ސަސް އަތުން އީގަލްސް ބަލިވެއްޖެ

ޕްރެޒިޑެންޓްސް ކަޕުގައި ކްލަބް އީގަލްސްގެ މައްޗަށް ސުޕަ ޔުނައިޓެޑް ސްޕޯޓްސް (ސަސް) އިން ކުރި ހޯދައިފިއެވެ.

ގައުމީ ފުޓުބޯޅަ ދަނޑުގައި ކުޅުނު މި މެޗު ސަސްއިން ކާމިޔާބުކުރީ 2-0 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގައި 9 ވަނަ މިނެޓުގައި ސަސްގެ މުޙައްމަދު ރަޝީދު (ހޮކޭ) ފޮނުވާލި ބޯޅަ އީގަލްސްގެ ކީޕަރު މުޙައްމަދު ތަހާ ވަނީ ދިފާއުކޮށްފައެވެ.

މެޗުގެ 34 ވަނަ މިނެޓުގައި ސަސްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހީމް އަތީގް (އިއްބެ) އެވެ. މިއީ ހޮކޭ އާއި އަޙްމަދު ނަޝާހު (ނައްޓު) ގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ.

ދެވަނަ ހާފު ފަށައިގެން ދެ މިނެޓުގެ ތެރޭގައި ސަސްއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މުޙައްމަދު ސަހާއު (ބޭލް)ގެ އެހީތެރިކަމާއެކު މި ލަނޑު އެޓީމަށް ކާމިޔާބު ކޮށްދިނީ ޔަސްފާދު ހަބީބު (މުލަކޭ)އެވެ.

މި މެޗުގެ 51 ވަނަ މިނެޓުގައި އީގަލްސްގެ ތަރި އަޙްމަދު ރިޒްވާން (ރިޒޭ) ކުޅެންއެރުވިއިރު، މިއީ މިދިޔަ އަހަރުގެ ޖެނުއަރީ މަހު ކްލަބް ވެލެންސިއާއާ ދެކޮޅަށް ކުޅެނިކޮށް ކަކުލަށް ލިބުނު ސީރިއަސް އަނިޔާއިން ރަނގަޅުވެ ރިޒޭ ކުޅުނު ފުރަތަމަ މެޗެވެ.

ސަސްއިން ދެ ލަނޑުގެ ލީޑެއް ނެގުމަށްފަހު ޑިފެންސިވްކޮށް ކުޅުނުއިރު، މެޗުގެ ފަހު ވަގުތުކޮޅުގެ ތެރޭގައި އީގަލްސްއިން ވަނީ ސަސްގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެގޮތުން އީގަލްސްގެ ހަސަން ރާއިފް އަޙްމަދު (ހަންނަ) އަށާއި ކެޕްޓަން ހުސެއިން ސިފާއު (ކުރޯ) އަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

މި ފަހަރުގެ ޕްރެޒިޑެންޓްސް ކަޕުގައި އީގަލްސްއިން ކުޅުނު ތިން މެޗުންވެސް ވަނީ ބަލިވެފައެވެ. ފުރަތަމަ ދެ މެޗުގައި އީގަލްސް ބަލިވީ ޓީސީ އާއި މާޒިޔާ އަތުންނެވެ. މެޗަކުން މޮޅުނުވެ އޮތް އީގަލްސް އޮތީ ލީގު ބުރުގެ ފުލުގައެވެ.

ސަސްއިން ފުރަތަމަ މެޗުން މާޒިޔާ އަތުން ބަލިވި ނަމަވެސް ދެން ކުޅުނު ދެ މެޗުން ޓީސީ އާއި އީގަލްސް ވަނީ ބަލިކޮށްފައެވެ. އެއާއެކު ސަސް ލީގު ބުރުގެ ހަތަރުވަނައިގައި އޮތީ ކުޅުނު ތިން މެޗުން ހަ ޕޮއިންޓް ހޯދައިގެންނެވެ.