ބޮޑެތި މައްސަލަތައް ހައްލުކުރުމަށް މި ސަރުކާރު ފެއިލްވެއްޖެ: ހިއުމަން ރައިޓްސް ވޮޗް

ހަރުކަށި ފިކުރުގެ މައްސަލަތައް ފަދަ ބޮޑެތި މައްސަލަތައް ހައްލުކުރުމަށް ސަރުކާރުގެ އިދާރާތައް ފެއިލްވެފައިވާކަމަށް އިންސާނީ ހައްގުތަކާބެހޭ ބައިނަލްއަގުވާމީ ޖަމިއްޔާ ހިއުމަން ރައިޓްސް ވޮޗުން ބުނެފިއެވެ.

ހިއުމަން ރައިޓްސް ވޮޗުން ވަނީ ދިވެހިރާއްޖޭގައި ހުރި އިންސާނީ ހައްގުތަކާ ބެހޭ މައްސަލަތަކާ ގުޅޭ ރިޕޯޓެއް ނެރެފައެވެ. މި ރިޕޯޓުގައި ރާއްޖޭގައި އިންސާނީ ހައްގުތައް ކަށަވަރުކޮށްނުދެވިވާ ދާއިރާތައް ފާހަގަކޮށްފައިވެއެވެ.

މިގޮތުން ހަރުކަށި ފިކުރުގެ ޖަމާއަތްތަކުން ސިޔާސީ އެކި ފަރާތްތަކާއި، ނޫސްވެރިންނާއި، އެކްޓިވިސްޓުންނާ ދެކޮޅަށް ހިންގާ އެކިއެކި ކަންކަން ނުހުއްޓުވޭ ކަމަށް ބުނެފައިވެއެވެ. މިފަދަ ކަންކަން ތަހުގީގުކޮށް ނުހުއްޓުވޭކަމީ ދިވެހިރާއްޖޭގެ ޝަރުއީ ނިޒާމުގެ ބަލިކަށިކަން ހާމަކޮށްދޭ ކަމެއް ކަމަށް ވެސް ބުނެފައިވެއެވެ. އަދި 2022 ވަނަ އަހަރު ދިވެހި ސަރުކާރުން އިސްކަމެއް ދޭންވީ ރާއްޖޭގެ ޖުޑިޝަރީ ރިފޯމްކޮށް ކޮރަޕްޝަނުގެ ކަންކަން ހުއްޓުވުމަށް ކަމަށް އެ ޖަމިއްޔާއިން ބުނެފައިވެއެވެ.

މެއި 6 ވަނަ ދުވަހުގެރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާއިންވެސް ހަރުކަށި ފިކުރުގެ ސަބަބުން އޮތް ނުރައްކާ ހާމަވެގެންގޮސްފައިވާކަމަށް އެ ރިޕޯޓުގައި ބުނެފައިވެއެވެ. އަދި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް ޚާއްސަ ކޮމިޝަނެއް އެކުލަވާލާފައިވީނަމަވެސް، ތަހުގީގުތަކަށް އެއްވެސް ކުރިއެރުމެއް ލިބިފައިނުވާކަމަށް ރިޕޯޓުގައި ފާހަގަކޮށްފައިވެއެވެ. ކޮމިޝަނުން ބަލަމުންގެންދާ ބައެއް މައްސަލަތަކުގެ ތެރޭގައި ނޫސްވެރިޔާ އަހުމަދު ރިލްވާން ގެއްލުވާލި މައްސަލައާއި، ބްލޮގަރ ޔާމިން ރަޝީދު މަރާލި މައްސަލަ ހިމެނެއެވެ.

ހިއުމަން ރައިޓްސް ވޮޗްގެ ރިޕޯޓުގައިވާގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން ވަނީ މީޑިއާގެ މިނިވަންކަން ކަށަވަރުކޮށްދެއްވާކަމަށް ވައުދުވެވަޑައިގެންފައެވެ. އެހެންނަމަވެސް ނޫސްވެރިންނަށް މައުލޫމާތު ލިބުނު ގޮތް ހާމަކުރަންޖެހޭނެ ކަމަށް ބުނެ ރައްޔިތުންގެ މަޖިލީހަށް ބިލެއް ހުށަހަޅާފައިވާކަން އެ ޖަމިއްޔާއިން ވަނީ ފާހަގަކޮށްފައެވެ. މި ބިލަށް މަޖިލީހުގައި ވޯޓަށް އަހާފައެއް ނުވެއެވެ. މީގެ އިތުރުން ޖިންސީ ގޯނާގެ މައްސަލަތައް ހައްލުކުރުމުގައި މި ސަރުކާރު ފެއިލްވުމާއި ގުޅިގެން ކުރިއަށްގެންދިޔަ އެއްވުންތައް ހުއްޓުވަންވެސް އެކި ގޮތްގޮތުން މަސައްކަތްކޮށްފައިވާކަމަށް މި ރިޕޯޓުގައި ބުނެފައިވެއެވެ.

ދިވެހިރާއްޖެއިން އިންސާނީ ވަގުފާރިއާ ދެކޮޅަށް ކުރަމުންދާ މަސައްކަތްތަކުގައި ކުރިއެރުން ހޯދާފައިވާކަމަށް ހިއުމަން ރައިޓްސް ވޮޗުން ބުނެފައިވެއެވެ. އެހެންނަމަވެސް އިންސާނީ ވަގުފާރީގެ ޝިކާރައަކަށްވާ މީހުން ދެނެގަނެ އެމީހުންނަށް ބޭނުންވާ އެހީތެރިކަން ފޯރުކޮށްދިނުމަށާއި، މިކަންކަމުގައި ޝާމިލްވާ މީހުންނަށް ދޭންޖެހޭ އަދަބު ދިނުމަށް ސަރުކާރު ފެއިލްވެފައިވާކަމަށް ރިޕޯޓުގައިވެއެވެ.

މީގެ އިތުރުން، މޫސުމީ ބަދަލުތަކާ ދެކޮޅަށް ކުރަމުންދާ މަސައްކަތްތަކުގައިވެސް ރާއްޖެ ފެއިލްވެފައިވާކަމަށް އެ ޖަމިއްޔާއިން ބުނެފައިވެއެވެ. ރާއްޖެއަކީ މޫސުމީ ބަދަލުތަކުގެ އަސަރު އެންމެ ބޮޑަށް ކުރާ އެއް ގައުމަށްވެފައި، އެކި ފޯރަމްތަކުގައި މި ވާހަކަތައް ދައްކަމުންދިޔަނަމަވެސް މިކަމަށް އެދެވޭ ހައްލެއް ހޯދުމަށް ކުރެވެންހުރި ކަންކަމާ ގުޅޭގޮތުން ރައްޔިތުންނަށް ލަފާ ދީފައިނުވާކަމަށް ބުނެފައިވެއެވެ. އުދައެރުމާއި ރަށްގިރުން ފަދަ ކަންކަމަކީ ދާއިމީ ގެއްލުން ލިބޭނެ ކަންކަމަށްވާއިރު، މިކަންކަން ހައްލުކުރުމަށް ކުރެވޭނެ ކަންކަން ރައްޔިތުންނަށް ކިޔައިދީ، ހޭލުންތެރިކުރުވާފައިނުވާކަން އެ ޖަމިއްޔާއިން ފާހަގަކޮށްފައިވެއެވެ.