އޭޑީކޭއިން ޙާޞިލްކުރާ ކޮންމެ ކާމިޔާބަކީ، ޢާންމު ރައްޔިތުންގެ ޞިއްޙަތަށް ލިބޭ ކުރިއެރުމެއް - ރައީސް

އޭ.ޑީ.ކޭ ބޮޑެތި ކާމިޔާބީތައް ޙާޞިލްކުރަމުން އަންނަ ކަމަށާއި، އެއިން ކޮންމެ ކާމިޔާބަކީ، ޢާންމު ރައްޔިތުންގެ ޞިއްޙަތަށް ލިބޭ ކުރިއެރުމެއް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އޭ.ޑީ.ކޭ ހޮސްޕިޓަލަށް 35 އަހަރު ފުރޭ މުނާސަބަތުގައި، 35 ގަޑިއިރުގެ "ރަން ފޮރ ޗެރިޓީ:#ދުވާހިތުން" ދުވުމުގެ ޙަރަކާތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ރައީސް ވިދާޅުވީ ވަރަށް އާދައިގެ ގޮތަކަށް ކުޑަކުޑަ ކްލިނިކެއް 1987 ވަނަ އަހަރު މާލޭގައި ހުޅުވި، އެތަނަށް 35 އަހަރުވެގެންދާއިރު، ރާއްޖޭގައި ހުރި އެންމެ ބޮޑު އަމިއްލަ ހޮސްޕިޓަލަށް ވާނެކަމަށް މާގިނަ ބަޔަކު އޭރަކު ގަބޫލުނުކުރާކަމަށެވެ. މިއީ އެމަނިކުފާނު ދެކެވަޑައިގަންނަވާ ގޮތުގައި، ވަރަށްގިނަ ބައެއްގެ ބުރަ، ބޮޑު މަސައްކަތެއް ކަމަށެވެ. އަދި ވަރަށް ވިސްނުންތެރިކަމާއެކު، ނާޝިދުމެން ކުރި މަސައްކަތުގެ ނަތީޖާ ކަމަށާއި، އޭ.ޑީ.ކޭ.ގެ މި ފަޚުރުވެރި ކާމިޔާބީގެ އެންމެ ބޮޑު ޙިއްޞާދާރަކީ ނާޝިދު ކަމަށެވެ.

ރައީސް ވިދާޅުވީ 1987 ވަނަ އަހަރު ހުޅުވި މެޑި ކްލިނިކް ހޮސްޕިޓަލެއްގެ ފެންވަރަށް ތަރައްޤީވުމަކީ، ރާއްޖޭގެ ޞިއްޙީ ދުޅަހެޔޮކަމަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި ޒަމާނީ ޞިއްޙީ ޚިދުމަތްތައް ދިނުމުގައި، އޭ.ޑީ.ކޭ އަންނަނީ ވަރަށް ބޮޑެތި ކާމިޔާބީތައް ޙާޞިލްކުރަމުން ކަމަށާއި، އެއިން ކޮންމެ ކާމިޔާބަކީ، ޢާންމު ރައްޔިތުންގެ ޞިއްޙަތަށް ލިބޭ ކުރިއެރުމެއް ކަމަަށް ރައީސް ވިދާޅުވިއެވެ.

ރައީސް ވިދާޅުވީ މިކަމާ ދޭތެރޭ ފުންކޮށް ވިސްނައިލީމާ، އޭގެ ޖަވާބު ކޮންމެވެސް ވަރަކަށް ލިބޭކަމަށެވެ. އޭ.ޑީ.ކޭ. ހޮސްޕިޓަލްގެ ތާރީޚަށް ބަލާއިރު، ޒަމާނީ ޞިއްޙީ ޚިދުމަތްތައް ރާއްޖެއަށް ތަޢާރަފްވުމުގައިވެސް އެ ހޮސްޕިޓަލް ވަނީ ވަރަށް ފަޚުރުވެރި މަޤާމެއް ޙާޞިލްކޮށްފައި ކަމަށް ރައީސް ވިދާޅުވިއެވެ. އެމް.އާރް.އައި.ގެ ޚިދުމަތާއި، ސީ.ޓީ ސްކޭންގެ ޚިދުމަތް ރާއްޖޭގައި އަލަށް ފެށޛ އޭ.ޑީ.ކޭ.އިން ކަމަށާއި، ފުއްޕާމެޔާއި، ހިތް ފަޅައިގެން ކުރާ އޮޕަރޭޝަންތައް މިހާރު ރާއްޖޭގައި ކުރެވެން ހުރީވެސް ހަމައެކަނި މި ހޮސްޕިޓަލުން ކަމަށް ރައީސް ވިދާޅުވިއެވެ. އަދި ބޮލާއި ސިކުނޑިއާއި، ނާރުގެ އޮޕަރޭޝަންތައް ކުރެވެން ހުރީވެސް އޭ.ޑީ.ކޭއިން ކަމަށް ރައީސް ވިދާޅުވިއެވެ.

