ކޮވިޑާއި ގުޅިގެން ދެއަހަރުގެ މަސައްކަތް ވަނީ ފަހަތަށް ގޮސްފައި: އައިޖީއެމްއެޗްގެ ސީއީއޯ
ދުރުރާސްތާގެ ޕްލޭނާ އެއްގޮތަށް މަސައްކަތްތައް ކުރިއަކަށް ނުދޭ
އައިޖީއެމްއެޗްގެ ސީއީއޯ އިބްރާހިމް ސަލީމް،
އިންދިރާގާދީ މެމޯރިއަލް ހޮސްޕިޓަލް (އައިޖީއެމްއެޗް) އިން ދުރުރާސްތާއަށް އެކުލަވާލި ޕްލޭނާ އެއްގޮތަށް މަސައްކަތްތައް ކުރިއަށް ނުދާ ކަމަށާއި، ކޮވިޑް-19އާ ގުޅިގެން ދެއަހަރު ފަހަތަށް ގޮސްފައިވާ ކަމަށް އެހޮސްޕިޓަލްގެ ސީއީއޯ އިބްރާހިމް ސަލީމް ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި ސަލީމް ވިދާޅުވީ އައިޖީއެމްއެޗްގެ ޚިދުމަތްތައް ފުޅާކުރުމަށް ގިނަ މަސައްކަތްތައް ކުރަމުންދާ ކަމަށާއި، ކުރިއަށް އޮތްތަނުގައި އައު ޚިދުމަތްތަކެއް ތައާރަފް ކުރެވިގެންދާނެ ކަމަށެވެ. ނަމަވެސް ދުރުރާސްތާއަށް އެކުލަވާލި ޕްލޭނާ އެއްގޮތަށް މަސައްކަތްތައް ކުރިއަށް ނުދާ ކަމަށާއި، ކޮވިޑް-19އާ ގުޅިގެން ދެއަހަރު ފަހަތަށް ގޮސްފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ކޮވިޑް-19ގެ އެންމެހައި ކަންކަމުގައި އައިޖީއެމްއެޗްގެ ގިނަ ޑޮކްޓަރުންނާއި ނަރުހުން އަދި އިދާރީ މުއައްޒަފުން ވަރަށް ބުރަކޮށް މަސައްކަތް ކުރާ ކަމަށެވެ.
ދުރުރާސްތާ ޕްލޭނަށް އިޝާރާތް ކުރައްވައި ސަލީމް ވިދާޅުވީ ކިޑްނީ ޓްރާންސްޕްލާންޓާއި، އޯޕަން ހާޓް ސަރޖަރީ ރާއްޖެއިން ކުރެވޭނެ އިންތިޒާމް ހަމަޖެހުމަށް މަސައްކަތް ކުރަމުންދާ ކަމަށެވެ. ނަމަވެސް މިމަސައްކަތް ކުރުމަށް ކުރިއާލައި ބަޖެޓް ފޮނުވައި ގިނަ މަސައްކަތްތަކެއް ކުރަންޖެހޭ ކަމަށާއި، މުއައްޒަފުން ތަމްރީން ކުރަން ޖެހޭ ކަމަށެވެ. އަދި އެމަސައްކަތްތައް ކުރަން ބޭނުންވާ އިމާރާތް ވެސް އަޕްގްރޭޑް ކުރަން ޖެހޭ ކަމަށް އޭނާ ވިދާޅުވިއެވެ. ނަމަވެސް ކޮވިޑް-19އާއެކު މަސައްކަތްތައް ލަސްވުމާއި ގުޅިގެން 2022 ވަނަ އަހަރުގެ ތެރޭގައި މި ޚިދުމަތް ތައާރަފް ނުކުރެވޭނެ ކަމަށާއި، 2023ގައި އެ ޚިދުމަތްތައް ދެވިގެންދާނެ ކަމަށް އުންމީދު ކުރާ ކަމަށް ސަލީމް ވިދާޅުވިއެވެ.
ސަލީމް ވިދާޅުވީ ދުރުރާސްތާ ޕްލޭންގައި ހުރި ކަންކަން ތަންފީޒު ކުރުމަށްޓަކައި ކުރަން ޖެހޭ މަސައްކަތްތައް މިއަހަރުގެ ތެރޭގައި ބާރް ސްޕީޑްގައި ކުރިއަށްދާނެ ކަމަށެވެ.
އައިޖީއެމްއެޗުން މަސައްކަތް ކުރަނީ ރައްޔިތުންނާއި ގާތުން ރަނގަޅު ޚިދުމަތްތަކެއް ފޯރުކޮށްދިނުމަށެވެ. އެގޮތުން ޚިދުމަތްތައް އަވަސް ކުރުމަށް ޚާއްސަ ސޮފްޓްވެއަރއެއް ތައާރަފް ކުރުމަށް ދަނީ މަސައްކަތް ކުރަމުންނެވެ. އެ ސޮފްޓްވެއަރއާއެކު ބަލި މީހާގެ ބަލީގެ ހިސްޓްރީ އެއްކޮށް ފެންނާނެ ކަމަށް އައިޖީއެމްއެޗުން ބުނެއެވެ. އަދި 2022ގައި އިތުރު ޚިދުމަތްތައް ތައާރަފް ކުރެވިގެންދާނެ ކަމަށް ވެސް ބުނެއެވެ.
