ނައިފަރު އިޚްތިސާސްގެ ތެރޭގައި ވޭވަށް ހިމަނައިދިނުމަށް އެދިއްޖެ
އެރަށް ރައްޔިތުން ދަތުރުދިއުމަށް ހުޅުވާލަން ވަނީ ޕްލޭންކޮށްފައި
ޅ. ނައިފަރު
ޅ. އަތޮޅު ވޭވަށް ނައިފަރުގެ އިޚްތިސާސްގެ ތެރެއަށް އިތުރުކޮށް, ނައިފަރު ކައުންސިލާ ހަވާލުކޮށްދިނުމަށް އެދި ސަރުކާރަށް ގަރާރެއް ހުށަހަޅައިފިއެވެ.
މި ގަރާރަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން, ދިވެހިރާއްޖޭގެ ބިމާބެހޭ ގާނޫނާއި އެހެނިހެން ގާނޫނުތަކާ އެއްގޮތްވާ ގޮތުގެމަތިން, އިގުތިސާދީ ނުވަތަ އިޖްތިމާއީ ބޭނުންތަކަށް ކައުންސިލްގެ ނަމުގައި ބިންބިމާއި ފަރާއި ފަޅު ހޯދުމާއި މިލްކުކުރުމާއި އަދި މިފަދަ ތަންތަން އެހެން ފަރާތްތަކަށް ކުއްޔަށްދޫކުރުމާއި އަދި މިފަދަ ތަންތަނުގައި އިންވެސްޓްކުރުމާއި މިފަދަ އިންވެސްޓްމަންޓްތައް ކައުންސިލްގެ ނަމުގައި މިލްކުކުރުމުގެ މަސްއޫލިއްޔަތާއި ބާރުގެ ދަށުން ފާސްކޮށްފައިވާ ގަރާރެކެވެ.
މި ގަރާރުގައި ވާގޮތުން, ނައިފަރަކީ އާބާދީ ބޮޑު ރަށަކަށްވެފައި ބިމުގެ ދަތިކަން އޮތް ރަށަކަށްވުމުން ރަށުގެ ރައްޔިތުންނަށް އިގުތިސާދީ މަސައްކަތްތައްކުރުމަށް ދަތިތަކެއް އޮތްރަށެއްކަން ވަނީ ފާހަގަކޮށްފައެވެ. ރަށުގެ ރައްޔިތުންނަށް ހިތްފަސޭހަކޮށްލައި މޫދަށް އެރިލައި އުޅެވޭފަދަ ބީޗެއް ނެތްކަމަށާއި، އަދި ކައުންސިލްގެ އާމްދަނީ އިތުރުކުރުމަށް ގޮންޖެހުންތަކަކާ ކުރިމަތިލާންޖެހިފައިވާކަން ފާހަގަކޮށްފައިވެއެވެ.
އެހެންކަމުން މި ކަންކަމަށް ހައްލު ހޯދުމަށްޓަކައި ޅ. ނައިފަރުގެ ދެކުނުން އޮންނަ ފަޅުރަށެއްކަމުގައިވާ ޅ. ވޭވަށް, ނައިފަރު ކައުންސިލްގެ އިޚްތިސާސްގެ ތެރެއަށް އިތުރުކޮށް ނައިފަރު ކައުންސިލަށް އާމްދަނީ އިތުރުކުރެވޭނެގޮތަށް ނައިފަރު ކައުންސިލާ ހަވާލުކޮށްދެއްވުމަށް ވަނީ އެދިފައެވެ. އަދި މި މައްސަލަ ރައްޔިތުންގެ މަޖިލީހުގެ ސަމާލުކަމަށް ގެނެސް، މިކަމުގައި އަވަސް ހައްލެއް ހޯއްދަވައި ދެއްވުމަށް އެ ދާއިރާގެ މެމްބަރު އަހުމަދު ޝިޔާމަށް ވަނީ ގޮވާލާފައެވެ.
ނައިފަރު ކައުންސިލުން ހުށަހެޅި ގަރާރުގައި ވަނީ, ވޭވަށަކީ މިވަގުތު ބެލެހެއްޓެމުންނުދާ ހަލާކުވެ ފަނާވަމުންދާ ރަށެއް ކަމަށާއި, އިހުމާލުގެ ސަބަބުން ރަށުގެ ފެހިކަންވެސް ނެތިގެންދާ ކަމަށާއި، ކައުންސިލާއި ހަވާލުކޮށްފިނަމަ އެރަށް އެންމެ އެދެވޭގޮތެއްގައި ބެލެހެއްޓި, އިހުމާލުގެ ސަބަބުން ލިބެމުންދާ ގެއްލުންތަކަށް ހައްލު ލިބިގެންދާނެ ކަމަށެވެ.
މީގެ އިތުރުން ނައިފަރަކީ އާބާދީ ބޮޑު ރަށަކަށްވެފައި ބިމުގެ ދަތިކަންވެސް އޮތް ރަށަކަށްވާއިރު، އިގުތިސާދީ މަސައްކަތްތައް ފެށުމުގެ ވިސްނުންހުރި ފަރާތްތަކަށް، އެމަސައްކަތްތަކަށް ބިން ދޫކުރެވޭނެ ގޮތަށް ނައިފަރު ކައުންސިލްގެ އިޚްތިސާސްގެ ތެރެއަށް ޅ. ވޭވަށް އިތުރުކުރެވި ނައިފަރު ކައުންސިލާ ހަވާލުކޮށްފިނަމަ ކައުންސިލްގެ އާމްދަނީ އިތުރުވެގެންދާނެ ކަމަށް ގަރާރުގައި ބުނެފައިވެއެވެ. އަދި ނައިފަރުގެ ތަރައްގީއަށް ކުރެވޭ މަސައްކަތްތައް އިތުރުވެ، ރަށާއި ރައްޔިތުންގެ ކުރިއެރުމަށް ކުރެވޭ މަސައްކަތްތައް އިތުރުވެގެންދާނެ ކަމަށް ވެސް ގަރާރުގައި ވަނީ ބުނެފައެވެ.
އަދި ވޭވަށް ނައިފަރު ކައުންސިލާ ހަވާލުކޮށްފިނަމަ ނައިފަރާއި އެއަތޮޅުގެ ރައްޔިތުންނަށްވެސް މޫދަށް އެރި އުޅެވޭފަދަ ގޮތަކަށް ރަށްތަރައްގީ ވެގެންދާނެ ކަމަށް ބުނެފައިވެއެވެ. ނައިފަރަކީ ޗުއްޓީ ހޭދަކޮށްލުމަށް ގިނަ ފަރާތްތަކެއް އަރައި ފައިބަމުންދާ މަންޒިލެއް ކަމަށާއި، ޅ. ވޭވަށް ނައިފަރު ކައުންސިލުގެ ބެލުމުގެ ދަށަށް ގެނެވިއްޖެނަމަ ރަށާއި ރަށުގެ ފަޅު ބެލެހެއްޓިގެންދާނެ ކަމަށާއި، މިހާރު ލިބެމުންދާ ގެއްލުންތައް ކުޑަކުރެވި, ޅ. ވޭވަށަކީ ޅ. އަތޮޅާއި އަތޮޅުން ބޭރުގެ ރައްޔިތުންނަށްވެސް ހިތްހަމަޖައްސާލުމަށް ބޭނުންކުރެވޭ މަންޒިލަކަށް ބަދަލުކުރެވިގެންދާނެ ކަމަށް ނައިފަރު ކައުންސިލުން ސަރުކާރަށް ހުށަހެޅި ގަރާރުގައި ބުނެފައިވެއެވެ.
