ފައިސާގެ ދަހިވެތިކަމުގައި ފަރުވާކުޑަކޮށް މަސައްކަތް ކުރާނަމަ މުޅި މުޖުތަމައު ނުބައި އަސަރުން ވިހަވާނެ: ޚުތުބާ

ތެދުވެރިކަމެއް ނެތި، ހަމައެކަނި ފައިސާގެ ދަހިވެތިކަމުގައި ފަރުވާކުޑަކޮށް މަސައްކަތް ކުރާނަމަ މުޅި މުޖުތަމައު ނުބައި އަސަރުން ވިހަވާނެ ކަމަށް ހުކުރު ޚުތުބާގައި ބުނެފިއެވެ.

‘އިޖްތިމާއީ މަސައްކަތުގައި ދަރިން ބައިވެރިކުރުން’ މިމައުޟޫއަށް ރާއްޖޭގެ އެކިކަންކޮޅުތަކުން އިއްވި ހުކުރު ޚުތުބާގައި ބުނީ އިސްލާމް ދީނަކީ، އަޅުކަމާއި، މަސައްކަތްތެރި ކަމުގެ ދީން ކަމަށާއި ދުނިޔެ އާއި އާޚިރަތުގެ ދީން ކަމަށެވެ. އަދި ފަރުދުންނާއި، ޖަމާއަތުގެވެސް ދީން ކަމަށެވެ. އެހެންކަމުން، ކޮންމެ މުސްލިމަކު ވެސް އަޅުކަންކުރުމާއި އެންމެހައި ދީނީ ވާޖިބުތައް އަދާކުރުމާއެކު، ދުނިޔަވީ ޙަޔާތަށްޓަކައި މަސައްކަތް ކުރަންޖެހޭ ކަމަށެވެ.

އިސްލާމް ދީނުގައި މަސައްކަތްތެރި ކަމަށް ވަރަށް ބޮޑަށް އަހައްމިއްޔަތުކަން ދީފައިވާކަން ފާހަގަކޮށް ޚުތުބާގައި ބުނީ އިސްލާމް ދީން ގޮވާލަނީ މަސައްކަތް ނުކޮށް ކަންނެތްވެފައި ނުތިބުމަށް ކަމަށެވެ. އަދި މުރާލިކަމާއި، ހީވާގިކަމާއެކު، ހުއްދަ މަސައްކަތްތައްކޮށް ރިޒުގު ހޯދައި އުޅުމަށް ދީނުގައި ބާރުއަޅާފައިވާ ކަަމަށެވެ. ނަމަވެސް މުޖްތަމައުގެ ތެރެއިން ގިނައިން ފެންނަމުން ދަނީ އެހެން މަންޒަރެއް ކަމަށާއި، ކުރާ މަސައްކަތުގައި ފަރުވާތެރިކަމެއް، ތެދުވެރިކަމެއް ނެތި، ހަމައެކަނި ފައިސާގެ ދަހިވެތިކަމުގައި، ފަރުވާކުޑަކޮށް، އެ މަސައްކަތެއް ކުރުމުގެ ސަބަބުން، ވެރިފަރާތަށް ބަރުދާސްތު ނުކުރެވޭފަދަ ބޮޑެތި ގެއްލުން ލިބެމުންދާ މަންޒަރު ކަމަށެވެ. މިއީ، ރަސޫލާ އަށް ތަބާވެގެން ތިބި މުސްލިމް މުޖްތަމައެއްގައި ހިނގައިގެންވާނެ ކަންތައްތަކެއް ނޫން ކަމަށާއި، މީގެ ސަބަބުން އެންމެންނަށް ވެސް ލިބޭނީ، ގެއްލުމާއި ހަލާކު ކަމަށް ޚުތުބާގައި ބުނެފައިވެއެވެ. އެހެންކަމުން މަކަރާއި ހީލަތްތެރިކަން ނެތި، ތެދުވެރިކަމާއެކު މަސައްކަތް ކުރުމަށް ހުކުރު ޚުތުބާގައި ގޮވާލާފައިވެއެވެ.

ޚުތުބާގައި ބުނީ މުޖްތަމައުގެ ތެރެއިން މިފަދަ ނުބައި ވިހަ އަސަރުތައް ފިލައިގެންދާނީ، މުސްލިމުންގެ ޅަދަރިންނާއި، ޒުވާނުންގެ މެދުގައި މަސައްކަތްތެރިކަމާއި، މަސައްކަތްތެރިކަމުގެ އަޚްލާގުގެ އޮށް އިންދިގެން ކަމަށާއި، އެ އޮށްތަކުން ފަޅައިގެން ހެދި ބޮޑުވަމުންދާ ގަސްތަކުން މުޅި މުޖްތަމައު ފެހިވުމަށް ފަހު، ނުބައި ވިހަ އަސަރުތައް މުޖްތަމައުގެ ތެރެއިން ފިލައިގެންދާނެ ކަމަށެވެ.

ޚުތުބާގައި ބުނީ ކުދިންނަށް މަސައްކަތް ދަސްކޮށްދީ، ޅައިރުއްސުރެ މަސައްކަތަށް ލޯބި ޖައްސުވައި، ހީވާގި ބަޔަކަށް ހަދަން ޖެހޭ ކަމަށާއި، އަމިއްލައަށް ކުރެވޭވަރުގެ އަމިއްލަ ކަންތައްތައް ކުރުމުގެ އާދަ އެކުދިންގެ ކިބައިގައި ހަރުލައްވަން ޖެހޭ ކަމަށެވެ. އަދި މުޖްތަމައުގެ މަސައްކަތުގައި ބައިވެރިވުމުގެ ރޫޙު އަށަގަންނުވަން ޖެހޭ ކަމަށެވެ. ބޭނުންތެރި ހުއްދަ އެއްވެސް މަސައްކަތެއް ކުރުމަށް ޖެހިލުންވިއަ ދީގެން ނުވާނެ ކަމަށާއި، މަސައްކަތް ކުރުމަކީ ހައްގެއް ކަމަށާއި، ޝަރަފެއް ކަމަށް ޚުތުބާގައި ބުނެފައިވެއެވެ. އަދި އެއީ ވާޖިބެއްކަން ފާހަގަކޮށް ޚުތުބާގައި ބުނީ އެއީ ކުރިއެރުމެއްކަން ދަންނަން ޖެހޭ ކަމަށެވެ.

އަމިއްލަ މަސައްކަތް ކުރުމަށް ކީރިތި ރަސޫލާ ބާރުއަޅުއްވާފައިވާކަން ފާހަގަކޮށް ޚުތުބާގައި ބުނީ އިސްލާމީ ހަޟާރަތް ކުރިއަރައިގެން ދިޔައީ މުސްލިމުން މަސައްކަތްތެރިކަމުގެ މައިދާނުގައި ހަރަކާތްތެރިވުމުގެ ނަތީޖާއެއް ގޮތުން ކަމަށެވެ. އަދި މުސްލިމުން ބިނާކުރި ކިއްލާތަކާއި ބޮޑެތި ބިނާތަކަކީ މިއަދުވެސް މަސައްކަތްތެރިކަމުގެ ނަމޫނާއެއް ކަމަށެވެ. އެހެންކަމުން މިއަދު ވެސް އެނަމޫނާއަށް ބަލައި އެއަޒުމުގައި މަސައްކަތްތެރި ބަޔަކަށްވުމަށް ޚުތުބާގައި ވަނީ ގޮވާލާފައެވެ.