ގްރީން ބަލިވުމުން ވެލެންސިއާ ފައިނަލަށް

ޕްރެޒިޑެންޓްސް ކަޕުގައި ކުލަބު އީގަލްސް އަތުން ކުލަބު ގްރީން ސްޓްރީޓްސް ބަލިވުމާއެކު، ތާވަލުގެ އެއްވަނައިގައި އޮތް ކުލަބު ވެލެންސިއާއަށް ފައިނަލުގެ ޖާގައެއް ކަށަވަރުވެއްޖެއެވެ.

ގައުމީ ފުޓްބޯޅަ ދަނޑުގައި ބުދަ ދުވަހުގެ ހަވީރު ކުޅުނު މެޗުން އީގަލްސް އަތުން ގްރީން ބަލިވީ 4-1 ގެ ނަތީޖާއަކުންނެވެ. ލީގު ބުރުގެ އެންމެ މޮޅު ދެ ޓީމު ފައިނަލަށް ދަތުރުކުރާއިރު، ވެލެންސިއާއަށް ވަނީ ބުދަ ދުވަހުގެރޭ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅޭ މެޗުގެ ކުރިން ފައިނަލުގެ ޖާގައެއް ކަށަވަރުވެފައެވެ. މިއީ 2008 ވަނަ އަހަރުގެ ފަހުން ވެލެންސިއާއިން ޕްރެޒިޑެންޓްސް ކަޕުގެ ފައިނަލުގައި ކުޅޭނެ ފުރަތަމަ ފަހަރެވެ.

ބުދަ ދުވަހުގެ ހަވީރު ކުޅުނު މެޗު ފަށައިގެން އީގަލްސްއިން ވަނީ ގްރީންގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ ފުރަތަމަ މިނެޓުގައި އީގަލްސްގެ އިމްރާން ނަޝީދު (އިންމަ) އަށް ރަނގަޅު ފުރުސަތެއް ލިބުނު ނަމަވެސް، ގްރީންގެ ގޯލްކީޕަރު ހަނީފް ސާގިބް ކައިރިން ނައްޓާލުމަށްފަހު އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އެކަމަކު މެޗުގެ 18 ވަނަ މިނެޓުގައި އީގަލްސްއިން ވަނީ ލަނޑު ޖަހައި، ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހަސަން ރާއިފް އަޙްމަދު (ހަންނަ) އެވެ.

މި މެޗުގައި އީގަލްސްއިން ލީޑު ނެގުމާއެކު ގްރީނުން އެ ޓީމުގެ އެޓޭކުތައް ވަރުގަދަކުރިއިރު، އެ ޓީމުގެ ސްޕެއިން މިޑްފީލްޑަރު އެންހެލް ކަރަސްކޯސާ މުނޯޒް އާއި، އަލީ ޝާމިސް (ތޮއްޕެ) ވަނީ އަށް ލަނޑެއް ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. އެކަމަކު ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ގްރީނުން ވަނީ ލަނޑު ޖަހައި، ނަތީޖާ ހަމަހަމަކޮށްފައެވެ. އަބްދުﷲ ޔާމީން (ޔާނު) ގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ އަންޞަރު އިބްރާހީމް (އަންކޮ) އެވެ.

މި މެޗުގެ ދެވަނަ ހާފު ފަށައިގެން ގްރީންގެ ބިދޭސީ ފޯވާޑް މުނޯޒް ފޮނުވާލި ބާރު ހަމަލާ އީގަލްސްގެ ގޯލްކީޕަރު މުޙައްމަދު ތޯހާ ވަނީ ހުށިޔާރުކަމާއެކު ދިފާއުކުރިއިރު، މި ހާފުގައި ގްރީންއަށް މައްސަލަތަކެއް ދިމާވީ އެ ޓީމުގެ އިތުބާރު ޑިފެންޑަރު މުޙައްމަދު ސާއިފަށް އަނިޔާވެ އޭނާ ބަދަލުކުރަން ޖެހުމުންނެވެ. ނަތީޖާއެއްގެ ގޮތުން އީގަލްސްއިން ވަނީ މެޗުގެ 57 ވަނަ މިނެޓުގައި އަލުން ލީޑު ނަގާފައެވެ. މިއީ ގްރީންގެ އިބްރާހިމް ހަސީބު އަތުން ބައިކޮޅަށް ވަން ލަނޑެކެވެ.

އަދި އޭގެ ފަހުން މެޗުގެ 66 ވަނަ މިނެޓުގައި ހަންނަ ވަނީ އިތުރު ލަނޑެއް ޖަހައި، އީގަލްސްއަށް ލީޑު ފުޅާކޮށްދީފައެވެ. ދެން މި މެޗުގައި އީގަލްސްއިން ކާމިޔާބުކުރި ހަތަރުވަނަ ލަނޑު މެޗުގެ 79 ވަނަ މިނެޓުގައި އަޙްމަދު ހަސަން (އައްމަޑޭ) ދިން ބޯޅައަކުން ކާމިޔާބުކޮށްދިނީ އަޙްމަދު ރިޒުވާން (ރިޒޭ) އެވެ.

މި ނަތީޖާއާއެކު މި ވަގުތު ލީގު ތާވަލުގެ އެއްވަނައިގައި ވެލެންސިއާ އޮތީ ކުޅުނު ހަ މެޗުން ލިބުނު 16 ޕޮއިންޓާއެކުއެވެ. ދެވަނައިގައި އޮތް މާޒިޔާ އާއި ތިންވަނައިގައި އޮތް ގްރީނަށް 15 ޕޮއިންޓް ލިބިފައިވާއިރު، މާޒިޔާއަށް ކުރި ލިބެނީ ލަނޑުގެ ތަފާތުންނެވެ. މި ނަތީޖާއާއެކު ގްރީންއަށް ފައިނަލުގެ ޖާގައެއް ލިބެން އޮތީ ބުދަ ދުވަހުގެރޭ ކުޅޭ މެޗުން ވެލެންސިއާއިން މާޒިޔާ ތިން ލަނޑުގެ ތަފާތުން ބަލިކޮށްފިނަމައެވެ.