ރަސްދޫ މަގުތަކުގައި ކައުންސިލްގެ ޤަވާއިދާ ހިލާފަށް ބަހައްޓާފައި ހުރި ތަކެތި ނަގަނީ
ޤަވާއިދާ ހިލާފަށް މަގުތަކާއި އިޖްތިމާއީ ސަރަހައްދުގައި ބަހައްޓާފައި ހުރި ތަކެތި ނެގުމަށް ކުރިންވަނީ އާންމުންނަށް އަންގާފައި
ރަސްދޫ މަގުތަކުގައި ޤަވާއިދާ ހިލާފަށް ބަހައްޓާފައި ހުރި ތަކެތި ނަގަނީ
އއ. ރަސްދޫގައި ކައުންސިލްގެ ހުއްދަ ނުނަގައި ރަށުގެ މަގުތަކާއި އިޖުތިމާއީ ސަރަޙައްދުތަކުގައި ޤަވާއިދާ ހިލާފަށް ބަހައްޓާފައިވާ ތަކެތި ނަގާ ނައްތާލުމުގެ މަސައްކަތް އަންގާރަ ދުވަހު އެކައުންސިލުން ފަށައިފިއެވެ.
މިގޮތައް ހުރި ތަކެތި ނަގާ ނައްތާލުމުގެ މަސައްކަތް ކައުންސިލުން ފަށައިފައި މިވަނީ މިކަން ކުރިން އަންގައި އިއުލާނު ކުރުމަށްފަހުއެވެ. މިގޮތުން މިދިޔަ އަހަރުގެ ޖޫން މަހުގެ 29 ވަނަ ދުވަހު ރަސްދޫ ކައުންސިލުން ކޮށްފައިވާ އިއުލާނެއްގައި ވިދާޅުވީ ރަށުގެ ވަށައިގެންވާ އިޖުތިމާއީ ސަރަޙައްދުތަކާއި، ރަށުގެ މަގުތަކާއި، ގޯޅިތަކުގައި ކައުންސިލުން ހުއްދަނުނަގާ އެއްވެސް ފަރާތަކުން އެއްޗެއް ބަހައްޓަފައި ހުރި ނަމަ، އެންމެހައި ތަކެއްޗާ، އަދި ކައުންސިލުން ހުއްދަނުނަގާ ރަށުގެ އެކިއެކި ހިސާބުތަކުގައި އަޅާފައިހުރި އޮޑިހަރުގެތަކާއި، މިނޫނަސް މިފަދަ އެހެނިހެން ތަންތަނާއި، ތަކެތި 13 ޖުލައި 2021 ވާ އަންގާރަ ދުވަހުގެ ނިޔަލަށް ނަގާ ނިންމުމަށް އާންމުކޮށް އަންގާ އިޢުލާން ކުރާކަަމަށެވެ.
ޖޫން މަހު ކޮށްފައިވާ އިއުލާނުގައި އިތުރަށް ވިދާޅުވީ ކައުންސިލުން މިކަމާގުޅިގެން ތަކުރާރުކޮށް އެކި ފަހަރުމަތިން އިޢުލާން ކުރެވިފައިވުމާއެކު މި އިޢުލާނުގެ މުއްދަތު ހަމަވުމަށްފަހު މި އިޢުލާނާ ޚިލާފަށް ބަޔާން ކުރެވިފައި އެވާފަދަ އެއްވެސް އެއްޗެއް ނުވަތަ ތަނެއް ބަހައްޓާފައި ހުރި ނަމަ އިތުރު އެންގުމަކާ ނުލައި ކައުންސިލަށް ލިބިދޭ ބާރާއި، އިހުތިޔާރުގެ ދަށުން އެތަކެތި އެތަންތަނުން ނަގާ ނައްތާލުމުގެ މަސައްކަތް ކުރުމާއެކު އިޢުލާނާ ޚިލާފުވި ފަރާތްތަކާމެދު ޤާނޫނީގޮތުން ފިޔަވަޅު އެޅޭނެކަމުގައި ވެސް ޢާންމުކޮށް އަންގާ އިޢުލާންކުރާކަމަށެވެ.
އަދި ޤާނޫނާ، ޤަވާޢިދުގެ ތެރެއިން މިތަކެތި ނަގަންޖެހޭ ޙާލަތެއްގައި މިތަކެތި ނެގުމުގެ ތެރޭގައި ތަކެއްޗަށް ލިބޭ އެއްވެސް ގެއްލުމަކަށް މިކައުންސިލުން ޒިންމާ ނުވާނެކަމުގައިވެސް ކައުންސިލުންވަނީ އާންމުކޮށް ރައްޔިތުންނަށް އަންގާފައެެވެ.
ރައްރަށުގެ ސާފުތާހިރުކަން ދެމެހެއްޓުމަށް ކައުންސިލްތަކުން އަންނަނީ ތަފާތު މަސައްކަތް ތަކެއް ކުރަމުންނެވެ.
