މީހުން ބިނާ ކުރުމުގެ ދާއިރާއަަކީ ސަރުކާރުން އެންމެ އިސްކަންދޭ ދާއިރާ - ނާއިބުރައީސް
28 ޑިސެމްބަރު 2021 | އަންގާރަ 07:54މިއަދު އެހެނިހެން އެއަރލައިންތަކުން ވެސް ދިވެހިން ފެންނަމުން ދިޔުމަކީ އުފާވެރިކަމެއް
ފައިސަލް ނަސީމް - ނާއިބުރައީސް
މީހުން ބިނާ ކުރުމުގެ ދާއިރާއަަކީ ސަރުކާރުން އެންމެ އިސްކަންދޭ ދާއިރާ ކަމަށާއި، އެކަމުގެ ނަތީޖާ ފެންނަމުންދާކަމަށް ނާއިބުރައީސް ފައިސަލް ނަސީމް ވިދާޅުވެއްޖެއެވެ.
އޭވިއޭޝަން ދާއިރާއިން މީހުން ތަމްރީނު ކުރުމަށް މަންތާއެއަރއިން ފެށި ޕްރޮގްރާމް ޝަރަފުވެރިކޮށްދެއްވައި ވާހަކަފުޅު ދައްކަވަމުން ނާއިބުރައީސް ފައިސަލް ނަސީމް ވިދާޅުވީ، ސަރުކާރުން އެންމެ ބޮޑު އިންވެސްޓެއް ކުރަނީ ވެސް މީހުން ބިނާ ކުރުމަށް ކަމަށާއި، އަމިއްލަ ކުންފުނިތަކުން ވެސް މިކަމަށް މިހާރު މަސައްކަތް ކުރަމުންދާ މަންޒަރު ފެންނަ ކަަމަށެވެ.
ރާއްޖޭގެ އޭވިއޭޝަން އިންޑަސްޓްރީ ފުޅާ ވެގެންދިޔުމާއެކު އިޤްތިޞާދަށް ވެސް އޭގެ ހެޔޮ ބަދަލު އައިސް އިޤްތިޞާދު ކުރިއެރުމަށް ފުޅާ ފުރުސަތުތަކެއް ލިބިފައިވާކަމަށް ފައިސަލް ވިދާޅުވިއެވެ. ފައިސަލް ވިދާޅުވީ، މީގެ ވިއްސަކަށް އަހަރު ކުރިއަށް ބަލައިފި ނަމަ ދިވެހިން މި ދާއިރާއިން ފެންނަނީ މަދުން ކަމަށާއި، މިއަދު އެ މަންޒަރު ބަދަލުވަމުންދާތަން ފެންނަ ކަމަށެވެ. މިއަދު އެހެނިހެން އެއަރލައިންތަކުން ވެސް ދިވެހިން ފެންނަމުން ދިޔުމަކީ އުފާވެރިކަމެއް ކަމަށާއި، ދިވެހިން ހަރަކާތްތެރިވާ ދާއިރާތަކުގައި ކުރީ ސަފުގައި ދިވެހިން ގުނާލެވޭ ކަމަށެވެ.
ފައިސަލް ވިދާޅުވީ، 3 އަހަރުގެ ތެރޭގައި މަންތާ އެއަރއިން ކުރިއެރުން ހޯދާފައިވާ ކަމަށެވެ. ދަތުރުފަތުރުގެ ނިޒާމަށް އިންގިލާބީ ބަދަލު އައިސްފައިވާއިރު، ދަތުރުފަތުރު ކުރުމުގައި ހުރި ތަކްލީފުތަކަށް ހައްލު އައިސް، ރައްޔިތުންނަށް ފަސޭހަ، އެއްތަނުން އަނެއް ތަނަށް ދަތުރު ކުރުމުގެ މަގުފަހިވެފައިވާ ކަަމަށެވެ.
ރާއްޖެއަކީ އާއިލާއާއެކު ޗުއްޓީ ހޭދަ ކުރުމަށް މަގްބޫލް ތަނެއްކަން ފާހަގަކުރައްވަމުން، ފައިސަލް ވިދާޅުވީ، މިއަދު މިފެންނަނީ ސީ ޕްލޭން އޮޕަރޭޝަން ފުޅާވެފައިވާތަން ކަމަށެވެ. ރާއްޖެއަށް ބޭނުންވަނީ ގައުމައިގެން ކުރިއަށްދާނެ ޖީލެއް ކަމަށާއި، ގައުމަށް ބޭނުންވާ ދާއިރާތަކުން ކުރިއަށް ދިޔުމަކީ، ގައުމަށް ކޮށްދެވޭ ކަމެއް ކަމަށެވެ.
އޭވިއޭޝަން ދާއިރާއަކީ ރާއްޖެއާއި، ރާއްޖެއިން ބޭރުގައި ވެސް ކުރިއަރަމުން އަންނަ އިންޑަސްޓްރީއެއްކަން ފައިސަލް ފާހަގަކުރެއްވިއެވެ. ދިވެހިން ދޭ ޚިދުމަތަކީ ހިނިތުންވުމާއެކު އުފަލުން ދޭ އެއްޗަކަށް ހަދަން ޖެހޭ ކަމަށް ފައިސަލް ވިދާޅުވިއެވެ.
