ތަރައްޤީގެ މަސައްކަތްތައް ނިމޭއިރު، މިފްކޯގެ ކެޕޭސިޓީ 13،000 ޓަނަށް އިތުރުވާނެ: ފައުޒީ
މިފްކޯގެ ތަރައްޤީއަށް އެއް ބިލިއަން ރުފިޔާގެ މަޝްރޫއެއް ހިންގިގެންދާނެ
ފެލިވަރު މަސް ފެކްޓަރީ
ތަރައްޤީގެ މަސައްކަތްތައް ނިމޭއިރު މިފްކޯގެ ސްޓޯރޭޖް ކެޕޭސިޓީ 13،000 ވަރަކަށް ޓަނަށް އިތުރުވެގެންދާނެ ކަމަށް އެކުންފުނީގެ މެނޭޖިންގ ޑިރެކްޓަރ އިސްމާއިލް ފައުޒީ ވިދާޅުވެއްޖެއެވެ.
މިފްކޯ ތަރައްޤީކުރުމަށް، ސައުދީ ފަންޑުގެ ދަށުން 1 ބިލިއަން ރުފިޔާގެ މަޝްރޫއުތަކެއް ހިންގަން ވަނީ ނިންމާފައެވެ. މި މަޝްރޫއުތަކާ ގުޅޭގޮތުން ރާއްޖެޓީވީގެ ފަސްކާފް ޕްރޮގްރާމުގައި ވާހަކަދައްކަވަމުން ފައުޒީ ވިދާޅުވީ މިފްކޯ ތަރައްޤީކުރުމަށް މީގެ ކުރީގެ އެއްވެސް ސަރުކާރަކުން ނުގެންގުޅޭ ވަރުގެ ޕްލޭނެއް މި ސަރުކާރުން ގެންގުޅޭ ކަމަށެވެ.
މިގޮތުން 1 ބިލިއަން ރުފިޔާގެ މަޝްރޫއުގެ ދަށުން ފެލިވަރުގައި 100 ޓަނުގެ ކޭނަރީއެއް ހެދުމާއި، ދުވާލެއްގެ މައްޗަށް 280 ވަރަކަށް ޓަނުގެ މަސް ފްރީޒް ކުރެވޭނެ ފްރީޒިން ކެޕޭސިޓީއަކާއި، މަސްވެރިންނަށް ފަސޭހައިން މަސް ކިރޭނެ ބަނދަރަކާއި، ބޮޑެތި ބޯޓުފަހަރު ކައިރި ކުރެވޭ ވަރުގެ ޖެޓީއަކާ އެއްކޮށް ފެލިވަރު ތަރައްޤީކުރެވޭނެ ކަމަށް ފައުޒީ ވިދާޅުވިއެވެ. ފައުޒީ ވިދާޅުވީ ފެލިވަރުގައި މިވަގުތު ފްރީޒިން ކެޕޭސިޓީއެއް ނެތް ކަމަށާއި، އެހެންނަމަވެސް ބަނދަރުގައި ބޯޓެއް ބާއްވައިގެން ފްރީޒް ކުރަމުންދާ ކަމަށެވެ.
ފެލިވަރުގެ އިތުރުން މ. އަތޮޅު މުލަކުގައި 100 ޓަނުގެ ފްރީޒިން ކެޕޭސިޓީއެއް ގާއިމްކުރުމާއި، 500 ޓަނުގެ ސްޓޯރޭޖް ކެޕޭސިޓީ ގާއިމްކުރެވިގެންދާނެ ކަމަށް ފައުޒީ ވިދާޅުވިއެވެ. އަދި ގދ. ތިނަދޫގައި 100 ޓަނުގެ ފްރީޒިން ކެޕޭސިޓީއަކާއި، 1،000 ޓަނުގެ ސްޓޯރޭޖް ކެޕޭސިޓީ ގާއިމްކުރެވިގެންދާނެ ކަމަށް ފައުޒީ ވިދާޅުވިއެވެ. ކޫއްޑޫގެ ސްޓޯރޭޖް ކެޕޭސިޓީއަށްވެސް 4،000 ޓަނު އިތުރުކޮށް، ޖުމްލަ 6،000 ޓަނުގެ ކެޕޭސިޓީއެއް ކޫއްޑޫގައި ގާއިމްވެގެންދާނެ ކަމަށް ފައުޒީ ވިދާޅުވިއެވެ. ފައުޒީ ވިދާޅުވީ މި މަސައްކަތްތައް ނިމޭއިރު މިފްކޯގެ ސްޓޯރޭޖް ކެޕޭސިޓީ 13،000 ވަރަކަށް ޓަނަށް އިތުރުވެގެންދާނެ ކަމަށެވެ.
މި މަޝްރޫއުތަކުގެ އިތުރުން ކަނޑުއޮއްގިރިއަށް މަސް ކިރުމަށް ވަދެ ނިކުތުމުގައި މަސްވެރިންނަށް ދަތިތައް ދިމާވާ ކަމުގެ ޝަކުވާ ލިބެމުންދާކަމަށާއި، މަސްވެރިންނަށް ދިމާވާ ދަތިތައް ހައްލުކުރުމަށް ކަނޑުއޮއްގިރީގެ ބަނދަރުވެސް ތަރައްޤީކުރެވިގެންދާނެ ކަމަށް ފައުޒީ ވިދާޅުވިއެވެ. މި މަސައްކަތްތައް މިހާރު އޮތީ އެވޯޑިންގ މަރުހަލާގައި ކަމަށާއި، މިއަހަރުގެ ފުރަތަމަ 6 މަސް ދުވަހުގެ ތެރޭގައި މަސައްކަތްތަކުގެ އަމަލީ މަސައްކަތް ކޮންމެވެސް ވަރަކަށް ފެށިގެންދާނެކަމަށް އުންމީދުކުރައްވާކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ މި މަސައްކަތްތައް ނިމިގެންދާއިރު، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވައުދުފުޅާ އެއްގޮތަށް މަސްވެރިން ބާނާ މަހަށް ހަމައަގު ހޯދައިދިނުމަށް މަގުފަހިވެގެންދާނެ ކަމަށެވެ. ރާއްޖޭގައި ޕްރޮސެސް ކުރުމަށްފަހު އެކްސްޕޯޓްކުރެވޭ މަސް އިތުރުވާނެ ކަމަށް ފައުޒީ ވިދާޅުވިއެވެ. އޭނާ ވިދާޅުވީ މިހާރު ހުރި ކެޕޭސިޓީއިން ޕްރޮސެސް ކޮށްފައި އެކްސްޕޯޓް ކުރެވެނީ ބާނާ މަހުގެ 30 ވަރަކަށް އިންސައްތަ ކަމަށެވެ. އެ އަދަދު އިތުރުކޮށް، ރާއްޖޭގައި ބާނާ މަސް ރާއްޖޭގައި ހިފަހައްޓައިގެން ޕްރޮސެސްކުރެވިގެންދާނެ ކަމަށް ފައުޒީ ވިދާޅުވިއެވެ.
