ވެކްސިންގެ ދެ ޑޯޒާއެކު ވެސް މޮނިޓަރިންގައި އޮންނަ ރަށްރަށަށް ދަތުރުކުރާނަމަ ކަރަންޓީންގެ މުއްދަތު ފުރިހަމަ ކުރަންޖެހޭ

ވެކްސިންގެ ދެ ޑޯޒު ފުރިހަމަކުރިކަމުގައި ވިޔަސް، މޮނިޓަރިންގެ ހާލަތުގައި އޮންނަ ރަށްރަށަށް ދަތުރުކުރާނަމަ ކަރަންޓީންގެ މުއްދަތު ފުރިހަމަ ކުރަންޖެހޭނެ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

މިމަހުގެ 8 ވަނަ ދުވަހުން ފެށިގެން ކޮވިޑް-19 ވެކްސިންގެ ދެ ޑޯޒު ފުރިހަމަކޮށް 14 ދުވަސް ހަމަވެފައިވާ މީހުންނަށް ނެގެޓިވް ޕީސީއާރް ޓެސްޓާއެކު މޮނިޓަރިންގެ ހާލަތުގައި އޮންނަ ރަށްރަށަށް ކަރަންޓީންވުމަކާ ނުލައި ދަތުރުކުރެވޭ ގޮތަށް ހުޅުވާލާފައިވާކަމަށް ބުނެ ބައެއް މީޑިއާތަކުގައި ވަނީ ރިޕޯޓުކޮށްފައެވެ. އެޗްޕީއޭއާ ހަވާލާދީ ރިޕޯޓުކޮށްފައިވަނީ ދަތުރުކުރާ އުސޫލަށް ބަދަލު ގެނެސް، ރަށްރަށުގެ ކައުންސިލްތަކަށް ސާކިއުލާއެއް ފޮނުވާފައިވާ ކަމަށެވެ.

މިކަން ދޮގުކޮށް ރާއްޖެއެމްވީއަށް އެޗްއީއޯސީގެ އޮފިޝަލް ވިދާޅުވީ ވެކްސިންގެ ދެޑޯޒް ފުރިހަމަކޮށް 14 ދުވަސް ހަމަވެފައިވާނަމަ ނެގެޓިވް ޕީސީއާރް ޓެސްޓާއެކު ދަތުރުކުރެވޭނީ މޮނިޓަރިންގެ ހާލަތުގައި ނެތް ރަށްރަށަށް ކަމަށެވެ. އަދި މޮނިޓަރިންގެ ހާލަތުގައި އޮތް ރަށަކަށް ކަރަންޓީންވުމަކާ ނުލައި ދަތުރުނުކުރެވޭނެ ކަމަށް އޮފިޝަލް ވިދާޅުވިއެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތްތައް ކުރުމަށެވެ. ނަމަވެސް މި މަސައްކަތްތައްކޮށް ނިމި، ކޭސްހެއް ނުފެނި ދެތިން ހަފްތާ ވެފައިވާ ރަށްރަށް ވެސް މޮނިޓަރިންގެ ހާލަތުގައި އެބައޮތެވެ. އަދި މިއީ ގިނަ ބައެއްގެ ފާޑު ކިޔުން ވެސް އަމާޒުވެފައިވާ ކަމެކެވެ.

އެޗްޕީއޭއިން އެންމެފަހުން އާއްމުކޮށްފައިވާ ތަފާސްހިސާބުތައް ދައްކާގޮތުން މިވަގުތު މޮނިޓަރިންގެ ހާލަތުގައި 20 ރަށެއް އެބައޮތެވެ. އެއީ ގދ. ތިނަދޫ، އައްޑޫ ސިޓީ (ހިތަދޫ، މަރަދޫ، މަރަދޫ-ފޭދޫ، އަދި ފޭދޫ)، ފ. ފީއަލި، ލ. އިސްދޫ، ލ. މާވަށް، ފުވައްމުލައް ސިޓީ، ގދ. ގައްދޫ، ގއ. ގެމަނަފުށި، ގއ. ވިލިނގިލި، ލ. ކަލައިދޫ، މ. މުލަށް، ރ. އަލިފުށި، އއ. ތޮއްޑޫ، ރ. ދުވާފަރު، ނ. ވެލިދޫ، ރ. ފައިނު، ގއ. ކޫއްޑޫ، ހއ. ދިއްދޫ، ރ. މީދޫ، ކ. ގުރައިދޫ އަދި ށ. ފޯކައިދޫއެވެ.

ވެކްސިންގެ 2 ޑޯޒް ޖެހުމަށްފަހު 14 ދުވަސް ފުރިހަމަވެފައިވާނަމަ ނެގެޓިވް ޕީސީއާރް ޓެސްޓާއެކު ރަށަށް ދެވޭ ގޮތަށް ހުޅުވާލީ މާލެ ސަރަހައްދުގެ ކޮވިޑް ޕޮޒިޓިވިޓީ ރޭޓް 5 އިންސައްތައިން ދަށްވުމާ ގުޅިގެންނެވެ. މިރޭޓް ކިރިޔާ މައްޗަށް ޖެހިލާއިރަށް މިފުރުސަތު ގެއްލޭނެއެވެ.