އައްޑޫ ސިޓީގައި އިއުލާން ކޮށްފައިވާ މޮނިޓަރިންގެ ހާލަތު އުވާލައިފިއެވެ.

ކޮވިޑް-19ގެ ކޭސްތަކާ ގުޅިގެން އެ ސިޓީ މޮނިޓަރިންގެ ހާލަތަށް ގެނައީ އޮގަސްޓް މަހުގެ 28 ވަނަ ދުވަހުއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ އައްޑޫގައި މޮނީޓަރިންގެ ހާލަތު ދަމަހައްޓަންޖެހޭ ސަބަބެއް ނެތް ކަމަށެވެ. އައްޑޫގެ ހިތަދޫ، މަރަދޫ، މަރަދޫފޭދޫ، ފޭދޫ، ހުޅުމީދޫއަށް އަރައި ފޭބުން މަނާކޮށް އިއުލާންކޮށްފައި އޮތް މޮނިޓަރިންގެ ހާލަތު މިހާރު ނިމުމަކަށް ގެނެސްފައިވާ ކަމަށް އެޗްޕީއޭއިން ބުނެއެވެ.

މޮނިޓަރިންގެ ހާލަތު އުވާލުމާއެކު، އަޅާފައިވާ ފިޔަވަޅުތަކަށް ވެސް ވަރަށް ބޮޑެތި ލުއިތަކެއް ވަނީ ލިބިފައެވެ. އެގޮތުން ރޭގަނޑު 9:00 އިން ފެށިގެން ކުރިއަށް ގެންދިޔަ ކާފިއު ވެސް ވަނީ ނިމުމަކަށް ގެނެސްފައެވެ.

އައްޑޫގެ ކޮވިޑް-19ގެ ހާލަތަށް ބަލާއިރު، ބުދަ ދުވަހު އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް ނެގުނު 123 ސާމްޕަލްގެ ތެރެއިން 4 މީހަކު ޕޮޒިޓިވްވެފައިވެއެވެ. އެއާއެކު މިހާތަނަށް ޕޮޒިޓިވްވި ޖުމްލަ އަދަދު ވަނީ 2977ށް އަރާފައެވެ. އަދި 2921 މީހުން ބަލިން ރަނގަޅުވެފައިވެއެވެ. 44 އެކްޓިވް ކޭސް ހިމެނޭއިރު، 4 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ. މިހާތަނަށް މިބަލީގައި އައްޑޫއިން 12 މީހުން ނިޔާވެފައިވެއެވެ.