ކްރިކެޓް ބޯޑް އޮފް މޯލްޑިވްސްއިން އިންތިޒާމުކޮށްގެން ކުރިއަށް ގެންދާ 15 ވަނަ ރަމަޟާން ކްރިކެޓް ކާނިވަލްގައި ބުރާސްފަތި ދުވަހު ކުޅުނު މެޗްތައް ވަންއޯވަން އާއި ލެވަރ ކާރގޯއިން ކާމިޔާބުކޮސްފިއެވެ.

ބުރާސްފަތި ދުވަހު ކުޅެފައިވަނީ މި ކާނިވަލްގެ އޯޕަންޓޭޕްބޯލް ގެ ދެ މެޗެވެ. ފުރަތަމަ މެޗްގައި އެމްއާރުޑީސީ އާއި ވާދަކޮށް ލެވަރ ކާރގޯއިން މެޗް ކާމިޔާބުކުރީ 3 ވިކެޓުންނެވެ. މެޗްގައި ފުރަތަމަ ކުޅެން އަރާފައިވަނީ އެމްއާރުޑީސީއިންނެވެ. އެޓީމުން ކުޅެންއަރާ 8 އޯވަރުގެ ތެރޭގައި 6 ކުޅުންތެރިން ނުބައިވެގެން ހެދިފައިވަނީ 101 ލަނޑެވެ. އެޓީމުން އެންމެ ރަނގަޅަށް ކުޅުނު މުހަންމަދު މަބުރޫކް ވަނީ 21 ކަނޑު ހަދާފައެވެ. ޖަވާބުގައި ލެޝާރ ކާރގޯއިން ކުޅެން އަރައި 7 ވަނަ އޯވަރުގައި 103 ލަނޑު ހަދައި މެޗް ކާމިޔާބުކުރިއެވެ. އެޓީމުން އެންމެ ރަނގަޅަށް ކުޅުނީ ހަސަން ސޯބިރާއި އިސްމާއިލް ޒާހީ އެވެ. އެގޮތުން ހަސަން ސޯބިރު 35 ލަނޑު ހަދާފައި ވާއިރު، އިސްމާއިލް ޒާހީ ވަނީ 3 ވިކެޓް ނަގާފައެވެ.

ދެވަނަ މެޗް ކޭޑީއެމް އާއި ވާދަކޮށް ވަންއޯވަންއިން މެޗް ކާމިޔާބުކުރީ 6 ވިކެޓުންނެވެ. މެޗުގައި ފުރަތަމަ ކުޅެންއަރާ ކޭޑީއެމްގައި 8 އޯވަރުގެ ތެރޭގައި 3 ކުޅުންތެރިން ނުބައިވެގެން ހެދިފައިވަނީ 89 ލަނޑެވެ. އެޓީމުން އެންމެ ރަނގަޅަށް ކުޅެފައިވަނީ އިސްހާގު އަހުމަދެވެ. އޭނާވަނީ 27 ލަނޑު ހަދާފައެވެ. ޖަވާބުގައި ވަންއޯވަންއިން ކުޅެންއަރާ އެޓީމުން ވަނީ 8 އޯވަރުގެ ތެރޭގައި 2 ކުޅުންތެރިން ނުބައިވެގެން 90 ލަނޑު ހަދާފައެވެ. އެޓީމުން އެންމެ ރަނގަޅަށް ކުޅުނު އާރިފް ރިޒާ 29 ލަނޑު ހަދާފައި ވައިރު އަހުމަދު އަމީލް މައުރޫފް ވަނީ 21 ލަނޑު ހަދާފައެވެ. އަދި އާދަމް ޒަމީލް ވަނީ މެޗުގައި 2 ވިކެޓް ނަގާފައެވެ.

ރަމަޟާން ކްރިކެޓް ކާނިވަލްގައި މާދަމާ ކުޅޭނީ ސަރުކާރު އޮފީސް ޓޭޕްބޯލްގެ ބައިގެ ދެމެޗެވެ. ފުރަތަމަ މެޗުގައި ބައްދަލުކުރާނީ އައިލެންޑް އޭވިއޭޝަން އާއި ޑީއެސްސީގެ ޓީމެވެ. ދެވަނަ މެޗުގައި ބައްދަލުކުރާނީ ސިވިލް ސާވިސް ކޮމިޝަނާއި މީރާއެވެ.