314 ކިލޯގެ މަސްތުވާތަކެތި ފުލުހުން އަންގާރަ ދުވަހު ނައްތާލައިފިއެވެ.
ފުލުހުން ބުނީ މި ނައްތާލެވުނު 314 ކިލޯގެ މަސްތުވާތަކެތީގެ ތެރޭގައި ރ. އަތޮޅުން އަތުލައިގަނެވުނު 215 ކިލޯގެ މަސްތުވާތަކެއްޗާއި އދ. މަހިބަދޫން އަތުލައިގަތް 107 ކިލޯގެ މަސްތުވާތަކެތި ހިމެނޭ ކަމަށެވެ.
އަދި މިވަގުތު ނައްތާނުލެވިވާ މަސްތުވާތަކެއްޗަށް ބަލާއިރު 119 ކިލޯގެ މަސްތުވާތަކެތި ފޮރެންސިކް ލެބްގައި ޓެސްޓް ކުރުމުގެ މަސައްކަތް ކުރިއަށްދާ ކަމަށެވެ. އަދި ޕީޖީން ހުއްދަ ލިބުމުން އެތަކެތި ވެސް ނައްތާލުމުގެ މަސައްކަތް ފަށާނެ ކަމަށެވެ.
ފުލުހުން މިހާރު ކުރަމުންދާ ބައެއް މަސައްކަތުގެ މައުލޫމާތު ހިއްސާކޮށް ބުނީ މަސްތުވާތަކެތީގެ ވިޔަފާރި ކުރާ 44 ކެފޭ ބަންދުކޮށްފައިވާ ކަމަށެވެ. އެހެންނަމަވެސް ތިން ކެފޭ އަލުން ހުޅުވާލައިގެން މަސްތުވާތަކެތީގެ ވިޔަފާރި ކުރާ ކަމުގެ މައުލޫމާތު ލިބިފައިވާ ކަމަށެވެ. އަދި އެތަންތަން ވެސް ބަންދު ކުރުމުގެ މަސައްކަތް ކުރަމުންދާ ކަމަށް ފުލުހުން ބުންޏެވެ.
ރ. އަތޮޅުން އަތުލައިގަނެވުނު 215 ކިލޯގެ މަސްތުވާތަކެތީގެ މައްސަލައަކީ މަސްތުވާތަކެތި ހޯދުމަށް ފުލުހުން ހިންގި އޮޕަރޭޝަނެއްގެ ތެރެއިން ހޯދާފައިވާ މަސްތުވާތަކެއްޗެވެ. 215 ކިލޯގެ ޑްރަގް ފެނުނީ ރ. ރާނބުގަލީ ކަށިކެޔޮ ގަސްގަނޑެއްގެ ތެރޭގައި ހުރި ގޯނިތަކަކުންކަން ވަނީ ހާމަވެފައެވެ. އެކަން ހާމަވެފައިވަނީ މި މައްސަލައިގެ ތުހުމަތުގައި ހައްޔަރު ކޮށްފައިވާ ރ. މަޑުއްވަރީ، ފިނިފަރު، އަލީ ޝާކިރު (42އ) އާއި ރ. މަޑުއްވަރީ، ފެހިއަލި، ނިމާލް އަބްދުލްހާރިސް (33އ) ގެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރު ކުރުމުން، މި މައްސަލައިގައި ހިމެނޭ އައިއޯއިން ފާހަގަކޮށްފައިވާ ވާހަކަތަކުންނެވެ. އެގޮތުން މި ދެ މީހުންގެ ބަންދަށް ވެސް އިތުރު 15 ދުވަސް ޖަހާފައިވާއިރު، މި ދެމީހުން މަސްތުވާތަކެތި އެތެރެކުރަން އުޅުނުކަން އިންޓެލިޖެންސް ރިޕޯޓުން ވެސް އެނގޭކަން ކޯޓު އަމުރުގައި ބަޔާންކޮށްފައިވެއެވެ.
