ފިލިޕީންސް ނަރުސްމީހާގެ މަރުގެ މައްސަލައިގައި ދިވެހި އަންހެނަކު ހައްޔަރުކޮށްފި
16 ޑިސެމްބަރު 2021 | ބުރާސްފަތި 15:05މަރުގެ މައްސަލައިގައި ނަރުސްމީހާގެ ފިރިމީހާވެސް ވަނީ ހައްޔަރުކޮށްފައި
މަރާލި ނަރުސް މީހާއާއި އޭނާގެ ފިރިމީހާ
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހަކު މަރާލި މައްސަލައިގައި ދިވެހި އަންހެނަކު ހައްޔަރުކޮށްފިއެވެ.
ފުލުހުން ބުނީ ފިލިޕީންސްއަށް ނިސްބަތްވާ ނަރުސް އަންހެން މީހާގެ މަރުގެ މައްސަލައިގައި، ކޯޓު އަމުރެއްގެ ދަށުން 24 އަހަރުގެ ދިވެހި އަންހެނަކު ހައްޔަރުކޮށްފައިވާކަމަށެވެ. މި މައްސަލަ އިތުރަށް ތަހުގީގުކުރަމުންދާކަމަށް ފުލުހުން ބުނެފައިވެއެވެ.
މައުލޫމާތު ލިބޭގޮތުގައި ފުލުހުން ހައްޔަރުކޮށްފައިވަނީ ފިލިޕީންސްއަށް ނިސްބަތްވާ ނަރުސް މީހާގެ ފިރިމީހާއާ ލޯބީގެ ގޮތުން ގުޅުން އޮތް ދިވެހި އަންހެނެކެވެ.
އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާވެސް ވަނީ ހައްޔަރުކޮށްފައެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ.
މި މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ ނަރުސް މީހާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ.
