ހަނިމާދޫއަށް ދިމާވެފައިވާ ލަފާފުރުމުގެ ދަތިކަން ހައްލުވަނީ

ރާއްޖޭގެ އެހެން ބައެއް ރަށްރަށެކޭ އެއްގޮތަށް ހދ ހަނިމާދޫ ރައްޔިތުންނަކީވެސް ލަފާފުރުމާއި ބަނދަރުގެ ދަތިކަން އިހްސާސްކުރަމުންދާ ބައެކެވެ. އާބާދީގައި 2000 އަށްވުރެ ގިނަ މީހުން އުޅޭ ހަނިމާދޫގައި ލަފާފުރުމަށް 70 އަށްވުރެ ގިނަ އުޅަނދު ބޭނުންކުރެއެވެ. އަދި ދުވާލެއްގެ މައްޗަށް އެހެން ރަށްރަށުގެ އުޅަނދުފަހަރުތަކާއެކު ގާތްގަނޑަކަށް 100 އަށްވުރެ ގިނަ އުޅަނދު އެރަށަށް ލަފައެވެ. ބަނދަރެއް އޮތްނަމަވެސް އެ ބަނދަރަކީ އެރަށުގެ އޮޑިދޯނިފަހަރަށާއި ލަފާފުރުމަށް ބޭނުންކުރަން ރައްކާތެރި ބަނދަރެއް ނޫނެވެ.

މިހާރު ހަނިމާދޫގައި ބޭނުންކުރަމުންދާ 500 ފޫޓް ދިގު 250 ފޫޓް ފުޅާ ބަނދަރަކީ ރައީސް މައުމޫންގެ ވެރިކަމުގައި އެރަށުގައި ތަރައްގީ ކޮށްފައިވާ ބަނދަރެކެވެ.

މިހާރު ބޭނުންކުރަމުންދާ ބަނދަރު ތިލަވުމާއި ވާޓަރު ހަލާކުވެފައިވުމުން ބަނދަރު ބޭނުންކުރުމުގައި ވަރަށްބޮޑެތި ދަތިތަކެއް ކުރިމަތިވާކަމަށް އެރަށުގެ ރައްޔިތުން ބުނެއެވެ. އަދި ޚާއްސަކޮށް ހުޅަނގު މޫސުމުގައި ހަނިމާދޫ ބަނދަރަށް ލަފާފުރުމާއި އުޅަނދުތައް އަޅާފައި ބޭއްވުމަކީ އެއްވެސް ރައްކާތެރިކަމެއް ނެތްކަމެކެވެ.

2020 ވަނަ އަހަރުގެ އޮކްޓޯބަރު މަސް ނިމެނިކޮށް ސަރުކާރުން ހަނިމާދޫ ބަނދަރު ބޮޑުކޮށް ތަރައްގީކުރުމުގެ މަޝްރޫއު ފެށުމުން ހަނިމާދޫ ރައްޔިތުން އުފުލަމުންދިޔަ ތަކުލީފްތަކަށް ލުއެއް ލިބޭނެކަމަށް އެމީހުން ދެކެމުން އައި ހުވަފެންތަކުގައި ކުލަޖެހެން ފެށިއެވެ.

ހަނިމާދޫ ބަނދަރަށް ޖާގަ އިތުރުކުރުމުގެ މަސައްކަތް ސަރުކާރުން ހަވާލުކޮށްފައިވަނީ އެމްޓީސީސީއާއެވެ. މިމަޝްރޫއުގެ ދަށުން އެރަށުގެ ބަނދަރަށް 270 މީޓަރުގެ އެއްގަމު ތޮއްޓެއް އިތުރުކުރާނެއެވެ. އަދި 355 މީޓަރުގެ ބޭރު ތޮއްޓަކާއި، ބަނދަރު ފުންކުރުމާއި، ލައިޓްޖެހުމާއި، ޕޭވްމަންޓް ލުން ހިމެނެއެވެ. އެމްޓީސީސީން މައުލޫމާތު ދޭގޮތުގައި ހަނިމާދޫ ބަނދަރަށް އަލަށް އިތުރުކުރާބައި 700 ފޫޓު ދިގު، 50 މީޓަރު ފުޅާވާނެއެވެ.

އެމްޓީސީސީން ބުނީ މި މަޝްރޫއުގެ ދަށުން، މިހާރު ކުރިއަށްދަނީ އެއްގަމުތޮށި ލުމަށް ބޭނުންވާ ކޮންކްރީޓް ގާ އެތުރުމުގެ މަސައްކަތް ކަމަށެވެ. މިއީ 57.1 މިލިއަން ރުފިޔާގެ މަޝްރޫއެކެވެ.

ހަނިމާދޫ ރައްޔިތުން ބުނީ ހަނިމާދޫ ބަނދަރު ބޮޑުކުރުމުގެ މަޝްރޫއު ނިމުމުން މިހާރު ބަނދަރު ބޭނުންކުރުމުގައި ދިމާވެފައިވާ ދަތިތަށް ހައްލުވެ، މީހުންނަށާއި އުޅަނދުތަކަށް ރައްކާތެރިކަން ލިބިގެންދާނެކަމަށެވެ.