ތާލިބާނާއި ހުޅަނގާއި ދެމެދު ވާހަކަތައް ފަށައިފި

ތާލިބާނާއި ހުޅަނގާއި ދެމެދު ނޯވޭގައި ކުރިޔަށްގެންދިޔުމަށް ހަމަޖެހިފައިވާ ބައްދަލުވުން ފަށައިފިއެވެ.

އޮސްލޯގައި ތިން ދުވަހުގެ މުއްދަތަށް ކުރިޔަށްގެންދާ މިވާހަކަތަކުގައި ތާލިބާންގެ ފަރާތުން އެންމެ އިސްކޮށް ހުންނަވަނީ އަފްޣާނިސްތާންގެ ފޮރިން މިނިސްޓަރ އާމިރް ޚާން މުއްތަގީއެވެ.

އާދިއްތަ ދުވަހު މިފެށި ބައްދަލުވުމުގައި ތާލިބާނުން, އަންހެނުންގެ ހައްގުގައި ވަކާލާތުކުރާ އެކްޓިވިސްޓުންނާއި އިސްނާނީ ހައްގުތަކަށް މަސައްކަތްކުރާ، އަފްޣާނިސްތާންގައި އަދި އެގައުމުން ބޭރުގައި ދިރިއުޅޭ އަފްޣާން މީހުންނާއެކު ސިއްރު ބައްދަލުވުންތަކެއް ބާއްވާނެއެވެ.

ބައްދަލުވުމުގައި އެންމެ ބޮޑު މަގްސަދަކީ އިންސާނީ ހައްގުތައް ކަށަވަރުކުރުމެވެ. އޭގެބަދަލެއްގެ ގޮތުގައި ތާލިބާނުން ވަކާލާތުކުރަމުން ގެންދާނީ އިންސާނީ އެހީތެރިކަމާއި ގަނޑުކޮށްފައިވާ އަފްޣާނިސްތާނާއި އެޖަމާއަތުގެ އެތައް ބިލިއަން ޑޮލަރެއް ހޯދުމަށެވެ. ތާލިބާންގެ 10 ބިލިއަން ޑޮލަރު މިހާރުވެސް އެމެރިކާއިން ވަނީ ގަނޑުކޮށްފައެވެ.

ފޮރިން މިނިސްޓަރ މުއްތަގީ މަސައްކަތްކުރައްވާނީ އޭގެތެރެއިން ބައެއް ހޯއްދެވުމަށެވެ. އަދި އެފައިސާ ސިވިލް ސަރވަންޓުންގެ މުސާރައަށާއި ކާނާއަށް ޚަރަދުކުރައްވާނެކަމަށް އަލްޖަޒީރާއިން ވަނީ ރިޕޯޓްކޮށްފައެވެ. އަނެއްކޮޅުން ތާލިބާނުން އަފްޣާނިސްތާނުގެ ވެރިކަމަށް އަންނަމުން ވައުދުވި ފަދައިން އިންސާނީ ހައްގުތަކާއި އަންހެނުންނާއި އަންހެން ކުދިންނަށް ތައުލީމުގެ ފުރުސަތު ފޯރުކޮށްދޭކަން ކަށަވަރުކުރުމަކީވެސް މިބައްދަލުވުމުގެ މަގްސަދެކެވެ.

ވެރިކަމަށް އައުމަށްފަހު ތާލިބާނުން ޔޫރަޕަށް ކުރާ ފުރަތަމަ ދަތުރުގައި އެމެރިކާ، ޖަރމަނީ، އިނގިރޭސިވިލާތް، ފްރާންސް، އިޓަލީ އަދި ޔޫރަޕިއަން ޔޫނިއަން (އީޔޫ)ން ޚާއްސަ މަންދޫބުންނާ ބައްދަލުކުރާނެއެވެ.

އަފްޣާން ސަރުކާރުގެ ޑެޕިިޔުޓީ ކަލްޗަރ އެންޑް ކޮމިޔުނިކޭޝަން މިނިސްޓަރ އަދި ތާލިބާނުގެ ސްޕޯކްސްމަން ޒަބީހުﷲ މުޖާހިދު ވިދާޅުވީ ދެ ފަރާތުން ބޭނުންވާ ކަންތައްތަކެއްގައި ވާހަކަދެއްކުމަށް އެމެރިކާ އާއި ޔޫރަޕިއަން ޔޫނިއަންއާއެކު ބައްދަލުވުންތައް ކުރިޔަށްދާނެކަމަށެވެ. އަދި އެމީހުންގެ ޚިޔާލުތަކާއި ރޭވުންތައް ހުރިގޮތާއި ތާލިބާންގެ ޚިޔާލު ހުރިގޮތާމެދު މަޝްވަރާކުރެވި ގޮތްތަކެއް ނިންމުމަށް މަސައްކަތްކުރެވެމުންދާނެކަމަށް ޒަބީހުﷲ ވިދާޅުވިއެވެ.

މިހާތަނަށް އައިއިރު ދުނިޔޭގެ އެއްވެސް ގައުމަކުން ތާލިބާން ސަރުކާރު ބަލައިގަނެފައިނުވާއިރު ތާލިބާނަށް އަންނަނީ އަފްޣާނިސްތާންގައި ވެރިކަންކުރުމަށް ދަތިތަކާއި ކުރިމަތިވަމުންނެވެ.