އޭ.ޑީ.ކޭ ހޮސްޕިޓަލްގެ ޚިދުމަތްތަކުގެ ތެރެއިން މާގިނަ ބަޔަކަށް ނޭނގި އޮތް، އެހެން ނަމަވެސް ވަރަށް މުހިންމު ދާއިރާއެއްވާ ކަމަށާއި، އެއީ މީހުން ބިނާކުރުމުގެ ދާއިރާކަމަށް ރައީސް ވިދާޅުވިއެވެ. ރައީސް ވިދާޅުވީ އެއީ ނާޝިދު ވަރަށް ބޮޑަށް އިސްކަންދެއްވާ ކަމެއްކަމަށާއި، އޭ.ޑީ.ކޭ ހޮސްޕިޓަލުގައި ޚިދުމަތް ކުރައްވާ ގިނަ ޑޮކްޓަރުންނާއި، އެހެން ބައެއް މުވައްޒަފުންނަކީ އެ ހޮސްޕިޓަލުގެ ޚަރަދުގައި ކިޔަވައިދީ ތަމްރީން ދީފައި ތިބި މީހުން ކަމަށެވެ.

އަދި އޭ.ޑީ.ކޭ ހޮސްޕިޓަލުން 2007 ވަނަ އަހަރުން ފެށިގެން އަންނަނީ ނަރސިންގ ސްކޫލެއް ހިންގަމުން ކަމަށާއި، އެ ސްކޫލުން މިހާރުވެސް ބައެއް ކޯސްތައް ހިންގައި، އެތައް ބަޔަކު ތަމްރީން ކޮށްފައިވާކަމަށެވެ. އަދި މިހާރު ތައްޔާރުވަނީ، މިއަހަރުގެ ތެރޭގައި ނަރސިންގގެ ޑިޕްލޮމާ ކޯސްތައް އެ ސްކޫލްގައި ފެށުމަށް ކަމަށް ރައީސް ވިދާޅުވިއެވެ. މި ނޫނަސް އޭ.ޑީ.ކޭ.އިން އާންމު ރައްޔިތުންނަށް ދެމުން އަންނަ ޚިދުމަތްތައް ވަރަށް ގިނަކަން ފާހަގަކުރައްވައި ރައީސް ވިދާޅުވީ، ރާއްޖެއަށް ދިމާވި ޤުދުރަތީ ކޮންމެ ކާރިޘާއެއްގައި ޢާންމު ރައްޔިތުންނަށް ބޭނުންވާ ޚިދުމަތްތައް ދިނުމަށް އޭ.ޑީ.ކޭ. އެންމެ ކުރީ ސަފަށް ނުކުންނަވާ ކަމަށެވެ.

ވަކިން ޚާއްޞަ ގޮތެއްގައި، މިދިޔަ 35 އަހަރުގެ ތެރޭގައި، އޭ.ޑީ.ކޭ.ގެ ސަބަބުން ރައްޔިތުންގެ ޢާންމު ޞިއްޙަތަށް ވަރަށް ހެޔޮ ބަދަލުތަކެއް އައިކަން ރައީސް ފާހަގަކުރެއްވިއެވެ. ޞިއްޙީ ދުޅަހެޔޮކަމާ އެކަށޭނަ ގޮތަކަށް ދިރިއުޅުމުގެ އާދަކާދަތަކާއި ވައްޓަފާޅިތައް ބަދަލުކުރުމަށް އެ ހޮސްޕިޓަލުން ވަރަށް ގިނަ މަސައްކަތްތަކެއް ކުރަމުންދާ ކަމަށް ވެސް ރައީސް ވިދާޅުވިއެވެ.