އިންޑިއާގެ އެގްޒިމް ބޭންކުން ހިންގާ ސޯޝަލް ހައުސިިންގ ޕްރޮޖެކްޓްތަކަށް އެޑްވާންސް ޕޭމަންޓް ދޫކޮށްފި
17 ޑިސެމްބަރު 2021 | ހުކުރު 03:39އަމަލީ މަސައްކަތް ފެށުމަށް ބޭނުންވާ 34 މިލިއަން އެމެރިކާ ޑޮލަރު ދޫކޮށްފައިވޭ
ހުޅުމާލެ ދެވަނަ ފިޔަވަހީގައި ސަރުކާރުން ކުރިއަށް ގެންދާ ބޯހިޔާވަހި ކަމުގެ މަޝްރޫއު
އިންޑިއާގެ އެގްޒިމް ބޭންކުން ބަޔަރޒް ކްރެޑިޓްގެ ދަށުން ހުޅުމާލެ ފޭސް 2 ގައި ހިންގާ ސޯޝަލް ހައުސިންގ ޕްރޮޖެކްޓުގެ އަމަލީ މަސައްކަތް ފެށުމަށް ބޭނުންވާ 34 މިލިއަން އެމެރިކާ ޑޮލަރު ދޫކޮށްފިއެވެ.
އެކްޒިމް ބޭންކުން 23 ސެޕްޓެމްބަރ 2021ގައި ހުޅުމާލޭގެ ފޭސް 2 ގައި 4000 ސޯޝަލް ހައުސިންގ ޔުނިޓުގެ އިމާރާތް ކުރުމަށް 228 މިލިއަން އެމެރިކާ ޑޮލަރު، ބަޔަރޒް ކްރެޑިޓް ގޮތުގައި އިތުރުކޮށް، ފަހި ދިރިއުޅުން ކޯޕަރޭޝަން ލިމިޓެޑް (އެފް.ޑީ.ސީ) އާއެކު އެއްބަސްވުންތައް ވަނީ ނިންމާފައެވެ.
އިމާރާތްކުރުމަށް ހަވާލު ކުރުމަށް ހަމަޖެހިފައިވަނީ ނެޝަނަލް ބިލްޑިންގްސް ކޮންސްރަކްޝަން ކޮމްޕެނީ (އެން.ބީ.ސީ.ސީ) އަދި ޖޭ.އެމް.ސީ ޕްރޮޖެކްޓްސް (އިންޑިއާ) ލިމިޓެޑް އާއެވެ. މި ދެކުންފުންޏަކީ ރިއަލް އެސްޓޭޓް ތަރައްޤީ އާއި އަދި ސިވިލް ކޮންސްޓްރަކްޝަން ޕްރޮޖެކްޓްތައް އިންޑިއާ އަދި ބޭރު ޤައުމުތަކުގައި ހިންގުމުގެ ތަޖުރިބާކާރުންނެވެ. މި ސައިޓްތައް މިހާރު ވަނީ ކޮންޓްރެކްޓަރުންނާ ހަވާލު ކުރެވި، ވަގުތީ ތައްޔާރީތަކުގެ މަސައްކަތް ފެށިފައެވެ.
މި އިމާރާތްތަކުގެ އާކިޓެކްޗަރަލް ޑިޒައިންގެ ތަފްސީލީ ކުރެހުންތައް މިހާރު ދަނީ ދިވެހި ސަރުކާރުގެ އިދާރާތަކާއެކު ފައިނަލައިޒް ކުރަމުން ކަމަށް އިންޑިއަން ހައިކޮމިޝަނުން ބުންޏެވެ. މި ދެ ޕްރޮޖެކްޓްގެ ދަށުން 900 އަކަފޫޓުގެ، 3 ކޮޓަރިއާއި 3 ފާޚާނާގެ 2800 ޔުނިޓް އަދި 650 އަކަފޫޓުގެ، 2 ކޮޓަރި އާއި 2 ފާޚާނާގެ 1200 ޔުނިޓް އިމާރާތްކުރުމަށް ވަނީ ނިންމާފައެވެ.
އަތްފޯރާފަށުގައި ގޯތިގެދޮރު ރައްޔިތުންނަށް ފޯރުކޮށްދިނުމަކީ ރައީސް ޞާލިޙްގެ ސަރުކާރުން ވަރަށް އިސްކަންދޭ ކަމެކެވެ. ހުޅުމާލޭގައި ގޯތިގެދޮރުގެ ތަނަވަސްކަން އިތުރުވުމަކީ މާލޭގައި ތޮއްޖެހުމުގެ މައްސަލަ ހައްލުކުރުމަށް ލިބޭނެ ފަހިކަމެކެވެ.
ރައީސް އިބްރާހީމް ޞާލިޙްގެ ސަރުކާރާއެކު އިންޑިއާއިން، މި ސަރުކާރުން އަތްފޯރާފަށުގައި ގޯތިގެދޮރު ރައްޔިތުންނަށް ފޯރުކޮށްދިނުމަށްވެފައިވާ ވަޢުދު ފުއްދުމުގައި ބައިވެރިވުމަކީ ލިބޭ ފަޚުރެއް ކަަމަށް އިންޑިއަން ހައިކޮމިޝަނުން ބުންޏެވެ.
