ޢަރަބިއްޔާ ސްކޫލުގެ އައު އިމާރާތް، ބާ ޖަމާލުއްދީން ބިމުގައި އަޅަން ނިންމައިފި
ޕީ.ޓީ.އޭ.ގެ ބޭފުޅުންނާއި ބައްދަލުކުރައްވައި އެބޭފުޅުންގެ ކަންބޮޑުވުންތައް ރައީސް އަޑުއެއްސެވި
ރައީސުލްޖުމްހޫރިއްޔާ، އަލް މަދަރުސަތުލް ޢަރަބިއްޔަތުލް އިސްލާމިއްޔާގެ ޕީ.ޓީ.އޭ.ގެ ބޭފުޅުންނާ ބައްދަލުކުރެއްވުން
އަލްމަދުރަސަތުލް ޢަރަބިއްޔަތުލް އިސްލާމިއްޔާއަށް ދިމާވެފައިވާ ޖާގައިގެ މައްސަލައަށް ދާއިމީ ޙައްލެއް ހޯދައިދުނުމުގެ ގޮތުން, ބާ ޖަމާލުއްދީނުގެ ބިމުގައި ޖާގަ ތަނަވަސް އައު ޢިމާރާތެއް އަޅަން ސަރުކާރުން ނިންމަވައިފިއެވެ.
ރައީސް މިހެން ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އަލް މަދަރުސަތުލް ޢަރަބިއްޔަތުލް އިސްލާމިއްޔާގެ ޕީ.ޓީ.އޭ.ގެ ބޭފުޅުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
މި ބައްދަލުކުރެއްވުމުގައި ޢަރަބިއްޔާ ޕީ.ޓީ.އޭ.ގެ މެންބަރުންވަނީ، މިހާރު އެ ސްކޫލް ހިންގާ ޢިމާރާތުގައި ހުރި ދަތިތައް ވަރަށް ތަފްޞީލުކޮށް ރައީސުލްޖުމްހޫރިއްޔާއާ ޙިއްޞާކުރައްވައިފައެވެ. އަދި ޢިމާރާތުގެ މައްސަލަތަކެއް ހުރުމުން އެޑިއުކޭޝަން މިނިސްޓްރީއިން ވަގުތީ ގޮތުން ދެއްވި ޙައްލުތަކާމެދު ހުރި ކަންބޮޑުވުންތައްވެސް މި ބައްދަލުވުމުގައި ޕީ.ޓީ.އޭ.ގެ މެންބަރުންވަނީ ޙިއްޞާކުރައްވާފައެވެ.
މީގެ އިތުރުން ޕީ.ޓީ.އޭ.ގެ މެންބަރުންވަނީ، އެ ބޭފުޅުން މި މައްސަލައިގައި ޙައްލު ހޯދަން ބޭނުންވާ ގޮތްތައް ރައީސުލްޖުމްހޫރިއްޔާއާ ޙިއްޞާކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި އެމަނިކުފާނު ވަނީ، ޕީ.ޓީ.އޭ.ގެ މެންބަރުން ހުށަހެޅުއްވި އިތުރު ކަންކަން ބައްލަވައި އެކަންކަމަށް ވެސް ޙައްލެއް ހޯދައިދެއްވުމަށް މިނިސްޓަރ އޮފް އެޑިޔުކޭޝަންއާ މަޝްވަރާކުރައްވާނެކަމުގައި ވިދާޅުވެފައެވެ.
ޢަރަބިއްޔާ ސްކޫލްގެ ދަރިވަރުން ޢިއްޒުއްދީން ސްކޫލަށް ބަަލުކުރަން ނިންމި ނިންމުމަށް އެއްވެސް ބަދަލެއް ގެނެސްފައިނުވާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ. ޢަރަބިއްޔާ ސްކޫލްގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން އިޢުލާނުކޮށްފައިވަނީ މި މަހުގެ 16 ވަނަ ދުވަހުއެވެ. މި ނިންމުން ނިންމުމާއެކު ހުކުރު ދުވަހުގެ ހަވީރު ޢަރަބިއްޔާ ސްކޫލުގެ ކައިރީގައި ގިނަ އަދަދެއްގެ ބެލެނިވެރިން އެއްވެ، ވަނީ ނުރުހުންފާޅު ކޮށްފައެވެ. އަދި އެކި ފަރާތްތަކުން ގެންދަނީ ސޯޝަލް މީޑިއާގައިވެސް މި ނިންމުމާ ދެކޮޅަށް އެކި ވާހަކަތައް ދައްކަމުންނެވެ.
