1.3 މިލިއަން ވަނަ ފަތުރުވެރިޔާ ރާއްޖެ އަތުވެއްޖެ

1.3 މިލިއަން ވަނަ ފަތުރުވެރިޔާ ހޯމަ ދުވަހު ރާއްޖެ އަތުވެއްޖެއެވެ.

1.3 މިލިއަން ވަނަ ފަތުރުވެރިޔަކަށް ހޮވިފައިވަނީ ރުމޭނިއާއަށް ނިސްބަތްވާ ކޮންސްޓަންޓީން ސްޓީލިއަން އެމިލްއެވެ. ޓޫރިޒަމް މިނިސްޓްރީއާއި ސަރުކާރުގެ އެކި ވުޒާރާތައް ގުޅިގެން މި ފަތުރުވެރިޔާއަށް މަރުހަބާ ކިޔުމުގެ ހަރަކާތްތައް ވަނީ ވެލާނާ އިންޓަރނޭޝަނަލް އެއަރޕޯޓުގައި ކުރިއަށް ގެންގޮސްފައެވެ.

މީޑިއާތަކަށް ދިން އިންޓަވިއުގައި ކޮންސްޓަންޓީން ސްޓީލިއަން އެމިލް ބުނީ މިއީ އޭނާ ރާއްޖެ އައި ދެވަނަ ފަހަރު ކަމަށާއި މިފަހަރު ރާއްޖެ އައިސްފައިވަނީ އާއިލާ އާއެކު ހަފްތާއަކަށް ކަމަށެވެ. އަދި ރާއްޖެއިން ދެ މިލިއަން ފަތުރުވެރިން ގެނައުމަށް ކަނޑައަޅާފައިވާ އަމާޒު ވާސިލްވެގެންދާނެ ކަމަށް އުންމީދު ކުރާ ކަމަށެވެ.

ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވީ ރާއްޖޭގެ ފަތުރުވެރިކަމަށް ވަރަށް ގިނަ ކާމިޔާބީތައް ލިބެމުން އަންނަ ކަމަށާއި މިއީ އިންޑަސްޓްރީގެ ހުރިހާ އެންމެންގެ ވެސް މިންނެތް މަސައްކަތް ކަމަށެވެ. އަދި ކޮވިޑާ ގުޅިގެން އިންޓަސްްޓްރީއަށް ވަރަށް ބޮޑެތި ގޮންޖެހުންތަކާއި ކުރިމަތިލާން ޖެހުނު ކަމަށް ވެސް މިނިސްޓަރ ފާހަގަކުރެއްވިއެވެ.

ނޫސްވެރިންނާއި ވާހަކަ ދައްކަވަމުން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިން ޑިރެކްޓަރ ޠައްޔިބު މުޙައްމަދު ވަނީ، މިއީ ލިބުނު ކާމިޔާބީއެއްގެ ގޮތަށް ސިފަކުރައްވާފައެވެ. އަދި މިކާމިޔާބީ ކުރިއަތް އޮތް ދުވަސްތަކުގައި ދެމެހެއްޓޭނީ ހުރިހާ ރައްޔިތުންގެ އެއްބާރުލުމާއެކު ކަމަށް ވިދާޅުވިއެވެ.

1.3 މިލިއަން ވަނަ ފަތުރުވެރިޔާ ރާއްޖެ އައިސްފައިވާއިރު ދުވާލެއްގެ މައްޗަށް ރާއްޖެ އައި ފަތުރުވެރިން އިތުރުވެ އާދިއްތަ ދުވަހުގެ އަނެއްކާވެސް އައު ރެކޯޑެއް ވެސް ވަނީ ހަދާފައެވެ. ޓުއަރިޒަމް މިނިސްޓްރީން ބުނީ މިމަހުގެ 26 ވީ އާދިއްތަ ދުވަހު ފަތުރުވެރިންގެ ޑެއިލީ އެރައިވަލްސް ހުރީ 7،098ގައި ކަމަށެވެ. މިއީ ބޯޑަރު ހުޅުވާލި ފަހުން އެއް ދުވަހެއްގެ މައްޗަށް އެންމެ ގިނަ ފަތުރުވެރިން އައި ދުވަސް ކަމަށް ޓުއަރިޒަމް މިނިސްޓްރީން ބުނެފައިވެއެވެ. އަދި މިއީ މި މަހުގެ މިހާތަނަށް ހެދި 4 ވަނަ ރެކޯޑެެވެ.

ބޯޑަރު ހުޅުވާލިފަހުން މިހާތަނަށް 5 ފަހަރެއްގެ މަތިން މި ރެކޯޑު ހަދާފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. އެއީ އޮގަސްޓު މަހުގެ 7 ވަނަ ދުވަހު 6،083 ފަތުރުވެރިންގެ ރެކޯޑާއި، އޮކްޓޯބަރު 16 ވަނަ ދުވަހު 6،197 ފަތުރުވެރިންގެ ރެކޯޑު، ޑިސެމްބަރު 5 ވަނަ ދުވަހު 6،296 ފަތުރުވެރިންގެ ރެކޯޑު، ޑިސެމްބަރު 19 ވަނަ ދުވަހު 6،715 ފަތުރުވެރިންގެ ރެކޯޑު އަދި ޑިސެމްބަރު 18 ވަނަ ދުވަހު 6،955 ފަތުރުވެރިންގެ ރެކޯޑެވެ.