ޚާއްްސައެހީއަށް ބޭނުންވާ ކުދިންނަށް ހަޖޫ ޖަހާ މަލާމަތް ކުރުން ބަލައިނުގަނެވޭނެ - ޖެންޑަރ މިނިސްޓަރ
20 ޖެނުއަރީ 2022 | ބުރާސްފަތި 04:19ކައުންސިލް ބައްދަލުވުމުގައިސަރުކާރަށް ފާޑުކިޔައި މެމްބަރުން ވާހަކަދެއްކެވި
އައިޝަތު މުހައްމަދު ދީދީ - ޖެންޑަރ މިނިސްޓަރ
ސިޓީ ކައުންސިލް ޖަލްސާގައި ހާއްްސައެހީއަށް ބޭނުންވާ ކުދިންނަށް ހަޖޫ ޖަހާ މަލާމަތް ކުރުން އެއީ ބަލައިގަނެވޭނެ ކަމެއް ނޫން ކަމަށް ޖެންޑަރ މިނިސްޓަރ އައިޝަތު މުހައްމަދު ދީދީ ވިދާޅުވެއްޖެއެވެ.
ޖެންޑަރ މިނިސްޓަރ މިހެން ވިދާޅުވީ، ބުދަ ދުވަހު އޮތް މާލެ ސިޓީ ކައުންސިލް ބައްދަލުވުމުގައި މެދު ހެންވޭރު ދާއިރާގެ ޕީޕީއެމް މެމްބަރު އާދަމް ރަމީޒް، ޕްލޭނިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީން އާއި މުޚާތަބުކޮށް އޯޓިސްޓިކް މީހެއްކަމަށް ވިދާޅުވުމާއި ގުޅިގެންނެވެ.
ޖެންޑަރ މިނިސްޓްރީން ބުނެފައިވަނީ، ނުކުޅެދުންތެރިކަން ހުންނަ ފަރާތްތަކާއި މުޚާތަބުކޮށް ދަށު ދަރަޖައިގެ ބަސްތަކެއް މާލެ ސިޓީ ކައުންސިލްގެ މެމްބަރަކު، ކައުންސިލްގެ ރަސްމީ ޖަލްސާއެއްގައި ވިދާޅުވެފައިވުމަކީ ބަލައިގަނެވޭނެ ކަމެއް ނޫން ކަމަށެވެ.
ރަމީޒްގެ މި ވާހަކަތައް ކުށްވެރިކޮށް ޖެންޑަރ މިނިސްޓްރިން ބުނެފައިވަނީ، މާލޭ ސިޓީ ކައުންސިލްގެ މެމްބަރުގެ މިއަމަލަކީ ޤާނޫނު އަސާސީގެ 35 ވަނަ މާއްދާގެ (ށ)ގައި ބަޔާންކޮށްފައިވާ، އާއިލާގެ ފަރާތުންނާއި، ޖަމާއަތުގެ ފަރާތުންނާއި، ދައުލަތުގެ ފަރާތުން ޚާއްސަ އެހީތެރިކަމާއި ރައްކާތެރިކަން އުމުރުން ދުވަސްވީ މީހުންނާއި، ޚާއްސައެހީއަށް ބޭނުންވާ މީހުންނަށް ލިބެންޖެހޭ ހައްގު ގެއްލިގެން ދިޔަ އަމަލެއްކަމަށެވެ. އަދި ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނުގެ 22 ވަނަ މާއްދާގެ (ރ)ގައި ނުކުޅެދުންތެރިކަން ހުންނަ މީހުން މަގުމަތީގައި އުޅޭ ވަގުތުތަކުގައާއި، އެހެނިހެން ވަގުތުތަކުގައިވެސް އެމީހުންނާއި ދިމާކުރުމާއި، ފޮށުމާއި، މަލާމާތްކުރުމާއި ފުރައްސާރަކުރުމަކީ މަނާކަމެއްކަމުގައި ބަޔާންކޮށްފައިވާ މާއްދާއަށް ފެތޭ އަމަލެއްކަމަށްވެސް ޖެންޑަރ މިނިސްޓްރީން ބުނެއެވެ. އެހެންކަމުން މިފަދައިން އަމަލުތައް ނުކުރުމަށް މިނިސްޓްރީއިން ވަނީ އިލްތިމާސްކޮށްފައެވެ.
ބުދަ ދުވަހު ކުރިއަށްގެންދިޔަ މާލެ ސިޓީ ކައުންސިލް ބައްދަލުވުމުގައިސަރުކާރަށް ފާޑުކިޔައި މެމްބަރުން ވާހަކަދެއްކެވިއެވެ. މިބައްދަލުވުމުގައި ވާހަކަ ދައްކަވަމުން ރަމީޒު ވިދާޅުވީ މާލެ ސިޓީ ކައުންސިލަށް އެއްވެސް ކަމެއް ވިޔަ ނުދޭން އެންމެ ބޮޑަށް މަސައްކަތް ކުރަމުންދަނީ އަކްރަމް ކަމާލުއްދީންކަމަށެވެ. އަދި އޭނާއަކީ "އޯޓިސްޓިކް" މީހެއްކަމަށް ވިދާޅުވެ ރަމީޒު ވަނީ ވާހަކަ ދައްކަވާފައެވެ. މިކަމާ ގުޅިގެން ގިނަ ބައެއްގެ ފާޑު ކިޔުން އޭނާއަށް އަމާޒުވެފައިވެއެވެ.