މިކަމާ ގުޅިގެން ރާއްޖެއެމްވީއާ ވާހަކަ ދެއްކި ބެލެނިވެރިއަކު ބުނީ، ހުކުރު ދުވަހުގެ ހަވީރު އެ ސުކޫލުގައި ބެލެނިވެރިން ބައްދަލުވުމެއް ބޭއްވި ކަމަށާއި، ދަރިވަރުންގެ ކިޔެވުން ވަގުތީގޮތުން ޢިއްޒުއްދީން ސްކޫލަށް ބަދަލުކުރަން ގިނަ ބެލެނިވެރިން ބޭނުން ނުވާ ކަމަށެވެ. އަދި އެކަން އެޑިޔުކޭޝަން މިނިސްޓްރީއަށްވެސް އަންގާފައިވާ ކަމަށާއި، އެނިންމުމަކީ ބެލެނިވެރިންނާ މަޝްވަރާ ކުރުމެއްނެތި ނިންމާފައިވާ ނިންމުމެއް ކަމަށް އޭނާ ބުނެފައިވެއެވެ.
ޢަރަބިއްޔާ ސްކޫލަށް ސަރުކާރުތަކުން ދަނީ އިހުމާލުވަމުންކަން ފާހަގަކޮށް ބެލެނިވެރިން ބުނީ، ދަރިވަރުން ޢިއްޒުއްދީން ސްކޫލަށް ބަދަލުކޮށްފި ކަމުގައިވާނަމަ އުޅުމަށް ވަރަށް ބޮޑެތި ބަދަލުތަކެއް އަންނާނެ ކަމަށެވެ.
މިކަމާ ގުޅިގެން ދީނީ އިލްމުވެރިންނާއި ސިޔާސީ އެކި އެކި ބޭބޭފުޅުން ވެސް ގެންދަނީ ސޯޝަލް މީޑިއާގައި އެކި ގޮތްގޮތަށް ވާހަކަދައްކަމުންނެވެ. އެގޮތުން ޢަރަބިއްޔާ ސްކޫލަކީ ޚާއްސަ ސްކޫލެއް ކަމަށާއި، ތަފާތު ދެ މީޑިއަމަކަށް ކިޔަވައިދޭ ދެ ސްކޫލް އެއް ޢިމާރާތެއްގެ ތެރޭގައި އެއްކޮށްލުމަށްވުރެ އެއް މީޑިއަމެއްގެ ދެ ސްކޫލު އެއްތަނަކަށްލުން މާ ބުއްދިވެރިކަމަށް ގިނަ ބަޔަކު ބުނަމުންދެއެވެ.
ޢަރަބިއްޔާ ސްކޫލް ހުންނަ އިމާރާތަށް ލިބިފައިވާ ގެއްލުންތަކާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނުގައި ބުނެފައިވަނީ، ޢަރަބިއްޔާ ސްކޫލްގެ އިމާރާތަށް މިވަގުތު ދިމާވެގެން އުޅޭ މައްސަލަ ބަލައި ހައްލުކުރުމަށް އިތުރު ވަގުތު ބޭނުންވާ ކަމަށެވެ. އެ ސްކޫލްގެ އިމާރާތުގެ ހާލަތު މިވަގުތު ހުރިގޮތުން އެތަނުގައި ދަރިވަރުންނަށް ތަޢުލީމު ފޯރުކޮށްދިނުމަކީ އެންމެ ރައްކާތެރިކަމެއްނޫން ކަމަށާއި، ޢިމާރާތަށް ލިބިފައިވާ ގެއްލުންތަކަށް އަވަސް ޙައްލެއް ހޯދުމަށްޓަކައި މިނިސްޓްރީން މަސައްކަތް ކުރަމުންދާ ކަމަށެވެ.
