ދަ ގްރާންޑޭ އަތުން ވެލެންސިއާއަށް ހަނި މޮޅެއް

ޕްރެޒިޑެންޓްސް ކަޕުގައި ދަ ގްރާންޑޭ ބަލިކޮށް ވެލެންސިއާއިން މި މުބާރާތުގައި މޮޅުވުމުގެ ސިލްސިލާ ދަމަހައްޓައިފިއެވެ.

ގައުމީ ފުޓްބޯޅަ ދަނޑުގައި ބުދަ ދުވަހުގެ ހަވީރު ކުޅުނު މެޗުން ދަ ގްރާންޑޭ އަތުން ވެލެންސިއާ މޮޅުވީ 1-0 ގެ ނަތީޖާއަކުންނެވެ.

މެޗު ފަށައިގެން ވެލެންސިއާގެ ފަރާތުން މޮޅު އެޓޭކިންގ ގޭމެއް ފެނިގެންދިޔަ ނަމަވެސް ފުރަތަމަ ހާފުގައި ވެލެންސިއާގެ ކުރިޔަށް ކުޅޭ ކެޕްޓަން އަލީ ފާސިރު (ސެންޓޭ) އަދި ބިދޭސީ ފޯވާޑް ބޯހަސް މާޓިންގެ ފަރާތުން ގޯލަށް ނުރައްކާވާ ވަރުގެ ހަމަލާއެއް އުފެއްދިފައެއް ނުވެއެވެ.

އެކަމަކު ދެވަނަ ހާފުގައި ވެލެންސިއާއިން ވަނީ އެޓީމުގެ އެޓޭކުތައް ވަރުގަދަކޮށް ފުލުފުލުގައި ދަ ގްރާންޑޭގެ ގޯލަށް ނުރައްކާކޮށްފައެވެ. އެގޮތުން ބަދަލު ކުޅުންތެރިއެއްގެ ގޮތުގައި ކުޅެންއެރި ހުސެއިން ހަނާން ދަ ގްރާންޑޭގެ ދެ ޑިފެންޑަރުން ކައިރިން ނައްޓާލުމަށްފަހު، ސެންޓޭއަށް މުޅިން ހުސްކޮށް ޖައްސާލި ބޯޅަ ސެންޓޭ ފޮނުވާލި ނަމަވެސް ދިޔައީ އަރިމަތިން ބޭރަށެވެ.

މި މެޗުގައި ވެލެންސިއާއިން ލީޑު ނެގީ މެޗުގެ 77 ވަނަ މިނެޓުގެ ތެރޭގައެވެ. ވެލެންސިއާގެ މިސްރުގެ މިޑްފިލްޑަރު ހަލީލް ޖަމާލްގެ އެހީތެރިކަމާއެކު މި ލަނޑު އެޓީމަށް ކާމިޔާބު ކޮށްދިނީ ސެންޓޭއެވެ.

މި ނަތީޖާއާއެކު ވެލެންސިއާއިން ތާވަލުގެ އެއްވަނައިގައި އޮތީ ކުޅުނު ތިން މެޗުން ލިބުނު ނުވަ ޕޮއިންޓާއެކުގައެވެ. ދެވަނައިގައި މާޒިޔާ އޮތީ އެއް މެޗު މަދުން ކުޅެ ލިބުނު ހަ ޕޮއިންޓާއެކުގައެވެ.

ޕްރެޒިޑެންޓްސް ކަޕުގައި ބުދަ ދުވަހުގެރޭ ކުޅޭ މެޗުގައި ބައްދަލުކުރާނީ ޔުނައިޓެޑް ވިކްޓްރީ (ޔޫވީ) އާއި ގްރީން ސްޓްރީޓްސްއެވެ.