ރައީސް އިބްރާހިމް މުހައްމަދު ސޯލިހުގެ ވައުދުފުޅާ އެއްގޮތަށް މާލެ ރައްޔިތުންނަށް ގޯތި ދިނުމަށްޓަކައި ކުރަން ޖެހޭ މަސައްކަތްތައް ކުރަމުން ގެންދާ ކަމަށާއި، އަންނަ މަހުގެ ތެރޭގައި އެކަމަށް ބޭނުންވާ އުސޫލު ކަނޑައެޅޭވަރު ވާނެ ކަމަށް ހައުސިން މިނިސްޓްރީން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ހައުސިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ, މާލޭގެ ރައްޔިތުންގެ ބޯހިޔާވަހިކަމަށް ގޯތި ދޫކުރުމަށް ރައީސް އިއުލާންކުރައްވާފައިވާ އިރު، އެ މަސައްކަތް މިނިސްޓްރީން ވަރަށް ބާރަށް ކުރައްވަމުން ގެންދަވާ ކަމަށެވެ. އަދި އެކަމާ ގުޅޭ އުސޫލުތަކާއި ގަވާއިދުތައް ހަދަމުންދާ ކަމަށާއި، ފެބްރުއަރީ މަހުގެ ތެރޭގައި އުސޫލު ކަނޑައެޅިގެންދާނެ ކަމަށެވެ.
އަކްރަމް ވިދާޅުވީ ގޯތި ދިނުމަށްޓަކައި ކުރަން ޖެހޭ މަސައްކަތް ނިމި ގޯތި ދޭނެ ތަންތަން އިއުލާން ކުރައްވާނީ ރައީސް ސޯލިހު ކަމަށެވެ.
މާލޭ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލު ހޯދައި ދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ދެއްވާފައިވަނީ 23 ރަށެއްގެ ފެނާއި ނަރުދަމާ މަޝްރޫއުތަކުގައި ސޮއިކުރުމުގެ ރަސްމިއްޔާތުގައެވެ. ރައީސް ވިދާޅުވީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަތަކަށް ހައްލު ހޯދައި ދިނުމަކީ މިސަރުކާރުން ކޮށްދޭނެ ކަމެއްކަމަށެވެ. މިހާރުވެސް މި މަސައްކަތް ކުރެވެމުންދާއިރު، ހުޅުމާލެއާއި، ގުޅީފަޅާއި، އެނޫން ތަންތަނުން ވެސް މާލޭ ރައްޔިތުންނަށް ގޯތި ލިބޭނެ ގޮތެއް ހަމަޖައްސަވައި ދެއްވާނެ ކަމުގެ ޔަގީންކަން ރައީސް ދެއްވިއެވެ.
މިހާރުވެސް ހުޅުމާލޭގައި 5،000 ހައުސިން ޔުނިޓް އެޅުމުގެ މަޝްރޫއު ކުރިއަށް އެބަދާކަމަށާއި، މާލޭގެ ރައްޔިތުންނަށް ގޯތި ދިނުމުގެ މަޝްރޫއެއް ކުރިއަށް ގެންދިއުމަށް ސަރުކާރުން ރާއްވަވާފައި އޮތް ކަމުގައި ރައީސް ވިދާޅުވިއެވެ. މާލޭގެ ރަައްޔިތުންނަށް ގޯތި ދެއްވާނީ ހަމައެކަނި ގުޅީފަޅުން ނޫން ކަމަށާއި، ހުޅުމާލެއިން ވެސް ގޯތި ދެއްވާނެ ކަމަށް ވިދާޅުވިއެވެ. އެމަނިކުފާނު ވިދާޅުވީ މިއީ 1،000 ގޯތީގެ ވާހަކައެއްނޫން ކަމަށާއި، އޭގެ ދެގުނަ ތިން ގުނަ ގޯތި އިރާދަކުރެއްވިޔާ މާލޭގެ ރައްޔިތުންނަށް ފޯރުކޮށްދެއްވާނެ ކަމަށެވެ. އެއީ ޖުމްލަ 4000 ގޯއްޗެވެ.
2021 ވަނަ އަހަރުގެ މާޗް މަހުގެ 10 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެމްބަރ އީވާ އަބްދުﷲ ވަނީ, ފާއިތުވި ހަފްތާގައި ރައީސުލްޖުމްހޫރިއްޔާ މާލޭގެ ރަށްވެހިންނަށް ގޯތިދެވޭނެ ގޮތެއް ބައްލަވާކަމަށް ވިދާޅުވެފައިވާތީ އެކަމުގެ ވިސްނުން ސަރުކާރުގައި ހުރިގޮތާއި ޓައިމްލައިނާ ގުޅޭގޮތުން ހައުސިން މިނިސްޓަރ މުހައްމަދު އަސްލަމްގެ އަރިހުން ސުވާލުކުރައްވާފައެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ, ރައީސް އިޝާރާތްކުރެއްވި މަޝްރޫއަކީ މާލޭގެ ރައްޔިތުންނަށް ގޯތި ދިނުމަށް ސަރުކާރުން ގެންގުޅޭ އެހެން ވިސްނުމެއްކަމަށެވެ. އެކަމުގައި ސަރުކާރުން ގެންގުޅޭ ވިސްނުމަކީ އިތުރު ބިމެއް މާލޭގެ ރައްޔިތުންނަށް ޚާއްސަކުރުން ކަމަށާއި ނަމަވެސް އެމަޝްރޫއު އިއުލާންކުރައްވާނީ ރައީސްކަމަށް އަސްލަމް ވިދާޅުވިއެވެ.
މިމަޝްރޫއު ކުރިޔަށް ގެންދިޔުމަށްޓަކައި ބޭނުންވާ ލޯނު ނެގުމުގެ މަސައްކަތް ސަރުކާރުން ދަނީ ކުރަމުންނެވެ. ބިން ހިއްކުމަށްޓަކައި ބޭނުންވާ ލޯނު އައިއެންޖީ ބޭންކުން ނެގުމަށް ސަރުކާރުން ދަނީ މަސައްކަތްކުރަމުންނެވެ.
