އެއްފަހަރު ބޭނުންކުރާ ޕްލާސްޓިކް މަދުކުރުމުގެ މަސައްކަތް ބިލެތްފަހީގައި ފަށައިފި
20 ޑިސެމްބަރު 2021 | ހޯމަ 08:57"ސާފު ބިލެތްފަހި" ޕްރޮގްރާމްގެ ދަށުން އެރަށުގައި ހުރި ދާއިމީ ހުރިހާ މުއައްސަސާއަކަށް ބިއްލޫރި ފުޅި ހަދިޔާކުރާނެ
ބިލެއްފަހީގައި ފެށި ޕްލާސްޓިކް މަދުކުރުމުގެ ޕްރޮގްރާމްގެ ދަށުން ބިއްލޫރި ފުޅި ހަދިޔާކުރަނީ
ޕްލާސްޓިކުން ތިމާވެއްޓަށް ލިބޭ ގެއްލުން ކުޑަކުރުމަށް، އެއްފަހަރު ބޭނުންކޮށްފައި އުކާލާ ޕްލާސްޓިކް މަދުކުރުމަށް ބިލެތްފަހި ކައުންސިލުން މަސައްކަތް ފަށައިފިއެވެ.
މިގޮތުން މިހާރު ބިލެތްފަހީގައި ފަށާފައިވާ "ސާފު ބިލެތްފަހި" ކެމްޕެއިންގެ ދަށުން އެ ކައުންސިލުން ވަނީ އެއްފަހަރު ބޭނުންކުރެވޭ ޕްލާސްޓިކް މަދުކުރުމަށް "ޕްލާސްޓިކް ނޫންގޮތެއް" މި ޝިއާރުގެދަށުން ހަރަކާތެއް ފަށާފައެވެ.
ބިލެތްފަހި ކައުންސިލުން ވިދާޅުވީ އެރަށުގެ މުއައްސަސާތަކުގަައި ޕްލާސްޓިކް ފުޅި ބޭނުން ކުރުން ހުއްޓާލުމަކީ އެ ކައުންސިލްގެ އަމާޒެއް ކަމަށެވެ.
ބިލެތްފަހި ކައުންސިލްގެ ރައީސް ޢަބުދުﷲ ޒިޔާދު ވިދާޅުވީ، "ސާފު ބިލެތްފަހި" ކެމްޕެއިންގެ ދަށުން އެ ކައުންސިލުން ހިންގާ އެއްފަހަރު ބޭނުންކުރެވޭ ޕްލާސްޓިކް މަދުކުރުމަށް ހިންގާ ހަރަކާތުގެ ތެރެއިން ރަށުގައި ހުރި ދާއިމީ ހުރިހާ މުއައްސަސާއެއްގެ ހުރިހާ މުވައްޒަފުންނަށް ވެސް މިހާރު ބިއްލޫރި ފުޅި ހަދިޔާކޮށްފައިވާ ކަމަށެވެ.
އޭނާ ވިދާޅުވީ ހޯމަ ދުވަހުގެ ނިޔަލަށް ކައުންސިލްގެ މުވައްޒަފުންނަށާއި، ރަށު ކޯޓާއި، ފެނަކައާއި، ސިއްހީ މަރުކަޒާއި އަދި ސްކޫލްގެ މުވައްޒަފުންނަށް ވެސް މިހާރު ބިއްލޫރި ފުޅި ހަދިޔާކޮށްފައިވާ ކަމަށެވެ. އަދި އެރަށުގައި ތިބޭ އެސްޓީއޯއާއި، އެމްޓީސީސީގެ މުވައްޒަފުންނަށް ވެސް ބިއްލޫރި ފުޅި ހަދިޔާ ކުރާނެ ކަމަށް އޭނާ ވިދާޅުވިއެވެ.
ބިލެތްފަހި ރައީސް ޒިޔާދު ވިދާޅުވިގޮތުގައި ކައުންސިލްގެ ވިސްނުމަކީ ކުރިމަގުގައި ބިއްލޫރި ފުޅީގައި ބަންދުކުރި ފެން ރަށުގެ މުއައްސަސާތަކަށް ލިބޭނޭގޮތެއް ހޯދުން ކަމަށެވެ. އަދި އެ ކައުންސިލުން ފަށާފައިވާ މި ކެމްޕެއިން މުޅި ރަށަށް ފުޅާކުރުމަކީ ވެސް ކައުންސިލްގެ ވިސްނުމެއް ކަމަށް ޒިޔާދު ވިދާޅުވިއެވެ.
އެއްފަހަރު ބޭނުންކޮށްފައި އުކާލާ ޕްލާސްޓިކް މަދުކުރުމަށް ބިލެތްފަހި ކައުންސިލުން މަސައްކަތް ފެށިއިރު، ސިންގަލްޔޫސް ޕްލާސްޓިކާ ދެކޮޅަށް ސަރުކާރުން އަންނަނީ ޤާނޫނަށް ގެންނަންޖެހޭ ބަދަލުތައް ގެންނަވައިގެން ސިޔާސަތުތައް އެކަށަހަޅުއްވައި މަސައްކަތްތަކެއް ކުރައްވަމުންނެވެ.
