100 ކިލޯ ޑްރަގް މައްސަލަ: ކެނެބިސް ބޭނުން ކުރުމުގެ ދައުވާ އުފުލާފައިވާ އެކަކު ހާޒިރުނުވުމުން، ދައުވާ ހުށައެޅުން ކުރިއަށް ނުގެންދިޔަ

100 ކިލޯ ޑްރަގް މައްސަލައިގައި ކެނެބިސް ބޭނުންކުރުމުގެ ދައުވާ އުފުލާފައިވާ މީހުންގެ ބައި ކުރިއަށް ގެންގޮސްފައި ނުވަނީ އެކަކު ހާޒިރު ނުވުމުންނާއި، ދައުވާ ލިބޭ ބައެއް ފަރާތްތަކަށް ލިޔެކިޔުންތައް ލިބިފައިނުވާތީކަމަށް މައުލޫމާތު ލިބިއްޖެއެވެ.

މި މައްސަލައިގައި 10 މީހަކު ހައްޔަރު ކޮށްފައިވާއިރު، ކްރިމިނަލް ކޯޓުގައި މި މައްސަލައިގެ 3 ދައުވާއަކާއި ގުޅޭ ގަޒިއްޔާތަކެއް ކުރިއަށް ދެއެވެ. އެއީ ޑައިމޯފިންޓްރެފިކް ކުރުމުގެދައުވާތަކަކާއި، ޑައިމޯފިން ބޭނުން ކުރުމުގެ ދައުވާތަކެއްގެ އިތުރުން، ކެނެބިސް ބޭނުން ކުރުމުގެ ދައުވާތަކެކެވެ.

Advertisement

އޭގެ ތެރެއިން ކެނެބިސް ބޭނުން ކުރުމުގެ ކުށުގެ ދައުވާ އުފުލާފައިވަނީ ނ. ވެލިދޫ، ބީޗްހެވެން، ޖުމާން މުސްތަފާ، ލ. ކަލައިދޫ، ޖަނަވަރީމާގެ، މުހައްމަދު އަހްމަދު، ގއ ދެެއްވަދޫ ދޭލިޔާގޭ މިދުހަތު އިބްރާހިމް، މ ކޮޅުފުށި ޒަހީރާ މަންޒިލް، އަހުމަދު ޝިރުހާން ޝަމީމް އަދި ބަންގްލަދޭޝްގެ ރައްޔިތެއްކަމަށްވާ އެމްޑީ ރަފީޤުލް އިސްލާމެވެ.

މި މައްސަލައިގެ ފުރަތަަމަ އަޑުއެހުން ބާއްވާފައިވަނީ 12 ޖެނުއަރީގައެވެ. އެ ދުވަހުގެ އަޑުއެހުން ދިފާއުންއެދިގެންސިއްރު ކޮށްފައިވާއިރު، އެ އަޑުއެހުމަށް ދައުވާ ލިބޭ ޖުމާން މުސްތަފާ ހާޒިރުވެފައެއް ނުވެއެވެ. އެގޮތުން ޖުމާން މުސްތަފާ ޗިޓާއި ޙަވާލުވުމަށްފަހުވެސް އަޑުއެހުމަށް ހާޒިރުވެފައި ނުވާކަމަށް މައްސަލަ ބައްލަވާ ގާޒީ ވިދާޅުވިއެވެ. ދެން އޮންނަ އަޑުއެހުމެއްގައި އެކަމާއި ގުޅިގެން ނިންމަވާ ގޮތެއް ގާޒީ އަންގަވާނެއެވެ.

އަޑުއެހުން ސިއްރު ކުރުމަށްފަހު ކުރިއަށް ގެންގޮސްފައިވަނީ ލިޔެކިޔުންތައް ހަމަތޯ ކަށަވަރު ކުރުމުގެ ބައެވެ. އެގޮތުން ދައުވާ ލިބޭ ފަރާތްތަކަށް ބައެއް ލިޔެކިޔުންތައް ލިބިފައިނުވާތީ ލިޔެކިޔުންތައް ހަމަ ކުރުމުގެ ކަންކަން ދައުލަތާއި ދިފާއުން ކުރިއަށް ގެންދިއުމަށް ނިންމެވިއެވެ. އަދި ދެން މި މައްސަލައިގެ އަޑުއެހުން ބާއްވާނީ ދައުވާ ލިބޭ 5 މީހުން އެކުގައިކަމަށް ވަނީ ނިންމަވާފައެވެ.

100 ކިލޯ ޑްރަގް މައްސަލައިގެ 3 ގަޒިއްޔާއެއް ކްރިމިނަލް ކޯޓުގައި ކުރިއަށްދާއިރު، މިހާތަނަށް ކުރިއަށް ގެންގޮސްފައިވަނީ މި މައްސަލައިގެ އެންމެ އަޑުއެހުމެކެވެ. އެގޮތުން މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވާ 8 މީހުންގެ ބައިވެސް ވަނީ 12 ޖެނުއަރީގައި ކުރިއަށް ގެންގޮސްފައެވެ. އެގޮތުން މިދުހަތު އިބްރާހިމްއާއި އަހުމަދު ޝިރުހާން ޝަމީމް ފިޔަވައި ދެން ތިބި އެންމެންގެ މައްޗަށް ވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައެވެ. އެ މައްސަލައިގައި ދައުވާލިބޭ އެންމެންވެސް ވަނީ ވަކީލަކު އަމިއްލައަށް އައްޔަނު ކުރުމަށް ފުރުސަތަކަށް އެދިފައެވެ. އެއާއެކު މައްސަލަ ބައްލަވާ ގާޒީ ވަނީ ވަކީލަކު އައްޔަނު ކުރުމަށް ފުރުސަތެއް ދެއްވައި، 13 ފެބްރުއަރީ 2022ށް މައްސަލައިގެ އަޑުއެހުމެއް ތާވަލު ކުރައްވާފައެވެ.

ގާޒީ ވިދާޅުވީ އެ ދުވަހުގެ އަޑުއެހުމުގައި ދައުވާ އިއްވައި ޖަވާބުދާރީވުން އޮންނާނެ ކަމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ދީބާނާޒް ފަހުމީއެވެ.