އާސަންދައިގެ ހަރަދު ކުޑަކޮށް މަންފާ ލިބޭނެ ގޮތް ހެދުމަށް ގިނަ މަސައްކަތްތަކެއް ދަނީ ކުރެވެމުން - މަރިޔަމް ޝަފީގު
16 ޖެނުއަރީ 2022 | އާދީއްތަ 17:22އެންމެ ގިނަ ފަރާތްތަކުން ރާއްޖެއިން ބޭރުން ޚިދުމަތް ހޯދަނީ ކެންސަރު ބައްޔަށް
އާސަންދަ ކުންފުނީގެ މެނޭޖިންގ ޑިރެކްޓަރ މަރިޔަމް ޝަފީގު
އާސަންދައިގެ ޚަރަދު ކުޑަކޮށް މަންފާ ލިބޭނެ ގޮތަށް މަސައްކަތްތަކެއް ކުރެވެމުންދާ ކަމަށް އެ ކުންފުނީގެ މެނޭޖިންގ ޑިރެކްޓަރ މަރިޔަމް ޝަފީގު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަވަމުން މަރިޔަމް ޝަފީގު ވިދާޅުވީ، މިއީ ރައްޔިތުންގެ ފައިސާ ކަމަށާއި، އެކަމަކު އާސަންދަ ސްކީމަކީ ޚަރަދު ބޮޑު އަދި ވޭސްޓޭޖްވެސް ވަރަށް ބޮޑަށް ހިނގަމުންދާ ސްކީމެއް ކަމަށާއި، އެހެންކަމުން މި ސްކީމް ބޭނުންކުރާއިރު ރައްޔިތުންގެ އެހީތެރިކަންވެސް ބޭނުންވާކަމަށެވެ.
މަރިޔަމް ޝަފީގު އިތުރަށް ވިދާޅުވީ އާސަންދަގެ އޮންލައިން ޕޯޓަލް "ވިނަވި" ބޭނުންކޮށްގެން ކޮންމެ ތާކު ހުރެވެސް އެމީހަކު ހޯދާ ޚިދުމަތްތަކުގެ ތަފުސީލު ފެންނާނެ ކަމަށެވެ. މީގެ އިތުރުން އެސްއެމްއެސްއިން ވެސް ހިދުމަތުގެ ތަފްސީލު އެނގިގެންދާނެ ކަމަށާއި، އެ ޚިދުމަތް ލޯންޗު ކުރިފަހުން މަހެއް ނުވާއިރު، މިހާރުވެސް 215 ޝަކުވާ އައިސްފައިވާ ކަމަށެވެ. އެސްއެމްއެސް ލިބޭނީ ފޯނު ނަމްބަރު އާސަންދަގައި ރަޖިސްޓްރީކޮށްގެން ކަމަށާއި، އަދި ރަޖިސްޓްރީ ކުރުމަށްފަހު، އާސަންދައިން ޚިދުމަތެއް ލިބިގަތުމުން ވަގުތުން ފޯނަށް މެސެޖު އަންނާނެ ކަމަށާއި، މެސެޖުގައި ހޯދި ޚިދުމަތުގެ ތަފްސީލު ލިބޭނެކަމަށެވެ.
މަރިޔަމް ޝަފީގު ވިދާޅުވީ ރާއްޖެއިން ބޭރުން ފަރުވާ ހޯދާ މީހުންގެ އަދަދު މަދުކުރެވޭނީ ރާއްޖޭގެ ސިއްހީ ޚިދުމަތްތައް އިތުރަށް ތަރައްގީ ކުރެވިގެން ކަމަށާއި، އާސަންދަ މެދުވެރިކޮށް އެންމެ ގިނައިން މީހުން ރާއްޖެއިން ބޭރުން ފަރުވާ ހޯދަނީ ކެންސަރު ބައްޔަށްކަމަށެވެ. މީގެ އިތުރުން ލޮލުގެ ބަލިތަކާއި، ކިޑްނީގެ ބަލިތަކުގެ އިތުރުން ގޭސްޓްރައިޓަސްގެ ބަލިތަކުގައި މީހުން ފޮނުވާ އަދަދު ގިނަ ކަމަށް މަރިޔަމް ޝަފީގް ވިދާޅުވިއެވެ.
މަރިޔަމް ޝަފީގް ވިދާޅުވީ ރާއްޖޭގެ ސިއްހީ ނިޒާމުގެ ފެންވަރު މިހާރަށްވުރެ ރަނގަޅުވެއްޖެ ނަމަ އާސަންދައިން ކުރަން ޖެހޭ ޚަރަދު ވަރަށް ބޮޑަށް ކުޑަވެގެންދާނެ ކަމަށެވެ.
