އަފްޣާނިސްތާނަށް އެހީވުމަށް 5 ބިލިއަން ޑޮލަރު ބޭނުންވޭ: އދ
13 ޖެނުއަރީ 2022 | ބުރާސްފަތި 05:17މިއީ އެއް ގައުމަކަށް މިހާ ގިނައިން އެހީ ހޯދުމަށް އެދުނު ފުރަތަމަ ފަހަރު
އަފްޣާނިސްތާން
އަފްޣާނިސްތާނަށް އެހީވުމަށް 5 ބިލިއަން ޑޮލަރު ބޭނުންވާ ކަމަށް އދ އިން ހާމަކޮށްފިއެވެ.
މިއީ އދ އިން އެއް ގައުމަކަށް މިހާ ގިނަ އަދަދަކަށް އެހީ ހޯދުމަށް އެދުނު ފުރަތަމަ ފަހަރެވެ. އދ ގެ ހިއުމަނިޓޭރިއަން އެޖެންސީން ބުނީ 4.4 ބިލިއަން ޑޮލަރު ބޭނުންވަނީ އަފްޣާނިސްތާނަށް އެހީވުމަށް ކަމަށެވެ. އަދި އަނެއް 623 ބިލިއަން ޑޮލަރު ބޭނުންވަނީ އެ ގައުމުގެ ބޯޑަރުން ބޭރުން ހިޔާވަހިކަން ހޯދަމުންދާ އެތައް މިލިއަން މީހުންނަށް އެހީތެރިކަން ފޯރުކޮށްދިނުމަށް ކަމަށެވެ.
އަފްޣާނިސްތާނުގެ އާބާދީގެ ތެރެއިން 22 މިލިއަން މީހުންނަށް އިންތިހާ ދަރަޖައިގެ ބަނޑުހައިހޫނުކަން ކުރިމަތިވެފައިވާ ކަމަށް ވެސް އދ އިން ބުންޏެވެ. އަފްޣާނިސްތާނަށް އެހީވުމަށް 5 ބިލިއަން ޑޮލަރު ބޭނުންވާ ކަމަށް އދ އިން ހާމަކުރުމާއި ގުޅިގެން އެމެރިކާއިން ވަނީ 308 މިލިއަނަށް ޑޮލަރު ދޭނެކަމަށް ވައުދުވެފައެވެ. އެމެރިކާއިން ބުނީ މިފައިސާ ޚަރަދުކުރާނީ ނިކަމެތި މީހުންނަށް ކާބޯތަކެތި ފޯރުކޮށްދިނުމަށާއި ސިއްހީ ނިޒާމަށާއި އެހެނިހެން ލޮޖިސްޓިކް ސަޕޯޓް ފޯރުކޮށްދިނުމަށް ކަމަށެވެ.
އަފްޣާނިސްތާނަށް އެހީވުމަށް 5 ބިލިއަން ޑޮލަރު ބޭނުންވާ ކަމަށް އދ އިން ހާމަކޮށްފައިވާއިރު އަފްޣާނިސްތާނަށް ކުރިމަތިވަމުން އަންނަ އިގްތިސާދީ ފުންވަޅުގަނޑުން އަރައިގަތުމަށް ބައިނަލްއަގްވާމީ އެހީތެރިކަމަށް ތާލިބާންގެ އިސް ލީޑަރުން ވެސް ވަނީ އެދިފައެވެ.
އަފްޣާނިސްތާނަށް ކުރިމަތިވެފައިވާ އިގްތިސާދީ ހާލަތުގެ ސަބަބުން އެގައުމުން ހިޖުރަކުރާ މީހުންގެ އަދަދު ވަނީ އިތުރުވެފައެވެ. ބައިނަލްއަގްވާމީ ގޮތުން ފާހަގަކުރާ ހިޖުރަކުރާ މީހުންގެ ދުވަހާ ގުޅުވައި ތާލިބާނުން ވަނީ ބައިނަލްއަގްވާމީ އެހީތެރިކަމަށް އެގައުމު ބޭނުންވެފައިވާކަމަށް ބުނެފައެވެ.
ތާލިބާން ސަރުކާރުގެ ޑެޕިޔުޓީ ފޮރިން މިނިސްޓަރ ޝޭރް މުހައްމަދު އައްބާސް ވިދާޅުވީ ހަނގުރާމައިގެ ސަބަބުން ފަނާވެފައިވާ އަފްޣާނިސްތާނަށް އެހީތެރިވުމަކީ އެމެރިކާ ފަދަ އަފްޣާނިސްތާނަށް ލިބެންޖެހޭ އެތައް ބިލިއަން ޑޮލަރެއް ހިފަހައްޓައިގެން ތިބި ގައުމުތަކުން ކުރަންޖެހޭ ކަމެއްކަމަށެވެ. ފަންޑުތައް ފްރީޒްކޮށްފައި ބެހެއްޓުމުގެ ސަބަބުން އެކަމުގެ އަސަރުކުރަމުން އަންނަނީ ތާލިބާނުންނަށް ނޫންކަމަށާއި އަފްޣާނިސްތާނުގެ އާންމު ރައްޔިތުންނަށްކަމަށް ޑެޕިޔުޓީ ފޮރިން މިނިސްޓަރ ވިދާޅުވިއެވެ.
