ފަތުރުވެރިކަމުގެ ރަން އަހަރު ކުލަގަދަކޮށް ފާހަގަކުރުމަށް މަޓީން އެދިއްޖެ
އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރު
ރާއްޖެ އައި ފަތުރުވެރިންތަކެއް
ދިވެހިރާއްޖޭގެ ފަތުރުވެރިކަމުގެ ރަން އަހަރު ކުލަގަދަކޮށް ފާހަގަކުރުމަށް މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީ)އިން އެދިއްޖެއެވެ.
އަންނަ އަހަރު ރާއްޖޭގެ ފަތުރުވެރިކަމުގެ ސިނާއަތް ފަށައިގަތްތާ 50 އަހަރު ފުރޭތީ މިކަމާ ގުޅިގެން މަޓީން ނެރުނު ބަޔާނެއްގައި ބުނީ 1972 ވަނަ އަހަރު ވަރަށް އާދައިގެ ގޮތަކަށްފެށި ރާއްޖޭގެ ފަތުރުވެރިކަމުގެ ސިނާއަތް މިއަދު މިވަނީ ދުނިޔޭގެ މަގުބޫލުކަން ހޯދައި، ފަތުރުވެރިންގެ މެދުގައި އެންމެ މަގްބޫލް އެއް މަންޒިލަށް ވެފައި ކަމަށެވެ.
ފާއިތުވި 50 އަހަރުގެ ތެރޭގައި އެތައް ގޮންޖެހުންތަކެއް މި ސިނާއަތަށް ކުރިމަތިވެފައިވާކަމަށެވެ. މި ސިނާއަތުގައި ހިއްސާވާ އެންމެންގެ އެއްބާރުލުމާއެކު މިކަން ކަޑައްތުކުރެވިފައިވާ ކަމަށް މަޓީން ބުނެފައިވެއެވެ. އަދި ސަރުކާރުތަކުން މި ސިނާއަތް ކުރިއެރުވުމަށް ދޭ އެއްބާރުލުމާއި ކުރާ މަސައްކަތް އެ ޖަމިއްޔާއިން ވަނީ ފާހަގަކޮށްފައެވެ. އަދި ރާއްޖޭގެ ފަތުރުވެރިކަމުގެ ސިނާއަތަށް ލިބިފައިވާ ކުރިއެރުމަކީ ޕަބްލިކް-ޕްރައިވެޓްޕާރޓްނަޝިޕް ފުރިހަމަގޮތުގައި ހިނގާކަމުގެ ދަލީލެއް ކަމަށް މަޓީން ބުނެފައިވެއެވެ.
މަޓީން ބުނީ ރާއްޖޭގެ ތާރީޚަށް ބެލިކަމުގައިވިޔަސް ދިވެހިންނަކީ ވަރަށް އެއްބައިވަންތަ ބައެއް ކަމަށާއި، ދިމާވާ ކޮންމެ ދަތިކަމަކުން އެހާ ފަސޭހައިން އަރައިގަނެވެނީ ވެސް ދިވެހިންގެ މެދުގައި އޮންނަ އެކުވެރިކަމާއި އެއްބައިވަންތަކަމުގެ ސަބަބުން ކަމަށް މަޓީއިން ބުނެފައިވެއެވެ. ކޮވިޑް-19ގެ ބަލިމަޑުކަމުގެ ހާލަތުގައި ވެސް ރާއްޖެއިން މި އެއްބައިވަންތަކަން ދައްކާފައިވާކަމަށް ބުނެފައިވެއެވެ.
ރާއްޖޭގެ ފަތުރުވެރިކަމަށް މިހާ ހިސާބަށް އާދެވިފައިވަނީ ވެސް ދިވެހިން އެއްބައިވަންތަކަމާއެކު ކުރި މަސައްކަތުން ކަމަށާއި، އެހެންކަމުން ފަތުރުވެރިކަމުގެ ސިނާއަތަށް 50 އަހަރު ފުރުން ކުލަގަދަކޮށް ފާހަގަކުރުމަކީ އެ ޖަމިއްޔާގެ އެދުމެއް ކަމަށް ބުނެފައިވެއެވެ. މިކަމުގައި ވެސް ދިވެހިންގެ އެއްބާރުލުން ފުރިހަމައަށް ލިބޭނެ ކަމަށް އުންމީދުކުރާ ކަމަށާއި، އެ ޖަމިއްޔާގެ ފަރާތުން ދެވެން އޮތް އެެއްބާރުލުމެއް ދޭނެ ކަމުގެ ޔަގީންކަން މަޓީން ދީފައިވެއެވެ.
