މާލެ ހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތް ވަރަށް ބޮޑަށް ހަލާކުވެއްޖެއެވެ.
އެއިމާރާތުގައި ފާރުތަކުގައި ވަނީ ބޭއަދަބީ ބަސްތައް ވެސް ލިޔެފައެވެ. އަދި އިމާރާތުގައި ހުރި ފާހާނާ ވެސް ވަނީ ބޭނުން ނުކުރެވޭ މިންވަރަށް ހަލާކުކޮށްލާފައެވެ. ގިނަ އަދަދަކަށް ކުނި އިމާރާތުގެ އެރޭގައި ހުރިއިރު، މަސްތުވާތަކެތި ބޭނުންކުރާ ކަމަށް ތުހުމަތު ކުރެވޭ ޒުވާނުންތަކެއް އެތަނުގައި ދަނީ ދިރިއުޅެމުންނެވެ. ދެ ފަންގިފިލާއަށް ހަދާފައި ހުރި އެއިމާރާތުގައި ގިނަ އަދަދެއްގެ ގޮދަނޑި އަޅާފައި ހުއްޓެއެވެ.
ރާއްޖެއެމްވީ އެތަނަގަށް ގޮސް ބެލިއިރު، އެތަނުގައި ބައެއް ޒުވާނުން ނިދާފައި ތިއްބެއެވެ. މީގެ އިތުރުން ކެއުމަށް ބޭނުންކުރާ އެކިބާވަތުގެ ކާ ތަކެތި ކުނިކޮށްފައި އެތާގައި ބަހައްޓާފައި ހުއްޓެވެ.
އެސަރަހައްދުގައި ދިރިއުޅޭ ބައެއް އާއްމުން ބުނީ ފްލޫ ކްލިނިކް ހިންގި އިމާރާތް ވަރަށް ބޮޑު ހަލާކުވެ، ކުނިކޮށްފައިވާ ކަމަށާއި، ރާއްޖޭގެ މީޑިއާއިން އެކަން ސަމާލުކަމަށް އައުމާއެކު ބުރާސްފަތި ދުވަހުގެ ހެނދުނުގެ ވަގުތެއްގައި އެތަނަށް ބަޔަކު ގޮސް ބަނގުރާ ހުސްކުރި ފުޅިތަކާއި، އިންޖެކްޝަނާއި، އަދިވެސް އެހެނިހެން އާލަތްތައް ނަގާ ސާފުކޮށްފައިވާ ކަމަށެވެ. އަދި ސާފުކުރީ ކޮންބައެއްކަން ނޭނގޭ ކަމަށް އެމީހުން ބުނެއެވެ.
މީގެ އިތުރުން އެމީހުން ބުނީ އެއިމާރާތުގެ ކުނި ވަސް މުޅި ސަރަޙައްދަށް ދުވާ ކަމަށާއި، އުދަނގޫ ވަރަށް ބޮޑަށް ފޯރާފައިވާ ކަމަށެވެ.
މިބިން ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި ހަވާލުކޮށް މީގެ ކުރިން ފްލޫ ކްލިނިކް ހިންގި ނަމަވެސް ފަހުން ވަނީ އެތަން ބަންދުކޮށްފައެވެ. އަދި ބަންދުކުރުމަށްފަހު އެ ބިން ސިޓީ ކައުންސިލާއި ހަވާލުކުރި ކަމެއް ނުވަތަ ނުކުރާ ކަމެއް ސާފުވެފައެއް ނުވެއެވެ. އަދި މިބިމާ ބެހޭ ގޮތުން ކަމާބެހޭ ފަރާތެއްގެ ބަހެއް އަދި މިހާތަނަށް ވަނީ ލިބޭ ގޮތް ނުވެފައެވެ.
