތަކަށް ބަލާއިރު ޖެނުއަރީ މަހުގެ 9 ވަނަ ދުވަހު ހދ. ނޮޅިވަރަމްފަރު މޮނިޓަރިންއަށް ލާފައިވާއިރު ޖެނުއަރީ މަހުގެ 14 ވަނަ ދުވަހު ށ. ފުނަދޫ، ބ. ދަރަވަންދޫ, ދ. ބަނޑިދޫއާއި ލ. ގަން ވަނީ މޮނިޓަރިންއަށް ގެނެސްފައެވެ. ޖެނުއަރީ މަހުގެ 16 ވަނަ ދުވަހު މޮނިޓަރިންއަށް ލާފައިވާ ރ. އުނގޫފާރާއި ގދ. ގައްދޫގެ އިތުރުން ހދ. ހަނިމާދޫ އަދިވެސް އޮތީ މޮނިޓަރިންގެ ހާލަތުގައެވެ.

ޖެނުއަރީ މަހުގެ 19 ވަނަ ދުވަހު ކ. ގުރައިދޫއާއި ބ. އޭދަފުށި ވަނީ މޮނިޓަރިންގެ ހާލަތަށް ގެނެސްފައެވެ. ޖެނުއަރީ މަހުގެ 20 ވަނަ ދުވަހު ހއ. ދިއްދޫ މޮނިޓަރިންއަށް ލީއިރު 21 ވަނަ ދުވަހު ތ. ގުރައިދޫ ވަނީ މޮނިޓަރިންގެ ހާލަތަށް ގެނެސްފައެވެ. ޖެނުއަރީ މަހުގެ 22 ވަނަ ދުވަހު 7 ރަށެއް މޮނިޓަރިންއަށް ލާފައިވެއެވެ. އެއީ ބ. ގޮއިދޫ، ޅ. ކުރެންދޫ، ހދ. ކުޅުދުއްފުށި، ލ.ދަނބިދޫ، ލ.ހިތަދޫ، ށ.ކަނޑިތީމު އަދި ވ. ކެޔޮދޫއެވެ.

23 ވަނަ ދުވަހު ނ. ކުޑަފަރި އަދި ގދ. ތިނަދޫ ވަނީ މޮނިޓަރިންއަށް ލާފައެވެ. 24 ވަނަ ދުވަހު 4 ރަށެއް މޮނިޓަރިންގެ ހާލަތަށް ގެނެސްފައިވެއެވެ. އެއީ ގދ. މަޑަވެލި، އދ. މަހިބަދޫ، ދ. ކުޑަހުވަދޫ އަދި ދ. ހުޅުދެެއްޔެވެ.

ޖެނުއަރީ މަހުގެ 25 ވަނަ ދުވަހު މޮނިޓަރިންގެ ހާލަތަށް ގެނެސްފައިވަނީ 3 ރަށެކެވެ. އެއީ ގދ. ވާދޫ، ށ. މިލަންދޫ އަދި ގއ. ކޮލަމާފުއްޓެވެ. ޖެނުއަރީ މަހުގެ 27 ވަނަ ދުވަހު ނ. މާޅެންދޫ މޮނިޓަރިންގެ ހާލަތަށް ގެނެސްފައިވާއިރު ޖެނުއަރީ މަހުގެ 28 ވަނަ ދުވަހު ބ. ކެންދޫ ވަނީ މޮނިޓަރިންގެ ހާލަތަށް ގެނެސްފައެވެ. މީގެ އިތުރުން ޖެނުއަރީ މަހުގެ 29 ރ. ކިނޮޅަސް މޮނިޓަރިންގެ ހާލަތަށް ގެނެސްފައިވެއެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތް ކުރުމަށެވެ. މޮނިޓަރިންގެ ހާލަތުގައިވާ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދާ ކަމަށާއި، ހާލަތު ރަނގަޅު ރަށްރަށް މޮނިޓަރިންއިން ނަގަމުންދާކަމަށް އެޗްޕީއޭއިން ބުނެއެވެ.

ކޮވިޑް-19ގެ ހާލަތު ގޯސްވަމުންދާ މިދަނޑިވަޅުގައި މޮނިޓަރިންގެ ހާލަތަށް ގެނެވޭ ރަތައް އިތުރުވެ، ކޭސްތައް ފެންނަ މިންވަރު ދަނީ އިތުރުވަމުންނެވެ.