އެއަރ ޓެކްސީއަކުން ޖެހި ކިރުދޫނިތަކެއް މަރުވި މައްސަލަ ބަލަން ފަށައިފި
މި ހާދިސާގައި ގިނަ އަދަދެއްގެ ދޫނި ވަނީ މަރުވެފައި
އެއަރ ޓެކްސީން ޖެހި މަރުވި ކިރުދޫނިތައް
ޓްރާންސް މޯލްޑިވިއަން އެއަރވޭސް (ޓީއެމްއޭ)ގެ އެއަރ ޓެކްސީއަކުން ޖެހި ކިރުދޫނިތަކެއް މަރުވި މައްސަލަ އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބަލަން ފަށައިފިއެވެ.
ހޯމަ ދުވަހުގެ މެންދުރު ނ. އަތޮޅުގެ ރިސޯޓެއްގެ ތުނޑިމަތިން ދަތުރުކުރަމުންދިޔަ އެއަރ ޓެކްސީއެއްގައި ޖެހި ގިނަ އަދަދެއްގެ ކިރުދޫނި ވަނީ މަރުވެފައެވެ. މަރުވެފައިވާ ދޫނިތަކުގެ ފޮޓޯތައް ދަނީ ސޯޝަލް މީޑިއާގައި އާންމުވަމުންނެވެ.
މިކަމާއި ގުޅިގެން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ އެއަރ ޓެކްސީއަކުން ޖެހި ގިނަ އަދަދެއްގެ ކިރުދޫނި މަރުވި މައްސަލަ ބަލަން ފަށާފައިވާކަމަށެވެ. އެހެންނަމަވެސް އެ މައްސަލަ ބެލުމަށް ވަކި ޓީމެއް އެ ސަރަހައްދަށް ގޮސްފައިނުވާކަމަށް ނައީމް ވިދާޅުވިއެވެ.
ނައީމް ވިދާޅުވީ މިހާރު ބަލަމުންދަނީ މި ހާދިސާ ހިނގި ގޮތާއި، ހާދިސާ ހިނގުމުގައި ޝާމިލްވާ މީހުންނާއި، ހާދިސާ ހިނގި ގޮތް ކަމަށެވެ. އަދި މައްސަލަ ބަލާއިރު، ދޫނިތަކުގެ ސަބަބުން މަތިންދާބޯޓަށް ލިބިދާނެ ގެއްލުމަަށްވެސް ބަލަންޖެހޭނެ ކަމަށް ނައީމް ވިދާޅުވިއެވެ. އަދި މައްސަލަ ބެލުމަށްފަހު އެއަރ ޓެކްސީ ޖައްސާ ލޭންޑިން ޕްލެޓްފޯމް އެހެން ތަނަކަށް ބަދަލުކުރަންޖެހިދާނެ ކަމަށް އޭނާ ވިދާޅުވިއެވެ.
މި ހާދިސާ ހިނގި ހިސާބުން އެތައް ބަޔަކު ގެންދިޔައީ ސޯޝަލް މީޑިއާގައި މިކަމާ ގުޅޭ ޕޯސްޓްތައް ކުރަމުންނެވެ. މީގެ ތެރޭގައި ހާދިސާ ހިނގި ތަން ދުށް ބަޔަކު ވެސް އުޅެއެވެ. އެމީހުން ބުނި ގޮތުގައި ތުނޑި މަތިން ކިރު ދޫނިތައް އުދުހޭކަން އެނގޭއިރުވެސް ކޮންމެ ދުވަހަކު އެއަރ ޓެކްސީ އަންނަނީ އެ ދިމާލުންނެވެ. އަދި މިހާހިސާބުން ގިނަ ބަޔަކު ގެންދިޔައީ މިކަމުގައި ޝާމިލްވާ މީހުންނާއިމެދު ފިޔަވަޅު އެޅުމަށް ގޮވާލަމުންނެވެ.
ކިރުދޫންޏަކީ ރާއްޖޭގައި ހިމާޔަތްކޮށްފައިވާ ދޫނިތަކުގެ ތެރޭގައި ހިމެނޭ ދޫންޏެކެވެ. ހިމާޔަތްކޮށްފައިވާ ދޫންޏަކަށް ގެއްލުން ދިނުމަކީ ބޮޑު އަދަދުން ޖޫރިމަނާ ކުރާ ކަމެކެވެ. މިގޮތުން ހިމާޔަތްކޮށްފައިވާ ދިރޭ އެއްޗަކަށް ގޯނާ ކޮށްފިނަމަ 30،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާކުރެވޭނެ ކަމަށް ހިމާޔަތްކޮށްފައިވާ ދިރޭ ތަކެއްޗާ ބެހޭ ގަވައިދުގައި ވެއެވެ.
އަދި ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި، ބަދަލު ހޯދުމުގެ ގަވައިދުގައިވާގޮތުން، ގެއްލުން ދިނީ އެއް ދޫންޏަށް ނަމަ ޖޫރިމަނާ ކުރަނީ 20،000ރ. އިންނެވެ. އަދި އިތުރުވާ ކޮންމެ ދޫންޏަކަށް 25،000ރ. އިން ޖުރިމަނާ ކުރެއެވެ. ހިމާޔަތްކޮށްފައިވާ ދޫންޏެއްނަމަ އިތުރުވާ ކޮންމެ ދޫންޏަކަށް 10،000ރ. އިން ޖުރިމަނާކުރެއެވެ.
