ކުލަބު އީގަލްސްގެ ކޯޗުގެ މަގާމުން މަޝްހޫރު ކޯޗު މުޙައްމަދު ޝާޒްލީ (ޝާޒް) އިސްތިއުފާދިނުމަށް ނިންމައިފިއެވެ.
ޝާޒްލީ ވަނީ އީގަލްސްގެ ކޯޗުގެ މަގާމުން އިސްތިއުފާދޭން ނިންމާފައިވާކަން "ރާއްޖެ.އެމްވީ" އަށް ކަށަވަރުކޮށްދީފައެވެ. ފުޓްބޯޅައިގެ އެންމެ މަތީ ކޯޗިން ލައިސަންސް ކަމަށްވާ އޭއެފްސީ ޕްރޯ ލައިސަންސް ހާސިލުކޮށްފައިވާ ޝާޒްލީ އީގަލްސްގެ ކޯޗުގެ މަގާމުން ވަކިވިއިރު، އޭނާ އެ ޓީމާ ހަވާލުވީ މިދިޔަ އަހަރުގެ ޖެނުއަރީ މަހުގެ 31 ވަނަ ދުވަހެވެ.
މިދިޔަ ސީޒަނުގެ މެދުތެރެއިން ޝާޒްލީ އީގަލްސްއާ ހަވާލުވިއިރު، މިދިޔަ ސީޒަނުގައި ޝާޒްލީގެ ކޯޗުކަމުގައި އީގަލްސްއިން ވަނީ އޭއެފްސީ ކަޕުގެ ކޮލިފައިންގައި ވާދަކޮށްފައެވެ. އެ ފަހަރުގެ ކޮލިފައިންގެ ޕްރިލިމިނަރީ ފުރަތަމަ ބުރުގައި ބޫޓާނުގެ ތިމްޕޫ ސިޓީ އަތުން އީގަލްސް މޮޅުވި ނަމަވެސް، ޕްލޭއޮފް ބުރުން އިންޑިއާގެ ބެންގަލޫރު އެފްސީ އަތުން އީގަލްސް ވަނީ ބަލިވެފައެވެ.
މިދިޔަ ސީޒަނުގެ ދިރާގު ދިވެހި ޕްރިމިއާ ލީގު ތާވަލުގެ ހަތަރުވަނައިގައި އޮވެގެން އީގަލްސްއިން ނިންމާލިއިރު، މި ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕުގެ ހަތް މެޗުގައިވެސް އީގަލްސްއަށް އިރުޝާދުދިނީ ޝާޒްލީއެވެ. މި ފަހަރުގެ ޕްރެޒިޑެންޓްސް ކަޕުގެ ފަސްވަނަ އީގަލްސްއަށް ލިބުނުއިރު، ކުޅުނު ހަތް މެޗުގެ ތެރެއިން އެ ޓީމު މޮޅުވެފައިވަނީ ތިން މެޗުންނެވެ.
އީގަލްސްގެ ކޯޗުގެ މަގާމުން ޝާޒްލީ ވަކިވިއިރު، އީގަލްސްގެ ކުރިން އޭނާ އިރުޝާދު ދީފައިވަނީ ޓީސީ ސްޕޯޓްސް ކުލަބަށެވެ.
