މާޒިޔާ ބަލިކޮށް ޗެމްޕިއަންކަން ވެލެންސިއާއަށް

ވަރުގަދަ މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް މި ސީޒަނުގެ ޕްރެޒިޑެންޓްސް ކަޕުގެ ޗެމްޕިއަންކަން ކުލަބު ވެލެންސިއާއިން ހޯދައިފިއެވެ.

އާދީއްތަ ދުވަހުގެ ހަވީރު ރ. އަލިފުށީ ޓާފް ދަނޑުގައި ކުޅުނު ފައިނަލް މެޗުން ވެލެންސިއާ މޮޅުވީ 2-1 ގެ ނަތީޖާއަކުންނެވެ.

މި މެޗުގެ ވަރަށް ކުރީކޮޅު ވެލެންސިއާއިން ވަނީ ލަނޑު ޖަހައި ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި އަބްދުﷲ މިދުހަތު ފަޙްމީ (ބިޗަޑް) ނަގައިދިން ކޯނަރަކުން މި ލަނޑު ވެލެންސިއާއަށް ކާމިޔާބުކޮށްދިނީ ބިދޭސީ ޑިފެންޑަރު ޑަކްސަން ޕުސްލަސްއެވެ. ވެލެންސިއާގެ މި ލަނޑާއެކު މާޒިޔާއިން ކުރިއަށް ޖެހި ކުޅުން ރަނގަޅުކުރިއިރު، މެޗުގެ 40 ވަނަ މިނެޓުގައި އިބްރާހީމް އައިސަމް ނަގައިދިން ކޯނަރަކުން އެ ޓީމުގެ ކެޕްޓަން މުޙައްމަދު އިރުފާން (އިރޭ) ވަނީ ލަނޑެއް ޖަހައި، މާޒިޔާއަށް ނަތީޖާ އެއްވަރުކޮށްދީފައެވެ.

މި މެޗުގެ ދެވަނަ ހާފުގައި މާޒިޔާގެ ބިދޭސީ ފޯވާޑް ކޮނޭލިއަސް ސްޓެވާޓާއި، އިބްރާހީމް ވަހީދު ހަސަން (އިއްބެ) އަށް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ. އަދި މި ހާފުގައި ވެލެންސިއާއިން ކެޕްޓަން އަލީ ފާސިރު (ސެންޓޭ) ފޮނުވާލި ހިލޭ ޖެހުމެއް މާޒޮޔާގެ ގޯލްކީޕަރު ކިރަން ކުމާރް ލިމްބޫ ވަނީ ދިފާއުކޮށްފައެވެ.

މި މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 ގެ ނަތީޖާއަކުން އެއްވަރު ވެފައިވުމުން އިތުރު ވަގުތުގެ ދެ ހާފު ވަނީ ކުޅެފައެވެ. މީގެ ތެރެއިން ފުރަތަމަ ހާފުގައި މާޒިޔާއަށް މައްސަލަތަކެއް ދިމާއީ އެ ޓީމުގެ ނާއިޒް ހަސަން (ދާދު) އަށް ސީދާ ރަތް ކާޑެއް ދެއްކުމުންނެވެ. ރެފުރީ އޭނާއަށް ރަތް ކާޑެއް ދެއްކީ ވެލެންސިއާގެ ކެޕްޓަން އަލީ ފާސިރު (ސެންޓޭ) އަށް ކުރި ނުރައްކާތެރި ފައުލަކާ ގުޅިގެންނެވެ. އެއާއެކު މި މެޗުގައި ވެލެންސިއާއިން އަލުން ލީޑު ނަގާފައިވަނީ އިތުރު ވަގުތުގެ ފުރަތަމަ ހާފު ނިމެން މިނެޓަކަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ބިދޭސީ ފޯވާޑް ބޯހަސް މާޓިންއެވެ.

މި މޮޅާއެކު މި ސީޒަނުގެ ޕްރެޒިޑެންޓްސް ކަޕް ވެލެންސިއާއިން ކާމިޔާބުކުރި، މިއީ 2008 ވަނަ އަހަރުގެ ފަހުން ވެލެންސިއާއިން މި މުބާރާތް ކާމިޔާބުކުރި ފުރަތަމަ ފަހަރެވެ. މީގެ ކުރިން ވެލެންސިއާއިން ވަނީ 1993، 1994، 1998 އަދި 1999 ވަނަ އަހަރު މި މުބާރާތް ކާމިޔާބުކޮށްފައެވެ.

މީގެ އިތުރުން މި ފަހަރުގެ މުބާރާތް ވެލެންސިއާއިން ކާމިޔާބުކުރީ އެއްވެސް މެޗަކުން ބަލިނުވެއެވެ. މި ސީޒަނުގައި މިހާތަނަށް ވެލެންސިއާ ހަމައެކަނި ބަލިވެފައި ވަނީ ޗެރިޓީ ޝީލްޑް މެޗުގައި މާޒިޔާ އަތުން އެކަންޏެވެ. އެ މެޗު މާޒިޔާއިން ކާމިޔާބުކުރީ 5-0 ގެ ތަފާތު ބޮޑު ނަތީޖާއަކުންނެވެ.