ހިޔާ ފްލެޓްތަކުން ބޮޑެތި ކުނި އުކާލަން ހަމަޖެހިފައިވާ ސަރަހައްދަށް އެފަދަ ކުނި ޖަމާކުރުމަށް އަންގައިފި
ވެމްކޯއިން ހިޔާ ފްލެޓް ސަރަހައްދުން ކުނި އުކައިދެނީ އެއްވެސް އަގަކާ ނުލާ
ހިޔާ ފްލެޓް ސަރަހައްދަށް ގިނަ އަދަދެއްގެ ކުނި ޖަމާކޮށްފައި
ހިޔާ ފްލެޓްތަކުން ބޮޑެތި ކުނި އުކާލަން ހަމަޖެހިފައިވާ ސަރަހައްދަށް ކުނި ޖަމާކުރުމަށް ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން އަންގައިފިއެވެ.
ވެމްކޯއިން ބުނީ ހުޅުމާލެ ހިޔާފްލެޓްގައި ވެމްކޯއިން ޑަސްބިން ބަހައްޓާފައިވާ ސަރަހައްދަށް ގިނައަދަދަކަށް ބަރު އަދި ބޮޑެތި ކުނި ޖަމާކޮށްފައިވާކަން ފާހަގަކުރެވިފައިވާކަމަށެވެ. އެހެންކަމުން އެގޮތަށް އެއް ތަނަކަށް ކުނި ޖަމާކުރުމުގެ ބަދަލުގައި އެފަދަ ކުނި އުކާލުމަށް ހަމަޖައްސާފައިވާ ސަރަހައްދަށް ކުނި ގެންދިޔުމަށް އެ ކޯޕަރޭޝަނުން ވަނީ އިލްތިމާސްކޮށްފައެވެ.
ވެމްކޯއިން ހިޔާ ފްލެޓް ސަރަހައްދުން ކުނި އުކައިދެމުންދަނީ ބިލް ކުރުމެއް ނެތިއެވެ. ވެމްކޯއިން ބުނީ، ދެވަނަ ފިޔަވަހީގެ އެޕާޓްމަންޓްތަކުގައި އުފެދޭ ކުނި އުކާލުމަށް އެދި ރެޖިސްޓަރީ ކުރުމަށް ވެމްކޯގެ 'ހައުސްހޯލްޑް' ކަލެކްޝަން ޚިދުމަތުގެ ފޯމުގައި ބިލް ކުރަން ފެށުމަށް މީގެ ކުރިން ނިންމާފައި ވީ ނަމަވެސް، އެ ނިންމުން މިހާރު ބަދަލު ކޮށްފައިވާ ކަމަށެވެ.
އެގޮތަށް ނިންމާފައި ވަނީ ދެވަނަ ފިޔަވަހީގައި މީހުން އާބާދުވަމުންދާ މިންވަރަށް ބަލައި، އަދި އެފަދަ ފަރާތްތަކަށް އިތުރަށް ލުއި ފަސޭހަ ކޮށްދިނުމުގެ ގޮތުން ކަމަށް ވެމްކޯއިން ބުންޏެވެ.
ކުނި ނެގުމަށް ވެމްކޯއިން ލުޔެއް ދިނުމަށް ނިންމާފައި ވާއިރު، ހިޔާ ފްލެޓުގެ ފިނިޝިންގ މަސައްކަތްތައް ނިންމުމަށް އިތުރު ތިން މަސް ދުވަސްވެސް ވަނީ ދީފައެވެ. މިއާއެކު ފްލެޓްތަކުގެ ކުލި ނުނަގާ މުއްދަތު ވެސް އެޗްޑީސީން ވަނީ އިތުރުކޮށްދީފައެވެ. އެމުއްދަތު ހަމަވާނީ މާރޗް މަހުއެވެ.
ހިޔާ ފްލެޓްތަކުގެ ކުލި ނެގުން އިތުރު ތިން މަސް ދުވަހަށް ފަސްކޮށްފައިވާކަން އިއުލާންކުރައްވާފައިވަނީ މިދިޔަ އަހަރުގެ ގައުމީ އެއްބައިވަންތަކަމުގެ ދުވަހާއި ގުޅިގެން ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.
