މިވަގުތު މޮނިޓަރިންގައި އޮތީ އަށް ރަށެއް!
މޮނިޓަރިންގައި އެންމެ ގިނަ ދުވަސްވީ މުލައް
ކ. ތުލުސްދޫ
ކޮވިޑް-19ގެ ހާލަތާ ގުޅިގެން މިހާރު މޮނިޓަރިންގެ ހާލަތުގައި އޮތީ 8 ރަށް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ މިވަގުތު މޮނިޓަރިންގެ ހާލަތުގައި އޮތް ރަށްތަކަކީ މ.މުލައް، ތ.ވިލުފުށި، ގދ.ވާދޫ، ކ.ތުލުސްދޫ، ހދ.ނާވައިދޫ، ދ.ހުޅުދެލި، ކ.މާފުށި އަދި ހއ.އިހަވަންދޫއެވެ. މޮނިޓަރިންގައި އެންމެ ގިނަ ދުވަސްވީ މުލަކެވެ. އެރަށް މޮނިޓަރިންގެ ހާލަތަށް ގެނެސްފައިވަނީ 20 އޮކްޓޫބަރު 2021 ގައެވެ. ބާކީ ހަތް ރަށް ވެސް މޮނިޓަރިންގެ ހާލަތަށް ގެނެސްފައިވަނީ 2021 ވަނަ އަހަރުގެ ޑިސެންބަރު މަހުގެ ތެރޭގައެވެ.
މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތް ކުރުމަށެވެ. މޮނިޓަރިންގެ ހާލަތުގައިވާ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދާ ކަމަށާއި، ހާލަތު ރަނގަޅު ރަށްރަށް މޮނިޓަރިންއިން ނަގަމުންދާ ކަމަށް އެޗްޕީއޭއިން ބުނެއެވެ.
މޮނިޓަރިންއަށް ގެނެސްފައިވާ ރަށްރަށުގެ އަދަދު މަދުވި ނަމަވެސް ބަލީގެ ނުރައްކާ އޮތުމާއެކު ޚާއްސަ ސަމާލުކަމެއް ދިނުމަށް އެޗްޕީއޭއިން އިލްތިމާސް ކުރެއެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު، މިހާތަނަށް 96،294 މީހުން ޕޮޒިޓިވްވެފައިވެއެވެ. އަދި 93،410 މީހުން ބަލިން ރަނގަޅުވެފައިވެއެވެ. މިވަގުތު އެކްޓިވް ކޭހުގެ ގޮތުގައި 2609 ކޭހެއް ގުނަމުން ދެއެވެ. 12 މީހަކަށް ހޮސްޕިޓަލުގައި އެޑްމިޓް ކޮށްގެން ގެންދަނީ ފަރުވާ ދެމުންނެވެ.
