ރައީސް ޔާމީނަށް އެމްޑީޕީގެ ޗެއަރޕަރސަން ރައްދު ދެއްވައިފި

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދާއި ގުޅޭ ގޮތުން ކުރީގެ ރައީސް އަބްދުﷲ ޔާމީން ދެއްކެވި ވާހަކަފުޅުތަކަށް އެމްޑީޕީގެ ޗެއަރޕަރސަން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ރައްދުދެއްވައިފިއެވެ.

ކ. ތުލުސްދޫއަށް ވަޑައިގެން އިދިކޮޅު ކޯލިޝަންގެ ސަޕޯޓަރުންނާއި ބައްދަލުކުރައްވައި ރައީސް ޔާމީން ވިދާޅުވީ އިންޑިއާ އައުޓް ކަމަށް ނުބުނެވޭނެ ކަމަށް ރައީސް ނަޝީދު ވިދާޅުވެ ކުރެއްވި ޓުވީޓުގައި އިންޑިއާގެ އަސްކަރިއްޔާއޭ ޖަހާފައި ނެތް ކަމަށެވެ. އެހެންކަމުން ޚުދު އެމަނިކުފާނު ވެސް އިންޑިއާގެ އަސްކަރިއްޔާ ބޭރުވާން ޖެހޭކަން ކަމަށް ގަބޫލުފުޅު ކުރައްވާ ކަމަށެވެ.

އެކަމާއި ގުޅިގެން ހަސަން ލަތީފް ވަނީ ރައީސް ނަޝީދުގެ ސްޕޯކްސްޕަރސަންގެ މަގާމާ، ރައީސް ޔާމީން ހަވާލުވެވެޑައިގެންނެވީތޯ ސުވާލު އުފައްދަވާފައެވެ.

މީގެ އިތުރުން އިދިކޮޅުން ކުރިއަށްގެންދާ އިންޑިއާ އައުޓް ކެމްޕްއިނަށް ރައީސް ނަޝީދު ވެސް ވަނީ ރައްދު ދެއްވާފައެވެ. އިންޑިއާ އައުޓް ކަމަށް ނުބުނެވޭނެ ކަމަށް ރައީސް ނަޝީދު ވިދާޅުވެފައިވެއެވެ. ރައީސް ނަޝީދު ވިދާޅުވީ، ދިވެހިރާއްޖޭގައި އޮތް އިންޑިއާގެ ދައުރު އަދި އިންޑިއާ ކަނޑުގައި އޮތް ދިވެހިރާއްޖޭގެ ދައުރަކީ ދިވެހިންނަށް އޮޅޭނެ ދައުރެއް ނޫން ކަމަށެވެ. އެހެންކަމުން އިންޑިއާ އައުޓޭ ނުބުނެވޭނެ ކަމަށެވެ.

އިދިކޮޅު ޕީޕީއެމް/ޕީއެންސީ ކޯލިޝަންގެ ލީޑަރ. ރައީސް ޔާމީން މިނިވަންވެވަޑައިގެންނެވިފަހުން ކުރިއަށްވުރެ ބޮޑަށް އިންޑިއާ އައުޓް ކެމްޕެއިން ކުރިއަށްގެންދެއެވެ. އެގޮތުން އެމަނިކުފާނު އިސްވެ ހުންނަވައި ގެންދަވަނީ އަތޮޅުތެރޭގައި ވެސް މި ކެމްޕެއިން ކުރިއަށެވެ. އަދި އިންޑިއާ އައުޓްގެ ނަމުގައި ޕެޓިޝަނެއްގައި ސޮއިކުރުންވެސް ކުރިއަށްގެންދާއިރު، މި ޕެޓިޝަންގައި ބުނަނީ މި ސަރުކާރުން އިންޑިއާއާއެކު ސިއްރު އަސްކަރީ އެއްބަސްވުންތަކެއްގައި ސޮއިކުރަމުން ގެންދާ ކަމަށެވެ. އަދި ގާނޫނުއަސާސީއާ ޚިލާފަށް ރާއްޖޭގެ ތަންތަން އިންޑިއާއަށް ދޫކޮށްފައިވާ ކަމަށެވެ.