އެޗްޑީސީގެ މައި.ހުޅުމާލެ ޕޯޓަލް މެދުވެރިކޮށް އައު ޚިދުމަތްތަކެއް ދޭންފަށައިފި
27 ޑިސެމްބަރު 2021 | ހޯމަ 13:30މީގެކުރިން ސިޓީ މެދުވެރިކޮށް ދެމުން ދިޔަ ބައެއް ޚިދުމަތްތައް ޕޯޓަލްއިން ދޭގޮތަށް އެޗްޑީސީން ވަނީ ހަމަޖައްސާފައި
ހުޅުމާލޭގެ އެކި ސަރަހައްދުތައް
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ "މައި.ހުޅުމާލެ" ޕޯޓަލް މެދުވެރިކޮށް އައު ޚިދުމަތްތަކެއް ދޭން ފަށައިފިއެވެ.
މީގެކުރިން ސިޓީ މެދުވެރިކޮށް ދެމުން ދިޔަ ބައެއް ޚިދުމަތްތައް ޕޯޓަލްއިން ދޭގޮތަށް އެޗްޑީސީން ވަނީ ހަމަޖައްސާފައެވެ. އެޗްޑީސީން ބުނީ ހުޅުމާލޭގައި ދިރިއުޅޭ މީހުންނަށް އެކޯޕަރޭޝަނުން ދެމުންދާ ޚިދުމަތްތައް ފަސޭހަ ކަމާއެކު ހޯދޭނެ ގޮތް ފަހިކޮށްދިނުމަށް ޕޯޓަލް މެދުވެރިކޮށް އެޚިދުމަތްތައް ދިނުމަށް ހަމަޖެހިފައިވާކަމަށެވެ.
އެގޮތުން އަލަށް މައި.ހުޅުމާލެ ޕޯޓަލްއިން ދޭން ފެށި ޚިދުމަތްތަކަކީ، އިމާރާތެއް ތަޅާލުމުގެ ހުއްދައަށް އެދުމާއި ގޯތީގެ އިމުގައި ފެންސް ޖެހުމުގެ ހުއްދައިގެ އިތުރުން ސޯޝަލް ހައުސިން ފްލެޓްތަކުގައި ފައިބަރ ކޭބަލް އެޅުމުގެ ހުއްދަ އަދި އިންފާރު ރޭނުމުގެ ހުއްދައަށް އެދުމެވެ.
މީގެ އިތުރުން އެޗްޑީސީން ވަނީ، އިމާރާތް ކުރުމުގެ ގަވާއިދާ އެއްގޮތުގެ މަތިން އިމާރާތް ތަޅާލުމުގެ ހުއްދައަށް އެދޭ ފޯމާއި އިންފާރު ރޭނުމަށް އެދި ހުށަހަޅާ ފޯމަށް އެދި ހުށަހަޅާއިރު 100 ރުފިޔާގެ ފީއެއް ނަގާނެ ކަމަށް ބުނެފައެވެ.
މައި.ހުޅުމާލެ ޕޯޓަލްއަށް ތައާރަފުކޮށްފައިވާ ޚިދުމަތްތައް އޮންލައިންކޮށް ލިބޭނެ އިންތިޒާމު ހަމަޖައްސައި، ރަސްމީކޮށް ތައާރަފުކޮށްފައި ވަނީ މިދިޔަ މަހުގެ 30 ވަނަ ދުވަހުއެވެ.
