ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް އިސްވެ ހުންނަވައިގެން، މަސްތުވާތަކެތީގެ މައްސަލަ ހައްލުކުރުމަށް ޓާސްކް ފޯހެއް އެކުލަވާލައިފިއެވެ.

314 ކިލޯގެ މަސްތުވާތަކެތި ނައްތާލުމަށް އަންގާރަ ދުވަހު ދޫނިދޫގައި އޮތް ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވީ ޓާސްކް ފޯހެއް އެކުލަވާލައްވައި މީގެ މަހެއްހާ ދުވަސް ކުރިން މަސައްކަތް ފަށާފައިވާ ކަމަށެވެ.

އިމްރާން ވިދާޅުވީ އަލަށް ހެދި ޓާސްކް ފޯހުން ކުރަމުން އަންނަ މަސައްކަތުގެ ނަތީޖާ އަންނަ އަހަރުގެ ފުރަތަމަ ކުއާޓާގައި ފެންނަން ފަށާނެ ކަމަށެވެ. ނަމަވެސް އެ ޓާސްކް ފޯހުން ކުރަމުން އަންނަ މަސައްކަތުގެ ތަފްސީލެއް އަދި އެ ފޯހުގައި ތިއްބަވާ މެމްބަރުންގެ ތަފްސީލެއް ހާމައެއް ނުކުރައްވައެވެ.

ފުރިހަމަ ފްރޭމްވާރކެއް ތައްޔާރު ކުރުމުގެ މަސައްކަތް މިހާރު ޓާސްކް ފޯހުން ކުރިއަށް ގެންދާ ކަމަށާއި، މިހާރު ވެސް މި ޓާސްކް ފޯހުގެ 3 ވަރަކަށް ބައްދަލުވުން ބާއްވާފައިވާ ކަމަށް އިމްރާން ވިދާޅުވިއެވެ. އަދި މި ޓާސްކް ފޯހުގެ މަސައްކަތުގެ އަސަރު އަންނަ އަހަރުގެ ފުރަތަމަ ހަ މަސްދުވަހުން ފެންނަން ފަށާނެ ކަމަށް ވަނީ ވިދާޅުވެފައެވެ.

އިމްރާން ވިދާޅުވީ މި ޓާސްކް ފޯސް ރައީސް އެކުލަވާލެއްވީ، މަސްތުވާތަކެތީގެ މައްސަލައަށް ހައްލެއް ނައިސް، ބޮޑެތި ގޮންޖެހުންތައް ކުރިމަތިވެ، މަގުމަތީގައި މަސްތުގެ ހާލަތުގައި ތިބޭ މީހުން ގިނަވެ، މިކަމުގެ އުނދަގޫ ރައްޔިތުންނަށް ކުރިމަތިވެ، އިޤްތިޞާދީ އަދި އިޖްތިމާޢީ ވެއްޓަށް އަސަރު ކުރަމުންދާތީ ކަމަށެވެ.

މަސްތުވާތަކެތީގެ މައްސަލަ ހައްލުކުރުމަށް މުޅި މުޖުތަމަޢު މިކަމުގައި ބައިވެރިވާން ޖެހޭކަން ފާހަގަކުރައްވައި މިނިސްޓަރު ވިދާޅުވީ، މީހުން ބަންދުގައި ބަހައްޓައިގެން ފަރުވާ ދިނުމަކީ ދައުލަތަށް އުފުލޭނެ ހަމައެކަނި ބުރައެއް ނޫން ކަމަށެވެ. މިއަދާ ހަމައަށް އައިރު ވެސް މި ބޮޑު މައްސަލަ ހައްލު ނުވެ ވަނީ، އެކި ސަރުކާރުތަކުން ގެންގުޅޭ ތަފާތު ސިޔާސަތުގެ ސަބަބުން ކަމަށް މިނިސްޓަރު ވިދާޅުވިއެވެ.

މިއީ އިޖުތިމާޢީ އެންމެ ބޮޑު އެއް މައްސަލަ ކަމަށްވާއިރު ދައުލަތުގެ ގުޅުންހުރި މުއައްސަސާތަކުން ގުޅިގެން މަސައްކަތް ކުރަންޖެހޭ ކަމަށް ވެސް އިމްރާން ވިދާޅުވިއެވެ. އަދި މިއީ ހަމައެކަނި ފުލުހުންގެ ފަރާތުން އެކަނި މަސައްކަތް ކޮށްގެން ނަތީޖާ ނެރެވޭނެ ކަމެއް ނޫން ކަމަށް ވިދާޅުވިއެވެ.