އއ. ރަސްދޫ ހޮސްޕިޓަލުގެ ޓެންޑަރ ޑޮކިއުމެންޓުތައް ކުވައިތު ފަންޑު ފޮރ އަރަބް އިކޮނަމިކް ޑިވެޕޮލަޕްމަންޓުގެ ނޯ އޮބްޖެކްޝަން އަށް ފޮނުވާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު އަމީރު މިހެން ވިދާޅުވީ ތޮއްޑޫ ދާއިރާގެ މެންބަރު ހަސަން ޝިޔާން މިނިސްޓަރ އޮފް ފިނޭންސް އިބްރާހިމް އަމީރާއި ލިޔުމުން ޖަވާބު ހޯއްދެވުމަށް ފޮނުއްވި ސުވާލުގެ ޖަވާބުގައެވެ.
މެންބަރު ޝިޔާން ފޮނުއްވި ސުވާލުގައި ވިދާޅުވެފައިވަނީ ކުވައިތު ފަންޑުގެ އެހީގައި ކުރިއަށް ގެންދިއުމަށް ހަމަޖެހިފައިވާ އއ. އަތޮޅު ހޮސްޕިޓަލުގެ ކުރެހުމާއި ބީއޯކިއު ނިންމާ ބިޑުކޮށް ކޮންޓްރެކްޓަރެއް ހޯދުމަށް މިނިސްޓްރީ އޮފް ހެލްތުން ވަނީ ފިނޭންސް މިނިސްޓްރީއަށް ފޮނުވާފައި ކަމަށެވެ. އަދި ސާފުކުރަން ބޭނުންވަނީ މި ޕްރޮޖެކްޓުގެ ފައިސާ ހަމަޖެހިފައިވޭތޯއާއި، ޕްރޮޖެކްޓު އިއުލާންކުރެވި ބަޔަކާއި ހަވާލުކޮށް މަސައްކަތް ފެށޭނީ ކިހާ ހިސާބެއްގައިތޯ އަދި މި މަސައްކަތް ކޮންޓްރެކްޓަރަކާއި ހަވާލުކުރަން ލަސްވަނީ ކީއްވެތޯއެވެ.
މެންބަރުގެ ސުވާލުގެ ޖަވާބުގައި މިނިސްޓަރު އަމީރު ވިދާޅުވެފައިވަނީ މިނިސްޓްރީ އޮފް ހެލްތު އިން ފިނޭންސް މިނިސްޓްރީއަށް ފޮނުވާފައިވާ 50 އެނދުގެ އއ. ރަސްދޫ ހޮސްޕިޓަލުގެ ކޮންސްޓްރަކްޝަން ޓެންޑަރ ޑޮކިއުމަންޓު ވަނީ 12 ސެޕްޓެމްބަރ 2022 ވަނަ ދުވަހު ކުވައިތު ފަންޑު ފޮރ އަރަބް އިކޮނަމިކް ޑިވެޕޮލަޕްމަންޓު (ކޭއެފްއޭއީޑީ) ގެ ނޯ އޮބްޖެކްޝަން އަށް ފޮނުވާފަ ކަމަށެވެ.
އަދި ނޯ އޮބްޖެކްޝަން މިނިސްޓްރީއަށް ލިބުނުހާ އަވަހަކަށް ޓެންޑަރގެ މަސައްކަތް ފެށުމަށް ވަނީ ހަމަޖެހިފައިވާ ކަމަށް މިނިސްޓަރު ވިދާޅުވިއެވެ.
މީގެ އިތުރުން މި މަޝްރޫއުގެ ލޯން އެގްރީމެންޓާއި ގުޅޭ މަޝްވަރާތައް ކޭއެފްއޭއީޑީއާއެކު މިނިސްޓްރީން ކުރިއަށް ގެންދާ ކަމަށެވެ. އަދި މި މަޝްވަރާތަކަށްފަހު ކޭއެފްއީޑީއާއި އެކު ކުރިއަށް އޮތް މަސްތަކުގެ ތެރޭގައި ލޯން އެގްރީމެންޓުގައި ސޮއިކުރެވޭނެ ކަމަށް ވެސް މިނިސްޓަރު ވިދާޅުވިއެވެ.
