ފާހަގަކުރެވޭ ވަކިވަކި ސިޔާސީ ފަރާތްތައް މަސްތުވާތަކެތީގެ ވިޔަފާރީގައި ފުޅާ ދާއިރާއެއްގައި އެބަ އުޅޭ: މިނިސްޓަރ އިމްރާން
28 ޑިސެމްބަރު 2021 | އަންގާރަ 09:13މި ސަރުކާރުން ޑްރަގް ނެޓްވޯކްތަކުގައި ހަރަކާތްތެރިވާ މީހުންނާއި ގޭންގުތައް ކުރިމަތީގައި ބޯ ތިރިނުކުރާނެ
314 ކިލޯގެ މަސްތުވާތަކެތި ނައްތާލުމަށް އަންގާރަ ދުވަހު ދޫނިދޫގައި އޮތް ރަސްމިއްޔާތުގައި ހޯމް މިނިސްޓަރ ޝެއިހް އިމްރާން އަބްދުﷲ ވާހަަކަ ދައްކަވަނީ
ފާހަގަކުރެވޭ ވަކިވަކި ސިޔާސީ ފަރާތްތައް މަސްތުވާތަކެތީގެ ވިޔަފާރީގައި ފުޅާ ދާއިރާއެއްގައި އެބަ އުޅޭ ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
314 ކިލޯގެ މަސްތުވާތަކެތި ނައްތާލުމަށް އަންގާރަ ދުވަހު ދޫނިދޫގައި އޮތް ރަސްމިއްޔާތުގައި ވާހަކަ ދައްކަވަމުން އިމްރާން އަބްދުﷲ ވިދާޅުވީ މަސްތުވާތަކެތީގެ މައްސަލައަށް ހައްލު ގެނައުމަށް އެންމެ ބޮޑަށް ދަތިވަނީ މިކަމުގެ ނާޖާއިޒު ފައިދާ ނަގާ ވިޔަފާރި ނެޓްވޯކްތައް އުޅޭތީ ކަމަށެވެ.
މަސްތުވާތަކެތީގެ ވިޔަފާރީއަކީ ހަމައެކަނި މަގުމަތީގައި އުޅޭ ކުދިންނަށް ކުރެވޭނެ ކަމެއް ނޫން ކަމަށާއި، މީގެ ފަހަތުގައި ވިޔަފާރިވެރިންނާއި ސިޔާސީ މީހުން ހިމެނޭ ކަމަށް އިމްރާން ވިދާޅުވިއެވެ.
މިކަމުގައި ފާހަގަކުރެވޭ ވަކިވަކި ސިޔާސީ ފަރާތްތައް އުޅޭއިރު ރައްޔިތުން އެމީހުން ދެނެގަންނަން ޖެހޭ ކަމަށް އިމްރާން ވިދާޅުވިއެވެ.
ރައްޔިތުން މިކަމާ މެދު ވިސްނަންޖެހޭ ކަމަށާއި، އޭރުން މިފަދަ ސިޔާސީ ފަރާތްތައް އެމީހުންގެ މަސައްކަތާއި ވިޔަފާރީގައި މިފަދަ ނުބައި ކަންކަން ހިމަނައިގެން ކުރިއަށް ނުގެންދެވޭނެ ކަމަށް ވެސް މިނިސްޓަރު ވިދާޅުވިއެވެ.
އެމީހުންގެ ފަރާތުން ނުފޫޒުތައް ކުރިމަތިވާކަން ފާހަގަކުރައްވައި އިމްރާން ވިދާޅުވީ އެކި މުއައްސަސާތަކަށާއި މިނިސްޓަރަށް ވެސް ނުފޫޒު ކުރިމަތިވާ ކަމަށް މިނިސްޓަރު ވިދާޅުވިއެވެ.
އިމްރާން އިތުރަށް ވިދާޅުވީ މަސްތުވާތަކެތީގެ މައްސަލަތަކުގައި ޝަރުޢީ މަރުހަލާގެ ތެރެއިން ފުލުހުން މައްސަލަ ގެންދެވެން ހުރި ހިސާބަށް ގެންދާ ކަމަށެވެ.
މަސްތުވާތަކެއްޗާ ދެކޮޅަށް ހުރިހާ ދިމާލަކުން އެކުގައި ކުރަންޖެހޭ މަސައްކަތް ކުރަންޖެހޭ ކަމަށާއި އެއްވެސް ދިމާލަކުން ފެއިލް ވެއްޖެ ކަމުގައިވާނަމަ މިކަމުގައި ގޮންޖެހުންތަކާ ކުރިމަތިވާ ކަމަށް މިނިސްޓަރު ފާހަގަކުރެއްވިއެވެ.
ރައީސް ޓާސްކްފޯހެއް އެކުލަވާލައި، މި މަސައްކަތް ފެށީ ޤައުމުގެ ހުރިހާ އެންމެން ސަލާމަތް ކުރަން ބޭނުންވާތީ ކަމަށް އިމްރާން ވިދާޅުވިއެވެ.
މި ސަރުކާރުން ޑްރަގް ނެޓްވޯކްތަކުގައި ހަރަކާތްތެރިވާ މީހުންނާއި ގޭންގުތައް ކުރިމަތީގައި ބޯ ތިރިނުކުރާނެ ކަމަށާއި، އިސް އުފުލާއިގެން ކެރިގެން އެކަންތައްތަކާ ކުރިމަތިލާނެ ކަމަށް ވެސް އިމްރާން ވިދާޅުވިއެވެ.
އަދި ޤާނޫނަށް ގެންނަން ޖެހޭ ބަދަލު ގެނެސްގެން ވެސް ރާއްޖެ މިވަބާއިން ސަލާމަތް ކުރުމުގެ މަސައްކަތް ކުރައްވާނެ ކަމަށް އިމްރާން ވިދާޅުވިއެވެ.