މި މައްސަލައިގެ އައިއޯއިން ފާހަގަކުރާ ގޮތުގައި "ފެށުން 2" ނަމަކަށް ކިޔާ ލޯންޗެއްގައި މި ދެމީހުން ރ. މަޑުއްވަރީއަށް ވަން ވަގުތު، ބަލައި ފާސްކޮށްފައިވާކަމަށް ސީންގައި ހަރަކާތްތެރިވި އޮފިސަރުން ވަނީ ބުނެފައެވެ. އަދި އޭރު ލޯންޗުން ގިނަ އަދަދެއްގެ ޕެޓްރޯލް ހަންތަކާއި، ސެޓެލައިޓު ފޯނެއް ފެނިފައިވާއިރު، އެ ސަރަހައްދުގައި ހުރި ފަޅު ރަށްތައް ވެސް އޮފިސަރުން ވަނީ ބަލައި ފާސްކޮށްފައެވެ. މިގޮތަށް ބަލައި ފާސް ކުރުމުގެ ތެރޭގައި ރ. ބޮޑުފަރު ފިނޮޅުން ޕެޓްރޯލް ހުސްކުރި 20 ލީޓަރުގެ 63 ހަން ފެނިގެން އޮފިސަރުން އެމީހުންނާ ސުވާލު ކޮށްފައިވާކަމަށާއި، ޖަވާބުގައި އެއީ މަސްތުވާތަކެތި ބަލައި ދިއުމަށް ޓެސްޓު ދަތުރެއް ކުރަން ބޭނުންކުރި ހަންތަކެއްކަމަށް އެމީހުން ބުނެފައިވާކަން ވެސް އޮފިސަރުން ފާހަގަކުރެއެވެ.
ސީންގައި ހަރަކާތްތެރިވި އޮފިސަރުން މައުލޫމާތު ދޭ ގޮތުގައި، އެ ދެމީހުން އެތެރެކުރި މަސްތުވާތަކެތި ރ. ރާނބުގަލީގައި ހުންނާނެކަމަށް ބުނެ އެތަކެތި ފުލުހުންނަށް ދެއްކިއެވެ. އެގޮތުން އެތަކެތި ފެނިފައިވަނީ އެމީހުން އެތަކެތި ހުންނާނެކަމަށް ބުނި ކަށިކެޔޮ ގަސްތަކުގެ ތެރޭގައި ކަމަށް ފުލުހުން މައުލޫމާތު ދެއެވެ. އެތަނުން މަސްތުވާތަކެތި އަޅާފައި ހުރި 11 ގޯނި ފުލުހުން ހޯދާފައިވެއެވެ. އަދި އެތަކެތީގެ ވަގުތީ ބަރުދަނުގައި 215 ކިލޯ ހުންނާނެކަން ވެސް ފުލުހުން ފާހަގަކުރެއެވެ.
އޭގެ އިތުރުން، ލޯންޗުން ފެނުނު ފޯނުގެ އެކްސްޓްރެކްޝަން ރިޕޯޓު ވެސް ފުލުހުން ވަނީ ބަލާފައެވެ. އަދި ފޯނުގައި ހުރި މެސެޖުތަކުގައި، އެމީހުން ރާއްޖެ ސަރަހައްދުން ބޭރަށް ދިޔަ ކަމުގެ މެސެޖުތަކާއި، ބޯޓަކާ ބައްދަލުކުރި ކަމުގެ މެސެޖުތަކެއް ފެނިފައިވާކަމަށް ފުލުހުން މައުލޫމާތުދެއެވެ.
މަސްތުވާތަކެތި ހޯދުމަށް ފުލުހުން ހިންގި އޮޕަރޭޝަނެއްގެ ތެރެއިން ހޯދާފައިވާ 215 ކިލޯގެ މަސްތުވާތަކެއްޗާ ގުޅުންހުރި ކަމަށް ތުހުމަތުކުރެވޭ ދެ މީހުންގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ވަނީ މިހާރު ދައުވާ ވެސް އުފުލާފައެވެ.
