އިޓާލިއަން ކަޕުގެ ގަދަ 16 ގައި އަންގާރަ ދުވަހުގެރޭ ކުޅުނު މެޗުން ސަމްޕްޑޯރިއާ ބަލިކޮށް ކުއާޓާ ފައިނަލުގެ ޖާގައެއް އެންމެ ފަހުގެ ޗެމްޕިއަން ޔުވެންޓަސްއިން ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ ސަމްޕްޑޯރިއާ އަތުން 4-1 ގެ ނަތީޖާއަކުންނެވެ.

މި މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 25 ވަނަ މިނެޓުގައި ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ހުއާން ކުއަޑްރާޑޯއެވެ. އޭގެ ފަހުން ފުރަތަމަ ހާފުގައި އަލްވާރޯ މޮރާޓާ ޔުވެންޓަސްއަށް އިތުރު ލަނޑެއް ޖަހައިދިން ނަމަވެސް، އޭގެ ކުރިން އެ ޓީމުގެ އޭޑްރިއަން ރަބިއޯ ކުރި ފައުލަކާ ގުޅިގެން ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު، އެ ލަނޑު ބަލައިގެންފައެއް ނުވެއެވެ.

އެކަމަކު މެޗުގެ ދެވަނަ ހާފު ފަށައިގެން ހަތްވަނަ މިނެޓުގައި ޔުވެންޓަސްއިން ވަނީ ލީޑު ފުޅާކޮށްފައެވެ. އާތޫރް މެލޯ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑެނިއެލް ރުގާނީއެވެ. އޭގެ ފަހުން މެޗުގެ 63 ވަނަ މިނެޓުގައި އަންދްރެއާ ކޯންޓީ ސަމްޕްޑޯރިއާއަށް ފަރަގު ކުޑަކޮށްދިން ނަމަވެސް، އޭގެ ހަތަރު މިނެޓު ފަހުން ޕައުލޯ ޑިބާލާ ވަނީ އަނެއްކާވެސް ޔުވެންޓަސްގެ ލީޑު ފުޅާކޮށްދީފައެވެ.

ދެން މި މެޗުގައި ޔުވެންޓަސްއިން ޖެހި ހަތަރުވަނަ ލަނޑު މެޗުގެ 77 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ މޮރާޓާއެވެ. މިއީ އޭރިއާ ތެރެއިން ޔުވެންޓަސްގެ މާލޭ އަކޭއަށް ސަމްޕްޑޯރިއާގެ ޓޮމާސޯ އައުހޭލޯ ކުރި ފަައުލަކަށް ރެފުރީ ދިން ޕެނަލްޓީއެކެވެ.

މި މޮޅާއެކު މި ސީޒަނުގެ އިޓާލިއަން ކަޕުގެ ކުއާޓާއަށް ޔުވެންޓަސް ދަތުރުކުރިއިރު، ކުއާޓާގެ މެޗުތައް ކުޅުމަށް ތާވަލުކޮށްފައިވަނީ އަންނަ ފެބްރުއަރީ މަހުގެ ތެރޭގައެވެ. ޔުވެންޓަސްއަކީ އިޓާލިއަން ކަޕުގެ އެންމެ ކާމިޔާބު ޓީމެވެ. އެގޮތުން އެ ޓީމުން ވަނީ މިހާތަނަށް މި މުބާރާތް 14 ފަހަރު ކާމިޔާބުކޮށްފައެވެ.